1 Хаан түрэнүүд 18 - Библи

Давид Ёнатаан хоёр нүхэсэнэ

¹ Давидай Саултай хөөрэлдэжэ дүүргэхэдэ, Ёнатаан тэрээнтэй танилсан нүхэсэбэ, тиигээд өөртөө мэтээр Давидта угаа ехээр хайра дуратай болобо.

² Саул тэрэ үдэрһөө Давидые хажуудаа байлгажа, эсэгынь гэртэ табяагүй бэлэй.

³ Ёнатаан Давидта өөртөө мэтээр дурлаһан тула Давидтай хэлсээ баталба.

⁴ Тэрэ үмдэжэ байһан гадар хубсаһаяа тайлажа, мүн хуягаа, һэлмэеэшье, һурша номоошье, бүһэеэшье Давидта үгэбэ.

⁵ Иигэжэ Давид Саулай эльгээһэн газар бүридэнь ябажа, амжалта туйладаг байгаа. Саул тэрэниие сэрэгэй ноён болгобо. Энэнь бүхы арад түмэндэ болон Саулай зарасанарта һайшаагдаа бэлэй.

Саул Давидта атаархана

⁶ Давидай үнөөхи пилишт хүниие усадхаһанай һүүлээр бүгэдөөрөө бусан ерэжэ ябахадань, эхэнэрнүүд Израилиин бүхы хотонуудһаа гаража, хэнгэрэг, хэсэ дуугарган, дуу дуулажа, хатаржа, баяртайгаар Саул хааниие угтаба.

⁷ Эхэнэрнүүд хүгжэм наадан: – Саул мянган хүниие алажа, Давид түмэниие алаба, – гэжэ дуулалдаба.

⁸ Тиихэдэнь энэ үгын Саулай дура гутааһан тула тэрэ ехэ уурлан: – Давидта түмэниие үгэжэ, намда мянгые үгэбэ. Тэрээндэ гансал хаан түрэ дуталдана бэшэ гү? – гэжэ хэлэбэ.

⁹ Тэрэ үдэрһөө хойшо Саул Давидые һэжэглэн харадаг болобо.

¹⁰ Үглөөдэрынь Бурханһаа ерэһэн муу һүлдэ Саулые хүсэтэй дайража, Давидай урдандаал адли ятаг гартаа абажа, наадажа байхадань, Саул гэр соогоо галзууржа байгаа. Тэрэнэй гартань жада байгаа һэн.

¹¹ Тэрэ «Давидые ханада хадахам» гэжэ һанаад, жада шэдэбэ. Теэд Давид тэрээнһээ хоёр удаа зайлаба.

¹² Саул Давидһаа айжа эхилбэ. Юуб гэхэдэ, Эзэн Саулһаа зайлажа, Давидтай хамта байгаа.

¹³ Тиимэһээ Саул Давидые өөрһөө холодуулжа, мянган сэрэгэй даргаар табиба. Давид зониие байлдаануудта ударидан ябаа.

¹⁴ Эзэнэй Давидтай хамта байһан ушарһаа тэрэ бүхы хэрэгүүдтээ амжалта туйлагша һэн.

¹⁵ Давидай амжалта туйлажа байһые хаража, Саул тэрээнһээ угаа ехээр айжа байгаа.

¹⁶ Харин бүхы Израиль болон Иуда Давидта дуратай һэн. Юуб гэхэдэ, тэрэ илалта туйладаг бэрхэ жанжин байгаа.

Давид Саулай басага һамга абана

¹⁷ Саул Давидта: – Энэ хадаа минии ехэ басаган Мэрааб. Тэрэниие шамда һамган болгон үгэхэб. Гансал минии түлөө зоригтой байжа, Эзэнэй байлдаануудта тулалда, – гэбэ. Ушарынь гэхэдэ, Саул «Минии гарһаа бэшэ, харин пилиштүүдэй гарһаа Давид хосорог» гэжэ һанаа бэлэй.

¹⁸ Гэбэшье Давид Саулда: – Би хэн гээшэбиб? Минии ами наһан, эсэгымни гэр бүлэшье Израильда юун гээшэб? Би яажа хаанай хүрьгэн болохобиб? – гэбэ.

¹⁹ Саулай басаган Мэраабые Давидта үгэхэ сагай ерэхэдэнь, тэрэниие Мэхолаадай Адриһээлдэ һамган болгон үгэбэ.

²⁰ Теэд Саулай нүгөө басаган Михаал Давидта дуратай болобо. Энээн тухай Саулда мэдээжэ болоходонь, тэрэ дуратай байба.

²¹ Саул: «Михаал Давидта урьха болохо, пилиштүүдэй гарһаа тэрэнэй хосорхын тула Михаалые тэрээндэ үгэхэмни», – гэжэ бодобо. Тиимэһээ Саул Давидта: – Мүнөө ши хүрьгэмни болохо хоёрдохи арга боломжотойш, – гэбэ.

²² Тиигээд Саул зарасанартаа: – Давидта нюусаар хөөрэлдэжэ, иигэжэ хэлэгты: «Харагты. Хаан танда талархай, зарасанаршье бултадаа танда дуратай. Тиимэһээ хаанай хүрьгэн бологты» гэгты, – гэжэ захирба.

²³ Иигэжэ Саулай зарасанар бүхы эдэ үгэнүүдые Давидта дуулгаба. Гэбэшье Давид: – Би үгытэйб, һайн угайшье хүн бэшэб. Иимэ хүндэ хаанай хүрьгэн болохонь хүнгэн гээд һанана гүт? – гэбэ.

²⁴ Саулай зарасанар Давидай хэлэһэн үгэнүүдые Саулда дуулгаба.

²⁵ Тиихэдэнь Саул: – Таанад Давидта иигэжэ хэлэгты: «Хаан дайсадһаа үһөөгөө абахын тула зуун пилишт хүнэй отологдоһон бэлгэнүүдһээ бэшэ юушье энжэ болгон абахаяа һананагүй» гэгты, – гэбэ. Саул Давидые пилиштүүдэй гараар алахые бодожо байгаа.

²⁶ Саулай зарасанарай эдэ үгэнүүдые Давидта дуулгахадань, хаанай хүрьгэн болохо энэ боломжо тэрээндэ һайшаагдаба.

²⁷ Тогтооһон хугасаагай үнгэрөөдүй байхада Давид бодожо, хүнүүдтэйгээ хамта ябажа, пилиштүүдэй дундаһаа хоёр зуун хүниие сохижо алаа һэн. Давид тэдэнэй бэлгын арһа асаржа, хаанай хүрьгэн болохын тула тэдэниие тоо ёһоорнь хаанда үгэбэ. Иигэжэ Саул Михаал басагаяа Давидта һамган болгожо үгөө бэлэй.

²⁸ Эзэнэй Давидтай хамта байһые, мүн өөрынь басаган Михаалай Давидта дуратайе Саул хаража мэдээд,

²⁹ Давидһаа улам ехээр айба. Бүхэли наһандаа Саул Давидай дайсан болобо.

³⁰ Пилиштүүдэй ноёдой дайлалдахаар ерэхэдэ, Давид Саулай бүхы сэрэгэй түшэмэлнүүдһээ үлүү амжалтануудые туйлан, тэрэнэй нэрэнь улам ехээр алдаршаба.