1 Хаан түрэнүүд 15 - Библи

Амалээгүүдтэй байлдаан

¹ Самуил Саулда: – Шамайе Өөрын арад түмэн болохо Израилиин хаан болгон, тоһо түрхижэ, ёһолол хэхые Эзэн намайе эльгээгээ. Тиимэһээ мүнөө Эзэнэй зарлиг шагна.

² Түмэн Сэрэгтэ Эзэн иигэжэ айладхажа байна: «Египедһээ гараха замдань Израильда Амалээгэй добтолһон ушар Би һананаб.

³ Мүнөө ши ошожо, амалээгүүдые бута сохин, тэдэнэй хамаг юумые усадха, бү хайрла. Эрэ, эмые, нарай нялха хүүгэдыньшье, үхэр ба хони, тэмээ ба элжэгыень бултыень хюда» гэнэ, – гэбэ.

⁴ Тиигээд Саул арад түмэнөө дуудажа, Тэлаһиимдэ тэдэниие тоолоходонь, хоёр зуу мянган ябаган сэрэг, үшөө Иудын арба мянган сэрэг байба.

⁵ Саул Амалээг гэгшын хотодо дүтэлжэ, талада амадан хүлеэбэ.

⁶ Саул хээнүүдтэ: – Ошогты, минии таанарые тэдэнтэй хамта һалгаахагүйн тула амалээгүүдэй дундаһаа һалан ябагты. Юуб гэхэдэ, таанад Израилиин арад зоной Египедһээ гараад ябаха үедэ тэдээндэ энэрилтэйгээр хандаа бэлэйт, – гэбэ. Тиигэжэ хээнүүд амалээгүүдэй дундаһаа һалажа ябаба.

⁷ Саул Хавилааһаа Египедэй хилын хажууда байһан Шүүр хүрэтэр амалээгүүдые бута сохибо.

⁸ Тиигээд амалээгүүдэй хаан Агаагые амидыгаар олзолон барижа, арад зонииень бултыень һэлмын эреэр сабшан һалгааба.

⁹ Теэд Саул ба тэрэнэй арад зон Агаагые болон эгээл һайн хони, үхэр, тарган тугал, хурьга, юрэдөө, бүхы сэнтэй юумэ хайрлажа, тэрэ зандань үлөөбэ. Харин тэдэ хэрэггүй, үнэ сэнгүй зүйлнүүдые усадхаба.

Самуил Саулда алдууень заана

¹⁰ Тэрэ үедэ Самуилда Эзэн иигэжэ айладаба:

¹¹ – Би Саулые хаан болгоһондоо халагланаб. Юуб гэхэдэ, тэрэ Намһаа эрьежэ, Минии захяа заабари дүүргэбэгүй, – гэжэ дуулдаба. Самуил уур сухал боложо, бүхэли һүниндөө Эзэндэ зальбаран мүргөө һэн.

¹² Эртэ үглөө Самуил бодоод, Саултай уулзахаяа ошобо. Зон Самуилда: – Саул Кармээлдэ ерэжэ, тэндэ өөрын хүндэдэ хүшөө бодхоогоо. Тэндэһээ эрьежэ, Гилгаал руу ябаа, – гэжэ хэлэбэ.

¹³ Самуилай Саулда ошоходонь, Саул тэрээндэ: – Эзэн таниие буян хэшэгтэ хүртөөхэнь болтогой! Би Эзэнэй захяа заабари бэелүүлээб, – гэбэ.

¹⁴ Харин Самуил: – Минии шэхэндэ хонидой маараан, намда дуулдажа байгаа үхэрэй мөөрөөн – энэ юун бэ? – гэбэ.

¹⁵ Саул: – Тэдэ амалээгүүдһээ асарагдаһан юм. Юуб гэхэдэ, зон хони, үхэрэй эгээл һайнииень үлөөгөө, Эзэн Бурхандатнай үргэхөө тиигээ. Гэбэшье байһан бусадыень усадхаабди, – гэбэ.

¹⁶ Самуил Саулда: – Хүрөө, болоо! Энэ һүни Эзэнэй намда юун гэжэ айладхаһые шамда дуулгахамни, – гэбэ. Саул тэрээндэ: – Хэлэгты, – гээ ха.

¹⁷ Самуил: – Ши өөрыгөө бишыханаар хэды һанажа байбашье, Израилиин обогуудай ударидагша болоо бэшэ гүш? Эзэн шамайе Израилиин хаан болгожо, тоһолоо бэлэй.

¹⁸ Эзэн аян замда шамайе эльгээн, «ошо, нүгэлтэ амалээгүүдые усадхан, үгы болоторынь тулалда» гээ.

¹⁹ Ши юундэ Эзэнэй үгыень дуулаагүйбши, олзо шүүрэн абажа, Эзэнэй урда бузар мууе хээбши? – гэбэ.

²⁰ Саул Самуилда: – Би Эзэнэй үгыень дуулааб. Эзэнэй эльгээһэн аян замаар ябааб. Би Амалээгэй хаан Агаагые олзолон асарааб, амалээгүүдые бүримүһэн усадхааб.

²¹ Гэбэшье арад зон Гилгаалда танай Эзэн Бурханда үргэл үргэхын тула усадхагдаха юумэнүүдһээ эрхим хони, үхэр абажа асараа һэн, – гэбэ.

²² Самуил: – Эзэнэй үгэ дуулахань Эзэндэ түгэс шатаалта үргэл, мүн үргэлнүүдые хэжэ баярлуулхаһаа дээрэ бэшэ гү? Ойлго, үгэ дуулаха гээшэ үргэл үргэхэһөө дээрэ. Айладхаһаарнь байха гээшэ хусын өөхэнһөө үлүү.

²³ Юуб гэхэдэ, тэршэлхэ гээшэ эди шэдиин нүгэлтэй адли. Һөөргэдэхэ гээшэ онгондо мүргэхэтэй адли. Эзэнэй үгэһөө шинии татагасаһан тула Эзэн мүн лэ шамайе хаан байлгахаһаа татагасаа, – гэжэ үгүүлбэ.

²⁴ Саул Самуилда: – Би нүгэл хээб. Арад зонһоо айжа, үгыень дуулажа, Эзэнэй захиралта ба танай үгые дүүргээгүйб.

²⁵ Хүлисыт даа минии нүгэл! Эзэндэ мүргэхымни тула намтай хамта бусыт даа! – гэбэ.

²⁶ Гэбэшье Самуил Саулда: – Би шамтай хамта бусахагүйб. Юуб гэхэдэ, ши Эзэнэй үгэһөө татагасааш, мүн Эзэншье шамайе Израилиин хаан байлгахаһаа татагасаа, – гэбэ.

²⁷ Самуил ябаха тээшээ эрьебэ, теэд Саул Самуилай дэгэлэй хормойһоо аһалдаад, таһалжархиба.

²⁸ Самуил тэрээндэ: – Эзэн мүнөөдэр шамһаа Израилиин хаан түрэ таһалан абаа, тэрэниие шамһаа үлүү хүндэ үгэбэ.

²⁹ Юрэдөө, Израилиин Мүнхэ Бурхан айладхаһан үгэеэ эбдэдэггүй, хэһэн хэрэг тухайгаа гэмшэдэггүй. Юуб гэхэдэ, Тэрэ хүнтэй адли бэшэ, гэмшэхэ бэшэ, – гэбэ.

³⁰ Саул: – Би нүгэл хээб. Гэбэшье мүнөө минии арад зоной аха захатанай болон Израилиин урда намайе хүндэлыт даа, намтай хамта бусыт. Би Эзэн Бурхандатнай һүгэдэн мүргэхэмни, – гэжэ гуйба.

³¹ Тиигээд Самуил Саулай хойноһоо дахан бусаба. Саул Эзэндэ һүгэдэн мүргөө һэн.

³² Тэрэнэй удаа Самуил: – Амалээгүүдэй хаан Агаагые намда асарагты, – гэбэ. Гэнжэтэй Агааг «Үхэлэй зоболон үнэхөөр лэ үнгэрөө» гэжэ досоогоо бодон, тэрээндэ дүтэлбэ.

³³ Самуил: – Шинии һэлмын эхэнэрнүүдые үхи хүүгэдгүй болгоһондол адли, эхэнэрнүүдэй дундаһаа шинии эхэ хүүгэдгүй болог лэ, – гэжэ дуугарба. Тиигээд Самуил Агаагые Эзэнэй урда Гилгаалда таһа сабшаа һэн.

³⁴ Самуил Рамаа руу ябажа, харин Саул өөрынгөө байдаг Гибаадахи гэр руугаа бусаба.

³⁵ Самуил наһа бараха үдэр хүрэтэрөө Саулые дахин хараагүй, юундэб гэхэдэ, Самуил Саул тухай ехэ гашуудажа байгаа. Эзэншье Саулые Израилиин хаан болгоһондоо гэмшээ.