1 Хаан түрэнүүд 25 - Библи

Самуил наһа бараба

¹ Самуил наһа бараба. Бүхы Израиль сугларжа, тэрээн тухай гашуудан, түрэл Рамаа хотодонь тэрэниие хүдөөлүүлбэ. Давид зэһэжэ, Параанай элһэн сүл губи руу ябаба.

Давид ба Абигааһил

² Маһоондо ажаһуудаг нэгэ хүн Кармээлдэ зөөритэй байгаа. Тэрэ ехэ баян хүн һэн: гурба мянган хонитой, нэгэ мянган ямаатай бэлэй. Тэрэнэй хонидой нооһо хайшалалга Кармээлдэ боложо байхадань, тэрэ Кармээл руу ерэһэн байгаа.

³ Тэрэ хүнэй нэрэ Набаал, һамганайнь нэрэ Абигааһил бэлэй. Энэ һамган һаруул ухаатай, һайхан түһөөтэй һэн, харин нүхэрынь шэрүүн, муу зантай байгаа. Тэрэ халээб хүн һэн.

⁴ Давид элһэн сүл губида байхадаа, Набаалай хонидоо хайшалжа байһан тухай дуулаба.

⁵ Тиигээд Давид арбан залуу зониие эльгээжэ, тэдээндэ: – Кармээл өөдэ гаража, Набаалтай уулзан, минии нэрэһээ тэрэниие мэндэшэлээрэйгты.

⁶ Иигэжэ минии нэрэһээ хэлээрэйгты: «Мэндээ! Танай, мүн гэр бүлынтнай, танай гэхэ бүхы юумэнэй амгалан тайбан байхань болтогой!

⁷ Хонидой нооһо хайшалаан танда боложо байна гэжэ би мүнөө дуулааб. Зай, танай хонишодой бидэнтэй хамта байха үедэ бидэ тэдэниие гомдохоогоогүйбди. Тэдэнэй Кармээлдэ байһан бүхы сагтань тэдэнэй юумэнһээ юуншье үгы болоогүй.

⁸ Өөрынгөө зарасанарһаа асуубалтнай, тэдэ тиигэжэ хэлэхэ. Тиимэһээ минии залуушуулда үршөөл хайра үзүүлыт. Мүнөөдэр һайн үдэр. Бидэ, богоолнуудтаа, танай хүбүүн болохо Давидта арга шадалаараа юушье һаа, үгыт», – гэжэ хэлээрэйгты.

⁹ Давидай залуушуул ошожо, эдэ бүхы үгэнүүдые Давидай нэрэһээ хэлээд, харюу хүлеэбэ.

¹⁰ Харин Набаал Давидай зарасанарта харюусахадаа: – Давид гээшэ хэн юм бэ? Ишайн хүбүүн гээшэ хэн юм? Мүнөө эзэнһээ зугададаг богоолнууд олон болоо.

¹¹ Хонидой нооһо хайшалагшадта зорюулжа бэлдэһэн энэ мяха, уһа болон хилээмэеэ хаанаһаашье ерэһыень мэдэхэгүй хүнүүдтэ би үгэхэ болоно гээшэ гүб? – гэбэ.

¹² Тиихэдэнь Давидай залуушуул ерэһэн замаараа бусажа ерээд, эдэ бүхы үгэнүүдые Давидта дуулгаба.

¹³ Давидай хүнүүдтээ: – Һэлмээ бүһэдөө зүүгты! – гэжэ захирхадань, хүн бүхэн һэлмэеэ зүүбэ. Давидшье баһа һэлмэеэ зүүжэ, дүрбэн зуугаад хүн Давидай хойноһоо ябажа, хоёр зуун хүн ашаа бараагаа һахижа үлэбэ.

¹⁴ Набаалай һамган Абигааһилда залуу зарасанарай нэгэн мэдүүлэн: – Харагты, манай эзэндэ мэндэ хүргэхэеэ элһэн сүл губиһаа элшэнэрые Давидай эльгээхэдэнь, манай эзэн тэдэниие хараагаа.

¹⁵ Харин тэдэ зон бидэндэ ехэ һайнаар хандажа, бидэниие гомдохоогоогүй, мүн бидэнэй тэдэнтэй хамта хээрэ талада байхада маанадай юуншье үгы болоогүй.

¹⁶ Тэдэнэй хажууда хони адуулжа байха үедэмнай тэдэнэр үдэршье, һүнишье бидэндэ хана халхабша мэтэ болон байгаа бэлэй.

¹⁷ Тиимэһээ одоо та юу хэхэеэ бодожо хаража мэдэгты. Юуб гэхэдэ, манай эзэниие болон бүхы гэр бүлыень гай зоболонгой дайрахань дамжаггүй. Эзэн болбол өөдэгүй зантай һэн тула хэншье тэрээнтэй хөөрэлдэжэ шадахагүй, – гэбэ.

¹⁸ Абигааһил хоёр зуун хилээмэ, хоёр тулам үзэмэй дараһан архи, гаргажа бэлдээтэй табан хони, табан сатаа хуураһан орооһо, зуун боолто үзэм, хоёр зуун багса инжир яаралтай абажа, тэдэнээ элжэгэнүүдтэ ашаба.

¹⁹ Тэрэ өөрынгөө зарасанарта: – Минии урда ябагты. Би таанарай хойноһоо ошохоб, – гэбэ. Тэрэ эхэнэр Набаал үбгэндөө юушье хэлээгүй һэн.

²⁰ Тэрэнэй элжэгээ унаад, уулын хотируу зүргөөр доошоо буужа байха үедэ Давид болон тэрэнэй хүнүүд урдаһаань ерэжэ ябаба. Иигэжэ тэдэ уулзаа бэлэй.

²¹ Давид: – Би элһэн сүл губида тэрэ хүнэй бүхы зөөри дэмы харууһалааб. Тэрэнэй юумэнһээ юуншье үгы болоогүй бэлэй. Тэрэ намда һайниие муугаар харюулба.

²² Хэрбээ үглөө болотор улад зонһоонь гансашье эрэ хүниие үлөөбэлни, Бурхан намайе, Давидые, хэһээхэнь болтогой! – гэжэ өөртөө үгүүлэн ябажа байгаа.

²³ Абигааһил Давидые харамсаараа яаралтай элжэгэнһээ буужа, Давидай урда унан мүргэбэ.

²⁴ Тэрэ Давидай хүлдэ унажа: – Минии эзэн, би зэмэтэйб. Шэбэгшынгээ танда хандахыень зүбшөөгыт! Шэбэгшынгээ үгэ дуулыт!

²⁵ Тэрэ муу хүн Набаалые минии эзэн бү анхараг. Юуб гэхэдэ, тэрэ өөрынгөө нэрэтэй адли хүн ха юм. Тэрэнэй нэрэнь Набаал, тэнэг байха гээшэ тэрээнтэй хамта ха юм. Харин танай шэбэгшэ би эзэнэйнгээ эльгээһэн залуушуулые хараагүй байгааб.

²⁶ Мүнөө, минии эзэн, Эзэнэй нэрээр болон танай ами наһаар тангариглая. Эзэн таниие шуһа урдахуулхаһаа, үһөөгөө абахаһаа тогтоог лэ. Танай дайсад, минии эзэндэ хоро хүсэгшэд Набаалтай адли болохонь болтогой!

²⁷ Танай шэбэгшэ өөрынгөө эзэндэ энэ бэлэг асараа, эзэнтэймни хамта ябаһан залуушуулда үгэнэб.

²⁸ Шэбэгшынгээ гэм зэмые хүлисыт. Эзэн заабол минии эзэнэй уг удам шанга болгохо, юуб гэхэдэ, минии эзэн Эзэнэй дайн дажарые ябуулна. Мүндэлһэн сагһаа эхилжэ, та муу юумэ хээгүйт, хэхэшьегүйт!

²⁹ Хэрбээ хэн нэгэн хүнэй бодожо, таниие мүрдэжэ, алахаяа бэдэрээ һаань, минии эзэнэй амиие танай Эзэн Бурхан ами наһанай уутада хэжэ уяха болоно. Харин дайсадайтнай амиие Эзэн шулуу дүүгүүртэ хэжэ шэдэһэндэл адли болгохо юм.

³⁰ Эзэн тан тухай һайнаар айладаһан бүхы юумэеэ дүүргэжэ, Израилиин ударидагшаар таниие томилходо,

³¹ дэмы шуһа урдахуулжа, үһөөгөө абахаһаа бэеэ бариһан тула энэ ушар хадаа минии эзэнэй зүрхэ сэдьхэлдэ тодхор болон гашуудал болохогүй. Эзэнэй минии эзэндэ һайн һайханиие хэхэдэ, өөрынгөө шэбэгшые ой ухаандаа оруулхат, – гэжэ хэлэбэ.

³² Давид Абигааһилда: – Мүнөөдэр шамайе намтай уулзуулхаар ябуулһан Израилиин Эзэн Бурхан үреэл магтаалтай!

³³ Мүн шинии һаруул ухаан магтаалтай! Намайе мүнөөдэр шуһа урдахуулхаһаа болон үһөөгөө абахаһаа болюулһан ши үреэл магтаалтайш!

³⁴ Намайе шамда хоро хэхэһээ болюулһан Израилиин Эзэн Бурханай нэрээр тангаригланаб, хэрбээ намтай уулзахаяа шинии яаража, урдаһаамни ерээгүй һаашни, үнэхөөр үүр сайтар Набаалай гансашье эрэ хүн үлэхэгүй һэн, – гэжэ хэлэбэ.

³⁵ Иигэжэ Давид Абигааһилай гарһаа асарһан юумыень абаад: – Гэртээ амгалан тайбан бусаарай. Зай, би шинии хэлэһые дуулааб, шинии гуйлтые дүүргэхэб, – гэбэ.

³⁶ Тиигээд Абигааһилай Набаалда бусажа ерэхэдэ, Набаал гэртээ хаанай найр шэнги найр хэжэ байба. Набаалай ехэ һогтуу байһан тула сэдьхэлынь сэнгүү байгаа. Абигааһил үүр сайтар тэрээндэ юушье хэлэбэгүй.

³⁷ Харин үглөө болоходонь, Набаалай элүүр болоходо, һамганиинь тэрээндэ энээн тухай хөөрэбэ. Теэд Набаалай зүрхэн хүмэрижэ, тэрэ саа үбшэндэ нэрбэгдэн, шулуун мэтэ болобо.

³⁸ Арбаад хоногой удаа Эзэн Набаалые дайража, тэрэ наһа бараа һэн.

³⁹ Давид Набаалай наһа бараһые дуулаад: – Набаалда доромжолуулһан минии түлөө үһөө абаһан, Өөрын богоолоо муу юумэнһээ зайлуулһан Эзэн магтаалтай! Эзэн Набаалай нүгэлые өөртэнь харюулба, – гэбэ. Тиигээд Давид Абигааһилые өөрынгөө һамган болгон абаха тухайгаа тэрээндэ мэдүүлжэ, хүниие эльгээбэ.

⁴⁰ Давидай зарасанар Кармээл руу Абигааһилда ерэжэ, тэрээндэ: – Давид шамайе һамган болгон абахын тула бидэниие эльгээгээ, – гэжэ хэлэбэ.

⁴¹ Тэрэ эхэнэр бодожо, нюураараа газар хүрэтэр мүргэн: – Харагты, танай шэбэгшэ эзэнэйнгээ зарасанарай хүл угаахаар бэлэн, – гэбэ.

⁴² Абигааһил яаралтай бодожо, элжэгэ унаад, табан шэбэгшэнэртэеэ хамта Давидай элшэнэрэй хойноһоо ябан ошожо, Давидай һамган болобо.

⁴³ Давид мүн лэ Езрээлэй Ахинооһамые һамга абаа, тэдэ хоюулаа Давидай һамгад болоо һэн.

⁴⁴ Саул Давидай һамган, өөрынгөө басаган Михаалые Галлиим нютагай Лааһишай хүбүүн Палтиида үгөө бэлэй.