1 Хаан түрэнүүд 4 - Библи

¹ Иигэжэ Самуилай үгэ бүхы Израиляар таража, зон тэрэниие дууладаг болобо. Пилиштүүд дай үүдхэжэ, израильшууд тэдээнтэй тулалдахаар гаража, Ээбэн-Ээзэрэй дэргэдэ хотон хүреэнээр тогтобо. Пилиштүүд Апээгтэ тогтоо һэн.

Бурханай хэлсээнэй ханза буляагдаба

² Пилиштүүд Израилиин урдаһаа жагсажа, байлдаан боложо, израильшууд пилиштүүдтэ бута сохигдобо. Пилиштүүд дайнай талмай дээрэ дүрбэ мянгаад хүниие һалгааба.

³ Амиды үлэһэн зонойнгоо хотон хүреэндэ бусахадань, Израилиин ахамадууд иигэжэ хөөрэлдэбэ: – Эзэн мүнөөдэр юундэ бидэниие пилиштүүдтэ диилдүүлээб? Эзэнэй хэлсээнэй ханза Шилооһоо асарая. Тэрэ бидэнтэй байжа, дайсадһаа абарха.

⁴ Тиигээд арад зон Шилоо руу хүнүүдые эльгээжэ, херүүбүүд дээрэ оршоһон Түмэн Сэрэгтэ Эзэнэй хэлсээнэй ханза тэндэһээ абажа ерэбэ. Элиин хоёр хүбүүд Хопнии ба Пинэһаас Бурханай хэлсээнэй ханзатай хамта ерэлсээ һэн.

⁵ Эзэнэй хэлсээнэй ханзын хотон хүреэндэ асарагдахадань, бүхы израильшууд газарай доһолтор угаа ехээр хашхаралдаба.

⁶ Пилиштүүд тэрэ ехэ шууяа дуулаад, хэлсэбэ: – Еврейнүүдэй хотон хүреэндэ юун ехэ хашхаралдаан гарана гээшэб? Тиигээд Эзэнэй хэлсээнэй ханзын хотон хүреэндэ ерэһые тэдэ мэдэжэ,

⁷ айжа, иигэжэ хэлэбэ: – Бурхан тэдэнэй хотон хүреэндэ заларан ерээ. Бидэ һалаабди! Иимэ юумэн урдань маанадтай тохёолдожо байгаагүй юумэл.

⁸ Бидэндэ тодхор буугаа. Хэн маанадые энэ абари ехэ хүсэ шадалтай Бурханһаа абархаб? Энэ хадаа элһэн сүл губида египетшүүдые элдэб гай тодхороор һалгааһан Бурхан гээшэл.

⁹ Пилиштүүд, шанга зоригтой байя. Еврейнүүдэй маанадай богоол байһандал адляар өөһэдөө тэдэнэй богоол болохогүйн тула зоригтой байжа, тулалдая.

¹⁰ Тиигээд пилиштүүд шанга тулалдажа, израильшууд диилдэжэ, хүн бүхэниинь өөрынгөө майхан руу тэрьедэн гүйбэ. Израильһаа гуша мянган ябаган сэрэг алуулһан, угаа ехэ гай тодхор болоһон байгаа.

¹¹ Эзэнэй ханза буляагдан абтажа, Элиин хоёр хүбүүд Хопнии, Пинэһаас алуулаа һэн.

Элии наһа бараба

¹² Нэгэ Бэньямиин обогой хүн байлдаанай жагсаал газарһаа зугадан, тэрэ үдэрөө Шилоодо ерэбэ. Тэрэ гай гашуудалһаа боложо хубсаһаяа уринхай, толгой дээрээ шорой адханхай байгаа.

¹³ Тэрэнэй ерэхэдэ, Элии харгын хажууда һандали дээрэ һуунхай, Бурханай ханзын түлөө зүрхэнэйнь түшэгэнэжэ байһан ушарһаа тэрэ аргагүй гэтэн хаража байгаа. Үнөөхи хүн хото руу орожо, мэдээ дуулгаба. Хотын зон бултадаа шангаар уйлалдаба.

¹⁴ Элии уйлалдаа бархиралдаае дуулаад: – Энэ юун шууяан бэ? – гэжэ асуухадань, үнөөхи хүн яаралтай ерэжэ, Элиидэ дуулгаба.

¹⁵ Элии ерэн найман наһатай, хараань муудажа, нюдэдынь харахаяа болинхой байгаа.

¹⁶ Тэрэ хүн Элиидэ иигэжэ хэлэбэ: – Би байлдаанай газарһаа тэрьедэжэ мүнөөдэр ерээб. – Юун болооб, хүбүүмни? – гэжэ Элии асууба.

¹⁷ Мэдээ хүргэжэ ерэгшэ хүн: – Манайхид пилиштүүдһээ тэрьедэжэ, зомнай угаа ехээр хороогдоо, танай Хопнии ба Пинэһаас хоёр хүбүүд алуулаа, Бурханай ханза буляагдаа! – гэжэ харюусаба.

¹⁸ Тэрэнэй Бурханай ханза тухай дурдамсаарнь, Элии хаалгануудай хажуудахи һандалиһаа гэдэргээ унан, хүзүүгээ хухалжа гээгдэбэ. Ушарынь хадаа тэрэ үндэр наһатай, нүһэр бэетэй болоһон байгаа. Дүшэн жэлэй туршада тэрэ Израилиин ударидагша байгаа.

Пинэһаасай һамган наһа бараба

¹⁹ Тэрэнэй бэри, Пинэһаасай һамган, хээлитэй, түрэхын урда тээхэнэ байгаа. Бурханай ханзын буляагдаһан, хадам эсэгынгээ ба үбгэнэйнгөө гээгдэһэн тухай мэдээсэл дуулахадаа, тэрэ гэнтэ үбдэглэжэ, үхибүү түрэжэрхибэ.

²⁰ Тиигээд тэрэнэй ехэ үбдэжэ, наһа баража байхада, хажуудань байһан эхэнэрнүүд иигэжэ хэлээ: – Бү ай. Ши хүбүү түрөөш. Теэд тэрэ харюусабагүй, ямаршье хүсэгүй болоод байба.

²¹ Бурханай ханзын буляагдажа, хадам эсэгынгээ ба үбгэнэйнгөө наһа бараһан ушарһаа тэрэ: – Бурханай алдар Израильһаа һалан ошобо, – гэжэ хэлэн, хүбүүгээ Ихабоод гэжэ нэрлэбэ.

²² – Бурханай ханзын буляагдаһан ушарһаа Бурханай алдар Израильһаа һалаба, – гэжэ тэрэ үгүүлээ бэлэй.