1 Хаан түрэнүүд 28 - Библи

¹ Тэрэ үедэ пилиштүүд Израилиин урдаһаа дайлалдахаяа сэрэгээ суглуулба. Ахииш Давидта: – Ши зонтоёо намтай хамта тулалдаанда ябахат, энээниие һайнаар ойлгогты, – гэбэ.

² Давид Ахиишта: – Һайн даа. Танай богоолой юу хэжэ шадахые мэдэжэ абахат, – гээ ха. Тиихэдэнь Ахииш Давидта: – Һайн лэ гээшэ. Би шамайе бүхы наһаараа минии бэе хамгаалагшаар томилноб, – гэбэ.

Саул эльбэ жэльбэтэнтэй зүбшэнэ

³ Самуилай наһа бараһанда бүхы Израиль гашуудажа, тэрэниие өөрынь хото болохо Рамаада хүдөөлүүлбэ. Саул эльбэ жэльбэтэйшүүлые ба үзэлшэдые орон нютагһаа үлдэн гаргаба.

⁴ Пилиштүүд сугларан ерэжэ, Шүнээмдэ хотон хүреэнээр тогтоходонь, Саулшье бүхы Израилиие суглуулжа, Гилбооһада хотон хүреэнээр тогтобо.

⁵ Саул пилиштүүдэй хотон хүреэниие хараад, ехэ айжа, зүрхэниинь доһолбо.

⁶ Тэрэнэй Эзэндэ хандахадань, Эзэн зүүдээршье, уримээршье, лүндэншэдээршье харюу үгэбэгүй.

⁷ Тиихэдэнь Саул өөрынгөө зарасанарта: – Эльбэ жэльбэтэй эхэнэрые намда бэдэржэ ологты. Би тэрээндэ ошожо, юумэ асуухамни, – гэбэ. Зарасанарынь: – Эн-Доорто эльбэ жэльбэтэй нэгэ эхэнэр бии, – гэлдэбэ.

⁸ Саул хубсаһаяа һэлгэжэ, зүһэеэ хубилгаад, хоёр хүнтэй хамта ябажа, тэрэ эхэнэртэ һүниндөө ерэбэд. Саул: – Намда үзэл хаража, минии нэрлэһэн хүниие дуудажа үгыш, – гэбэ.

⁹ Эхэнэр тэрээндэ: – Энэ орон нютагһаа эльбэ жэльбэтэйшүүлые, үзэлшэдые Саулай үлдэн гаргаһые ши мэдэнэш. Тиин юундэ ши намда урьха табижа, намайе алуулха гээбши? – гэжэ хэлэн байба ха.

¹⁰ Саул тэрээндэ Эзэнээр тангариглан: – Эзэнэй нэрээр тангаригланаб. Энэ хэрэгһээ боложо шамда ямаршье хэһээлтэ амасуулагдахагүй, – гэжэ хэлэбэ.

¹¹ Тиихэдэнь тэрэ эхэнэр: – Шамда хэниие дуудажа үгэхэбиб? – гэхэдэнь, Саул: – Намда Самуилые дуудажа үгэ, – гэбэ ха.

¹² Тэрэ эхэнэр Самуилые хаража үзэжэ, шангаар хашхараадхиба. Тиигээд тэрэ эмэ Саулда: – Та юундэ намайе мэхэлээбта? Та Саул ха юмта, – гэбэ.

¹³ Хаан тэрээндэ: – Бү ай. Харин ши юу харанабши? – гэбэ. Тэрэ эхэнэр: – Газарһаа дээшээ гаража байһан һүнэһэ хаража байнаб, – гэжэ хэлэбэ.

¹⁴ Саул тэрээнһээ: – Тэрэнэй түхэл дүрэнь ямар бэ? – гэжэ асуухада, тэрэ: – Наһатай хүн гаран ерэжэ байна. Тэрэ дэгэл үмдэнхэй, – гэбэ. Тэрэ Самуил гэжэ Саул ойлгоод, нюураараа газар хүрэтэр унан һүгэдэн байба.

¹⁵ Самуил Саулда: – Юундэ ши намайе дуудажа, намайе дэбэргээнэбши? – гэхэдэнь, Саул харюудань: – Би ехэ зобожо байнаб. Пилиштүүдэй намтай дайлалдахаяа ерэжэ байхадань, Бурхан намһаа һалан ошоо, лүндэншэдээршье, зүүдээршье намда харюу үгэнэгүй. Тиимэһээ яаха ёһотойемни намда заажа үгэхыетнай би таниие дуудааб, – гэбэ.

¹⁶ Самуил: – Эзэнэй шамһаа буруу хаража, шинии дайсан болоһон хойно юундэ намһаа асуужа байнаш?

¹⁷ Эзэн намаар дамжуулан айладхаһанаа гүйсэдхэхэ. Эзэн шинии гарһаа хаан түрые һалган абажа, ондоо хүндэ – Давидта үгэхэ.

¹⁸ Эзэниие дуулангүй, Амалээгтэ бужаганан байгаа уур хилэнгыень хангаагүй байһан ушарһаашни Эзэн мүнөө шамда тэрэниие үйлэдэжэ байна.

¹⁹ Эзэн мүн баһа Израилиие шамтай хамта пилиштүүдэй гарта үгэхэ. Иигэжэ үглөөдэр ши хүбүүдтэеэ хамта намда ерэжэ хамтархат. Израилиин сэрэгые Эзэн пилиштүүдэй гарта дамжуулха, – гэжэ хэлэбэ.

²⁰ Тиихэдэнь Саул гэнтэ бүхы бэеэрээ газарта алдалан унашаба. Тэрэ Самуилай үгэнүүдһээ боложо ехэ айгаа, мүн тэрэ бүтэн хоногой туршада юушье эдеэгүй байһан тула тэрээндэ хүсэ тэнхээ байбагүй.

²¹ Үнөөхи тэрэ эхэнэр Саулда ерэжэ, тэрэнэй һүрдэһые хараад: – Танай шэбэгшэ үгыетнай дуулаад, өөрынгөө ами наһа хайрлангүй, хэлээшыетнай дүүргэбэ.

²² Мүнөө ташье шэбэгшынгээ үгэ дуулагты. Урдатнай зүһэм хилээмэшье һаа, табихамни. Эдигты, бусаха замдатнай тэнхээ тамир бии болохо, – гэбэ.

²³ Теэд тэрэ арсажа: – Эдихэгүйб, – гэбэ. Теэд зарасанарынь үнөөхи эхэнэртэй хамта тэрэниие ехэ гуйжа, Саул үгыень дуулаба. Тэрэ газарһаа бодоод, орон дээрэ һууба.

²⁴ Эхэнэрэй гэртэ тарган тугал байгаа. Тэрэниие яаралтай тэрэ үүсэлэн гаргаба. Тиигээд гурил зууража, эһээлтэгүй хилээмэ болгобо.

²⁵ Саулай болон зарасанарайнь урда табихадань, тэдэ эдеэлбэ. Тиигээд тэрэл һүниндөө тэдэ бодожо ошоо бэлэй.