1 Хаан түрэнүүд 21 - Библи

Давид Саулһаа тэрьедэнэ

¹ Давид Нооб руу Ахимээлэх санаартанда ошобо. Ахимээлэх Давидтай уулзахадаа, һалганан айжа, тэрээндэ: – Юундэ ши хэнтэйшье бэшэ, гансаараабши? – гэжэ асууба.

² Давид Ахимээлэх санаартанда: – Хаан намда нэгэ хэрэг даалгажа, иигэжэ хэлээ: «Минии шамайе эльгээһэн, даалгаһан хэрэг тухаймни хэндэшье хэлэжэ болохогүй». Би зоноо нэгэ газарта орхёод ерээб.

³ Зай, даб гээд үгэжэрхихөөр бэлэн юун шамда байнаб – табан хилээмэншье һаань, олдоһон юумэ намда үгэ, – гэбэ.

⁴ Санаартан Давидта харюусажа: – Намда юрэ бусын хилээмэн үгы. Гэбэшье арюудхаһан хилээмэн бии. Һаяар эхэнэрнүүдтэй унтаагүй эрэшүүл эдижэ болохо, – гэбэ.

⁵ Давид санаартанда харюусан: – Гараһанһаамнай хойшо мүнөө хүрэтэр эхэнэрнүүд маанадтай байгаагүй. Сэрэгшэдэй бэень бузартаагүй. Хэрэг үүргэмнай мүнөө хүндэ, тиимэһээ эхэнэрнүүд тухай һанаха сүлөө үгы, – гэжэ хэлэбэ.

⁶ Тиигээд санаартан тэрээндэ арюудхаһан хилээмэ үгэбэ. Тэрэниие Эзэнэй үмэнэһөө абаад үгөө, орондонь Эзэнэй урда халуун хилээмэ табиха ёһотой бэлэй. Энээнһээ бэшэ ондоо хилээмэн тэрээндэ байгаагүй бшуу.

⁷ Тэрэ үдэр Саулай зарасанарай нэгэн тэндэ Эзэнэй урда байгаа бэлэй. Тэрэ эдоом хүн, нэрэнь Доһээг. Тэрэ хадаа Саулай хонишодой ахалагшань һэн.

⁸ Давид Ахимээлэхтэ: – Даб гээд үгэмөөр жада, һэлмэ танда үгы гү? Би өөрынгөө һэлмэ, ондоо зэр зэбсэгээшье абаагүйб, юуб гэхэдэ, хаанай даабаринь яаралтай байгаа, – гэбэ.

⁹ Санаартан: – Элаагай хүндыдэ танай алаһан пилишт хүн Голиафай һэлмэ бии. Тэрэ эфодой саана, хубсаһанда орёолтотой байна. Хэрбээ һанаа һаа, тэрэниие өөртөө абагты. Эндэ тэрээнһээ ондоо юумэн байхагүй, – гэбэ. Давид: – Тэрээнһээ дээрэ һэлмэ байхагүй. Тэрэниие намда үгэ, – гээ һэн.

Давид пилиштүүдтэ Гаат ерэнэ

¹⁰ Иигээд Давид зэһэжэ, тэрэ үдэр Саулһаа зугадан, Гаадай хаан Ахиишта ошобо.

¹¹ Ахиишта зарасанарынь: – Энэ хүн тэрэ нютаг ороной Давид хаан гэдэгынь бэшэ гү? Тэрээн тухай «Саул мянгые алажа, Давид үй түмэниие алаба» гэжэ дуулан бүжэглөө һэн бэшэ гү? – гэлдэбэ.

¹² Давид эдэ үгэнүүдые шагнан түбэгшөөжэ, Гаадай хаан Ахиишһаа ехэ һүрдэбэ.

¹³ Тэрэ тэдээнһээ һаруул ухаагаа нюужа, ухаа муутай хүн мэтэ болон, хотын хаалга үүдэнүүдые сараалан зуража, һахал руугаа шүлһөө гоожуулан байба.

¹⁴ Ахииш зарасанартаа: – Харана гүт, тэрэ ухаа муутай хүн. Юундэ тэрэниие намда асараабта?

¹⁵ Намайе ухаа муутай хүнөөр дуталдаа гээд иимэ хүнэй ааша үзэхыемни минии урда тэрэниие асараа гүт?! Энэ хүниие гэртэмни оруулха гээ гүт?! – гэжэ зандарба.