1 Хаан түрэнүүд 27 - Библи

Давид пилиштүүдэй дунда

¹ Давид өөртөө: – Би хэзээ нэгэн үдэр Саулай гарта орожо болохоб. Пилиштүүдэй нютаг руу зугадажа ошохоһоо ондоо һайн арга намда үгы ха. Тиигэбэл, Саул намайе орхижо, Израилиин бүхы хилэ нютагаар бэдэрхэеэ болихо, тиигэжэ би тэрээнһээ абарагдахаб, – гэбэ.

² Давид бодожо, өөртэйнь хамта байһан зургаан зуун зоноо дахуулан, Гаадай хаан, Маһоохын Ахииш хүбүүндэ ошобо.

³ Давид болон тэрэнэй зон өөһэдынгөө гэр бүлэнүүдтэй хамта Гаадта Ахииштай хамта ажаһууба. Давид хоёр һамгадтаяа – Езрээлэй Ахинооһам ба Набаалай һамган байһан, Кармээлэй Абигааһилтай хамта байгаа.

⁴ Давидай Гаат руу зугадаһан ушар Саулда мэдээжэ болобо. Теэд тэрэ дахин Давидые бэдэрбэгүй.

⁵ Давид Ахиишта: – Хэрбээ танай сэдьхэлдэ таараа юм һаамни, бага хотонуудай нэгэндэ намда газар үгтэжэ, би тэндэ ажаһуухамни гү? Богоолтнай хаанай хотодо тантай хамта яагаад һууха гээшэб? – гэжэ хэлэн үгүүлбэ.

⁶ Иигэжэ Ахииш тэрэ үдэр Циклаагые Давидта үгэбэ. Тиимэһээ Циклааг мүнөө болотор Иудын хаашуулай мэдэлдэ байдаг.

⁷ Пилиштүүдэй нютагта Давидай ажаһууһан сагай хугасаа гэбэл, нэгэ жэл, дүрбэн һара бэлэй.

⁸ Давид зонтоёо хамта ябажа, гэшүүршүүдтэ, гирзиидүүдтэ болон амалээгүүдтэ добтолдог байба. Тэдэ арадууд эртэ урдаһаа Шүүр, Египедэй газар хүрэтэр ажаһуудаг һэн.

⁹ Давид тэрэ нютагые дайража, нэгэшье эрэ, эмэ хүниие амиды мэндэ үлөөнгүй, хони, үхэр, элжэгэ, тэмээн һүрэгүүдые, хубсаһа буляан абажа, удаань бусажа, Ахииш руу ерэдэг байба.

¹⁰ Ахииш: – Мүнөөдэр ши хэндэ добтолон орообши? – гэжэ асуухадань, Давид: – Иудын урда зүгтэ, Ерахмээлэй урда зүгтэ, Хээнэй урда зүгтэ, – гэжэ харюусадаг байгаа.

¹¹ Давид нэгэшье эрэ, эмэ хүниие амиды мэндэ үлөөдэггүй, Гаат руу нэгэшье хүниие асардаггүй һэн. – Тиигэбэл, тэдэ «Давид иимэ юумэ хээ, иимэ хэрэг ябадалтай хүн, пилиштүүдэй нютагта байхадаа үргэлжэ иимэ хэрэг үйлэдэжэ байгаа» гэжэ хэлэжэ, маанад тухай дуулгаха, – гэжэ тэрэ хэлэдэг бэлэй.

¹² Иигэжэ Ахииш Давидта этигэн: – Өөрынгөө арад түмэн Израильда Давид лаб үзэн ядуулдаг болонхой, тиимэһээ хэтэ мүнхэдөө минии богоол болохо, – гэжэ һанажа байба.