1 Хаан түрэнүүд 3 - Библи

Бурхан Самуилые дуудана

¹ Балшар хүбүүн Самуил Элиин хажууда Эзэндэ алба хэжэл байба. Тэрэ үедэ Эзэнэй үгэ хомор, үзэгдэлнүүдшье үсөөн бэлэй.

² Элиин нюдэдынь муудажа эхилһэн, һайнаар хаража шадахагүй болоһон байгаа. Нэгэтэ тэрэнэй өөрын таһалга соо хэбтэжэ,

³ Бурханай ханзын оршодог Эзэнэй һүмэ соо Самуилай хэбтэжэ, мүн тиихэдэ Бурханай дэнгэй унтараадүй байхада,

⁴ Эзэн Самуилые дуудаба. – Би эндэ байнаб, – гэжэ тэрэ харюусаба.

⁵ Тиигээд Элиидэ гүйжэ ошоод: – Намайе дуудахадатнай би эндэ ерээб, – гэжэ тэрэ хэлэбэ. Харин Элии: – Би шамайе дуудаагүйб. Һөөргөө ошоод хэбтэ, – гэхэдэнь, Самуил бусажа хэбтэбэ.

⁶ Эзэн дахин Самуилые дуудаба. Тиихэдэнь Самуил бодожо, Элиидэ ошоод, хэлэбэ: – Намайе дуудахадатнай би эндэ ерээб. Гэбэшье Элии харюусаба: – Би дуудаагүйб. Хүбүүмни, бусаад хэбтэ даа.

⁷ Самуил Эзэниие тиихэдэ үшөө мэдэдэггүй, Эзэнэй үгэшье тэрээндэ үшөө дуулдаагүй байгаа.

⁸ Эзэн гурбадахияа Самуилые дуудаба. Самуил бодожо, Элии руу ошоод, хэлэбэ: – Намайе дуудахадатнай би эндэ ерээб. Тиихэдэнь балшар хүбүүе Эзэн дуудана гэжэ Элии ойлгобо.

⁹ Элии Самуилда хэлэбэ ха: – Ошожо хэбтэ. Хэрбээ Тэрэнэй шамайе дуудабал, «Эзэн, айладхажа хайрлыт, Танай богоол шагнажа байна» гэжэ хэлээрэй. Самуил бусажа, хэбтэһэн газартаа хэбтэбэ.

¹⁰ Эзэн ерэжэ зогсоод, урид дуудаһандал адляар дуудаба: – Самуил, Самуил! Самуил харюусаба: – Айладхажа хайрлыт. Танай богоол шагнажа байна.

¹¹ Эзэн Самуилда иигэжэ айладхаба: – Хараарайгты, Би Израилиин зондо нэгэ юумэ хэхэмни. Тэрээн тухай дуулаһан хүн бүхэнэй хоёр шэхэн соонь ханхинаха.

¹² Тэрэ үдэр Би Элиин гэр бүлэ тухай Өөрынгөө хэлэһэн юумые бултыень эхинһээнь эсэс хүрэтэр гүйсэдхэхэб.

¹³ Хүбүүдэйнгээ Намайе, Бурханиие, хараадагые мэдэжэ байгаад, тэдэниие баридаггүй байһанайнь түлөө, иимэ гэм зэмэй түлөө тэрэнэй гэр бүлые хэтэ мүнхэдөө хэһээхэб гэжэ Би тэрээндэ айладхаа бэлэйб.

¹⁴ Тиимэһээ Элиин гэр бүлын гэм зэмэ ямаршье үргэлөөр, ямаршье бэлэгээр хэзээдэшье сагааруулагдахагүй гэжэ Би Элиин гэр бүлэдэ тангаригланаб.

¹⁵ Иигээд Самуил үглөө болотор хэбтэбэ. Удаань Эзэнэй үргөөгэй үүдэнүүдые тэрэ нээбэ. Самуил энэ үзэгдэлые Элиидэ хэлэхэеэ айжа байгаа.

¹⁶ Элии Самуилые дуудаба: – Минии хүбүүн, Самуил! Самуил харюу үгэбэ: – Би эндэ байнаб.

¹⁷ – Эзэн шамда юун гэжэ айладхааб? Намһаа бү нюу. Шамда айладхаһан үгэһөө гансыеньшье намһаа нюугаа һаашни, Бурхан ехээр хэһээхэ, – гэжэ Элии хэлэбэ.

¹⁸ Самуил юушье нюунгүй бүгэдыень тэрээндэ хөөрэбэ. Тиихэдэнь Элии иигэжэ үгүүлээ һэн: – Тэрэ хадаа Эзэн мүн. Һанаһаараа Тэрэ юумэ үйлэдэхэл.

¹⁹ Самуил ехэ болоо, Эзэн тэрээнтэй хамта байлсаа, Самуилай айладхаһан бүхы юумэнь бэелдэг байба.

²⁰ Тиимэһээ Даанһаа Бэһээр-Шээбэ хүрэтэр бүхы Израилиин зон Самуил Эзэнэй лүндэншэ болоо гэжэ мэдэбэ.

²¹ Тиигээд Эзэн Самуилда Өөрыгөө элирхэйлһэн, хөөрэлдэһэн Шилоо һууриндаа үзэгдэжэл байгаа.