1 Хаан түрэнүүд 14 - Библи

Ёнатаанай габьяа

¹ Нэгэ үдэр Саулай хүбүүн Ёнатаан зэр зэбсэгынь баряад ябагша залуу хүбүүндээ: – Ябая, хадын жалгые гаталан, нүгөө талада байһан пилиштүүдэй сэрэгэй бүлэг руу ошоё, – гэжэ хэлэбэ. Харин энээн тухай Ёнатаан эсэгэдээ дуулгабагүй.

² Саул Гибаагай захада, Мигроондохи анар модон доро байгаа. Тэрээнтэй хамта зургаан зуу шахуу зон байлсаа.

³ Тэдэнэй тоодо Ахияа санаартан байлсаа. Тэрэ Ахитуубай хүбүүн һэн. Ахитууб хадаа Ихабоодой дүү болоно. Ихабоод Шилоодо Эзэнэй санаартан байһан Элиин гуша, Пинэһаасай хүбүүн бэлэй. Ёнатаанай ошоһон тухай зон мэдээгүй байгаа.

⁴ Пилиштүүдэй сэрэгэй бүлэгтэ Ёнатаанай дүтэлхэ гэһэн хадын хабшалай хоёр талаар ёдогор хабсагайнууд байдаг байгаа. Нэгэнэйнь нэрэ Боцээц, нүгөөдынь нэрэ Сээнээ бэлэй.

⁵ Нэгэ хабсагайнь Михмааш тээшэ, хойто зүг руу, нүгөөдэ хабсагай Гээбэ тээшэ, урда зүг руу харанхай һэн.

⁶ Ёнатаан зэр зэбсэг баряад ябагша хүбүүндээ: – Ябая. Бэлгэеэ отолуулаагүйшүүлэй сэрэгэй бүлэг руу дүтэлэн ошоё. Эзэн бидэндэ туһалжа магад. Олоншье, үсөөншье зониие абархадань Эзэндэ һаалта болохо юумэн үгы, – гэжэ хэлэбэ.

⁷ Зэр зэбсэг баряад ябагша хүбүүн: – Һанаһаараал юумэ хэгты. Ябагты, би танай ябаһан тээшэ тантай хамта ябалсахаб, – гэбэ.

⁸ Ёнатаан: – Ойлгоорой, тэдэ хүнүүд руу ошоходомнай тэдэ маанадые хараха.

⁹ Хэрбээ тэдэнэй бидэндэ «зогсогты, маанадай дүтэлтэр хүлеэгты» гэбэл, бидэ зогсожо, тэдээн руу үгсэхэгүйбди.

¹⁰ Хэрбээ тэдэнэй «маанад руу ерэгты» гэбэл, бидэ үгсэн ошохобди. Юуб гэхэдэ, энэ хадаа Эзэн тэдэниие манай гарта үгөө гэһэн дүлгэ тэмдэг бидэндэ болохо, – гэжэ хэлэбэ.

¹¹ Тэдэ хоёрой пилиштүүдэй сэрэгэй бүлэгтэ өөрыгөө харуулхадань, пилиштүүд: – Харагты, еврейнүүд хоргодожо байһан нүхэнүүдһээ гаража байна, – гэлдэбэ.

¹² Сэрэгэй бүлэгэй зон Ёнатаанда ба зэр зэбсэг баригша хүбүүндэ: – Маанад руу ерэгты! Бидэ таанарта нэгэ юумэ хэлэхэбди, – гэжэ хашхаралдаба. Ёнатаан зэр зэбсэг баригшадаа: – Намайе дахаад яба. Юуб гэбэл, Эзэн тэдэниие Израилиин гарта үгэбэ гээшэ, – гэбэ.

¹³ Тиигээд Ёнатаан гар, хүлөөрөө аһалдан, дээшээ абирба, тэрэнэй зэр зэбсэг баригша хүбүүн араһаань дахаба. Пилиштүүд Ёнатаанда хюдагдан, урдуурнь унажа, зэр зэбсэг баригша хүбүүн араһаань эсэслэн усадхан ябаба.

¹⁴ Эхин энэ сохилтодо Ёнатаан зэр зэбсэг баряаша хүбүүнтэеэ хамта альганай шэнээн гэхээр багахан газарта хорин хүниие алаба.

¹⁵ Хотон хүреэндэшье, таладашье, бүхы сэрэгэй дунда һүрдөөн болоо бэлэй. Сэрэгэй бүлэг болон хюдагша бүлэгүүд шэшэржэ, мүн газар доһолжо, Бурхан угаа ехэ һүрдөө эльгээ бэлэй.

Пилиштүүд диилдэбэ

¹⁶ Бэньямиинэй обогой газар дайдын Гибаада байгша Саулай харуулай харахада, тоо томшогүй зон таража бутаран, наашаа саашаа гүйлдэжэ байба.

¹⁷ Саул хамта байһан хүнүүдтээ: – Өөһэдыгөө тоологты. Бидэнэй дундаһаа хэнэй гаража ошоһые мэдэгты, – гэжэ хэлэбэ. Тэдэнэй өөһэдыгөө тоолоходо, Ёнатаан болон зэр зэбсэг баригша хүбүүниинь үгы байба.

¹⁸ Саул Ахияада: – Бурханай ханза асарагты, – гэбэ. Тэрэ үедэ Бурханай ханза Израилиин зонтой хамта байгаа.

¹⁹ Саулай санаартантай хөөрэлдэжэ байха үедэ пилиштүүдэй хотон хүреэндэхи үймөөн үргэлжэлэн, улам ехэ боложо байгаа. Саул санаартанда: – Зальбархаяа боли, гараа доошонь таби, – гэжэ хэлэбэ.

²⁰ Саул болон тэрээнтэй хамта байһан бүхы зон хашхаралдан, байлдаанай газар руу дабхиба. Тэндэ пилиштүүд угаа ехэ үймөө хэжэ, бэе бэеэ һэлмээр сабшажа байба.

²¹ Пилиштүүдтэй байһан, тэдэнэй түлөө дайлалдажа бэеэ хүлһэлэгшэ еврей зон Саул болон Ёнатаантай хамтаран, израильшуудай тала барин эрьебэ.

²² Эпрааимай хада уулата газарта хоргодожо байһан бүхы израильшууд пилиштүүдэй зугадажа байһан тухай дуулаад, хойноһоонь намнажа, хюдажа эхилбэ.

²³ Иигэжэ тэрэ үдэр Эзэн Израилиие абаржа, байлдаан Бэт-Аавэн хүрэтэр үргэлжэлөө һэн.

Байлдаанай һүүлээрхи үйлэ хэрэгүүд

²⁴ Тэрэ үдэр Израилиин эрэшүүл ехэ зүдэрөө. Саул арад зониие тангариглуулан: – Үдэшэ болотор, дайсадһаа минии үһөөгөө абатар хоол бариһан хэн нэгэн хараал шэнгээхэ болтогой! – гэбэ. Тиимэһээ хэншье эдеэ хоолһоо амсабагүй.

²⁵ Зоной бүгэдөөрөө ой руу ороходо, тэндэ газар дээрэ зүгын бал байба.

²⁶ Тэдэ ой руу ороод, зүгын балай урдажа байһые харабашье, нэгэшье хүн тэрээндэ гар хүрэжэ, гараа амандаа хэбэгүй. Юуб гэхэдэ, зон тангаригаа зүршэхэдэ бууха хараалһаа айжа байгаа.

²⁷ Харин эсэгынгээ арад зониие тангариглуулһые Ёнатаан шагнаагүй байгаа. Тиимэһээ гартаа бариһан модоной үзүүрые тэрэ зүгын балай һархинагта хэжэ, амандаа хэхэдээ, нюдэнь сэлмэбэ.

²⁸ Тэрээндэ арад зонһоо нэгэн: – Эсэгэтнай арад зониие хатуугаар тангариглуулан, «мүнөөдэр хоол бариһан хүн хараалда хүртэхэ» гэжэ хэлээ һэн. Зон иигэжэ эсээ, – гэбэ.

²⁹ Тиигээд Ёнатаан: – Минии эсэгэ гай тодхорто энэ уладые оруулаа. Энэ зүгын балһаа зааханиие эдихэдэмни минии нюдэд яажа сэлмээ гээшэб, харагты.

³⁰ Хэрбээ зоной мүнөөдэр дайсадһаа олзолһон олзоһоо эдеэ һаань, пилиштүүд үшөө ехээр алагдаха байгаа бэшэ гү?! – гэбэ.

³¹ Тэдэ тэрэ үдэртөө Михмаашһаа Аялоон хүрэтэр пилиштүүдые сохибо. Зон ядаржа ехэ эсээд байгаа.

³² Хүнүүд олзо юумэн руу шунахайран орожо, хони, үхэр, тугалнуудые барижа, газар дээрэ үүсэлжэ, шуһатайнь хамта эдижэ байба.

³³ Удаань Саулда: – Харагты. Зон шуһатайнь эдижэ, Эзэнэй урда нүгэл хэжэ байна, – гэжэ мэдээсэгдэбэ. Саул: – Таанар урбагшад гээшэт! Мүнөө нам руу томо шулуу мухарюулан асарагты, – гэбэ.

³⁴ Саул иигэжэ хэлэбэ: – Зоной дундуур ябажа, тэдээндэ: «Өөһэд өөһэдынгөө үхэр, хониие нам руу асаржа, эндэ тэдэниие үүсэлжэ эдигты. Шуһатайнь эдижэ, Эзэнэй урда нүгэл бү хэгты», – гэжэ хэлэгты. Иигэжэ бүхы зон тэрэ һүни тус тустаа өөрын үхэр асаржа, тэндэ үүсэлбэ.

³⁵ Саул Эзэндэ зорюулжа, үргэлэй шэрээ бодхообо. Энэнь Эзэндэ тэрэнэй зорюулан бодхооһон түрүүшын үргэлэй шэрээ бэлэй.

³⁶ Саул: – Һүниндөө пилиштүүдэй хойноһоо ябан добтолжо, үүр сайтар тэдээндэ добтолон, нэгэшье хүнииень бү үлөөе, – гэбэ. Зон: – Танай һанаһаар болог, – гэлдэбэ. Харин санаартан: – Эндэ Бурханһаа асууя, – гээд хэлэбэ.

³⁷ Саул Бурханһаа асуун: – Пилиштүүдэй хойноһоо ябажа мүрдэхэмни гү? Та тэдэниие Израилиин гарта үгэхэ гүт? – гээд һураба. Теэд Бурхан тэрэ үдэр Саулда харюусабагүй.

³⁸ Саул: – Арад түмэнэй ахалагшад, таанад бүгэдэ дүтэлэгты. Хэн мүнөөдэр нүгэл хээб гэжэ шалгажа мэдэгты.

³⁹ Израилиие абарһан Бурханай нэрээр тангаригланаб. Миниишье хүбүүн Ёнатаан хэһэн байгаа һаа, заабол үхэхэ ёһотой, – гэбэ. Арад зоной дундаһаа тэрээндэ харюусаха нэгэшье хүн байбагүй.

⁴⁰ Саул Израилиин бүхы зондо: – Таанад нэгэ талада зогсогты. Би өөрынгөө хүбүүн Ёнатаантай хамта нүгөө талада зогсохоб, – гэбэ. Улад зон Саулда: – Һанаһаараа юумэ хэгты, – гээ бэлэй.

⁴¹ Саул Израилиин Эзэн Бурханда: – Зэмэтэниие заажа үгыт, – гэбэ. Ёнатаан болон Саул заагдаба, арад зон сүлөө үлэбэ.

⁴² Тиигээд Саул: – Минии хүбүүн Ёнатаан бидэ хоёрой хоорондо жээрэб хаягты, – гэбэ. Жээрэбээр Ёнатаан шэлэгдэбэ.

⁴³ Саул Ёнатаанда: – Юу хэһэнээ намда хэлэ, – гэбэ. Ёнатаан тэрээндэ харюусажа: – Би бариһан модонойнгоо үзүүрээр зүгын бал зааханаар дүрэжэ, ама хүрөө һэм. Тиигээд үхэхэ ёһотойб, – гэжэ хэлэбэ.

⁴⁴ Саул: – Ёнатаан! Ши заабол үхэхэ ёһотойш. Энээниие гүйсэдхөөгүй һаамни, Бурхан намайе хэһээхэнь болтогой! – гэбэ.

⁴⁵ Гэбэшье арад зон Саулда: – Энэ агууехэ илалтые Израильда асарһан Ёнатаан үхэхэ гэжэ гү? Иигэжэ болохогүй. Эзэнэй нэрээр тангариглая. Тэрэнэй толгойһоо нэгэшье үһэн газарта унахагүй. Юуб гэхэдэ, тэрэ мүнөөдэр Бурхантай хамта энээниие үйлэдөө, – гэлсэбэ. Иигэжэ арад зон Ёнатааниие абаржа, тэрэ үхэбэгүй.

⁴⁶ Саул пилиштүүдые мүрдэхэеэ болижо, пилиштүүд нютаг руугаа ябаба.

⁴⁷ Саул Израилиин хаан болоһонһоо хойшо тойроод байһан бүхы дайсадтаяа: моһаабуудтай, аммоонуудтай, эдоомуудтай, Цобаагай хаашуултай, пилиштүүдтэй тулалдажа, хэнэйшье урдаһаа гарабал, амжалта туйладаг байба.

⁴⁸ Тэрэ эрэлхэг зориг гарган, амалээгүүдые усадхажа, Израилиие дээрмэдэлгэһээ абарба.

Саулай гэр бүлэ

⁴⁹ Саулай хүбүүд гэбэл, Ёнатаан, Ишвии, Малхишууһа бэлэй. Хоёр басагадайнь нэрэнүүд гэбэл, эгэшэнь Мэрааб, дүүнь Михаал бэлэй.

⁵⁰ Саулай һамганай нэрэ Ахинооһам, тэрэ Ахимаацай басаган һэн. Сэрэгэйнь даргын нэрэ Абнээр байгаа. Тэрэ Саулай абга Нээрэй хүбүүн һэн.

⁵¹ Саулай эсэгэ Кииш ба Абнээрэй эсэгэ Нээр Абиһээл гэгшын хүбүүд бэлэй.

⁵² Саулай амидарһан сагта пилиштүүдтэй шэрүүн тэмсэл үргэлжэлжэл байгаа. Зоригтой, шадалтай хүниие харабал, Саул тэрэниие өөрын сэрэгтэ абадаг байба.