1 Хаан түрэнүүд 5 - Библи

Бурханай ханзые пилиштүүд олзолбо

¹ Пилиштүүд Бурханай ханзые олзолон абаад, Ээбэн-Ээзэрһээ өөрын Ашдоод хото руу абаашаба.

² Тэндэ тэдэ Бурханай ханзые Дагооной дуганда оруулаад, Дагооной хажууда табиба.

³ Ашдоодойхидой үглөөдэрынь бодоод харахада, Дагоон Эзэнэй ханзын урда нюураараа газарта унанхай байба. Тэдэ Дагоониие абаад, байрадань дахин табиба.

⁴ Удаань үглөө үглөөгүүр тэдэнэй бодоод харахада, Дагоон Эзэнэй ханзын урда нюураараа газарта дахин унанхай байба. Дагооной толгой ба хоёр гарынь отолоотой богоһо дээрэ, тиихэдэ бэень лэ үлэнхэй байгаа.

⁵ Тиимэһээ Дагооной санаартад ба дугандань ерэгшэд булта Ашдоодто байдаг Дагооной дуганай богоһо дээрэ мүнөө хүрэтэр гэшхэдэггүй.

⁶ Эзэн ашдоодойхидые шангаар хэһээжэ, Ашдоодой болон тэрэнэй хаяагаар ажаһуугшадые һалгажа, һэлхэн үбшөөр дайраба.

⁷ Энээниие Ашдоодой зон хараад, иигэжэ хэлсэбэ: – Израилиин Бурханай ханза бидэнэй дунда үлөөжэ болохогүй. Юуб гэхэдэ, тэрэ маанадта болон манай бурхан Дагоондо гай тодхор ушаруулжа байна.

⁸ Хүнүүдые тэдэ эльгээжэ, Пилиштын бүхы ноёдые суглуулжа асууба: – Израилиин Бурханай ханзые яахабибди? – Гаат руу эльгээхэ хэрэгтэй, – гэһэн шиидхэбэри абтаа һэн. Тиигээд Израилиин Бурханай ханзые тэдэ Гаат руу абаашаба.

⁹ Гаат руу абаашаһанайнь удаа Эзэн энэ хотые хэһээжэ, айха хүлгэхэ ушарнууд угаа олоор гараба. Тэрэ энэ хотын зониие хүгшэн, залуугүй зобоожо, һэлхэн үбшэ халдахуулба.

¹⁰ Бурханай ханзые тэдэ Экроон руу эльгээбэ. Хэлсээнэй ханзын ерэхэдэнь, Экрооной зон хашхаралдаба: – Бултыемнай алахын тула Израилиин Бурханай ханзые иишэнь асарба!

¹¹ Тиигээд тэдэ хүнүүдые эльгээжэ, Пилиштын бүхы ноёдые суглуулжа, иигэжэ хэлэбэ: – Маанадые болон гэр бүлэнүүдыемнай һалгаахагүйн тула Израилиин Бурханай ханзые байһан газар руунь бусаан ябуулагты. Бурханай тэдэниие угаа шэрүүнээр хэһээһэнһээ хүлгөөн бүхы хотоор боложо байгаа.

¹² Үхэхэнь үхэжэ, үхөөгүй зон һэлхэ үбшэндэ баригдажа, хотын оог бархираан тэнгэридэ тулама дэгдэжэ байгаа бэлэй.