1 Хаан түрэнүүд 13 - Библи

Пилиштүүдтэй дайн эхилбэ

¹ Саул гушатайдаа хаан шэрээдэ заларжа, хоёр жэл соо Израилиие зонхилбо.

² Тэрэ Израильһаа гурба мянган хүниие шэлэн абажа, хоёр мянганиинь тэрээнтэй хамта Михмаашта болон Бэт-Ээлэй хада уулата нютагта байба, нүгөөдэ нэгэ мянганиинь Ёнатаантай хамта Бэньямиинэй обогой газар дайдын Гибаада байба. Үлөөшэ зониие тэрэ гэр руунь эльгээбэ.

³ Ёнатаан Гээбэдэ байһан пилиштүүдэй харуулай бүлэг бута сохибо. Пилиштүүд энээн тухай дуулаба. Тиигэхэдэнь Саул бүхы орон дотор эбэр бүреэ үлеэн дуугаргажа: – Еврейнүүд шагнаг лэ! – гэбэ.

⁴ Пилиштүүдэй харуулай бүлэг Саулай бута сохиһон, мүн пилиштүүдэй Израилиие үзэн ядадаг болоһон тухай дуулахадаа, арад зон Гилгаалда байһан Саулда дуудагдан сугларба.

⁵ Пилиштүүд Израильтай дайлалдахаар сугларба: гуша мянган тэргэ, зургаа мянган морин сэрэг ба далайн эрьеын элһэн мэтэ тоо томшогүй ябаган сэрэг олон байгаа. Тэдэ ерэжэ, Бэт-Аавэнэй зүүн талада, Михмаашта хотон хүреэнээр тогтобо.

⁶ Израилиин улад зон хашуулһанаа мэдэжэ, аюулай ушарһые хараад, агы нүхэнүүдтэ, хадын хабшалаар, хабсагайн дундуур, газар дорохи нүхэн, худагуудаар хоргодобо.

⁷ Зарим еврейнүүд Иорданиие гаталжа, Гаад болон Галаадай нютагта ошобо. Харин Саул Гилгаалда байһаар лэ байгаа. Тэрээнтэй байһан бүхы зон айн шэшэржэ байгаа һэн.

Саул захяал заабариие эбдэнэ

⁸ Саул Самуилай хэлэһэн долоон хоног соо хүлеэбэ, теэд Самуил Гилгаалда ерэбэгүй. Зон Саулые орхин таража эхилбэ.

⁹ Иигэжэ Саул: – Түгэс шатаалта болон амгалан байдалай түлөө үргэлнүүдые намда асарагты, – гэжэ хэлэбэ. Тиигээд тэрэ түгэс шатаалта үргэл үргэбэ.

¹⁰ Түгэс шатаалта үргэл үргэжэ дүүргээд байхадань, Самуил ерэбэ. Саул тэрэниие угтан мэндэшэлхэеэ гараба.

¹¹ Харин Самуил: – Ши юу хээбши? – гэжэ асууба. Саул: – Улад зоной намайе орхижо, таража эхилһые, танайшье хэлэһэн хугасаадаа ерээгүйе, пилиштүүдэй Михмаашта сугларжа байһые би хараа һэм.

¹² Тиимэһээ би «Пилиштүүд мүнөө Гилгаалда минии урдаһаа дайлан ерэхэнь, харин би Эзэнһээ хайра гуйгаагүйб» гэжэ һанаад, түгэс шатаалта үргэл үргэхэеэ шиидээ һэм, – гэжэ харюусаба.

¹³ Самуил Саулда: – Ши бодолгүй юумэ үйлэдэбэш. Эзэн Бурханайнгаа шамда захиһан захяа заабариие дүүргээгүйш. Тиигээгүй һаашни, Эзэн одоо Израильда шинии хааншалал хэтэ мүнхэдөө бэхижүүлхэ бэлэйл.

¹⁴ Теэд мүнөө шинии хааншалал тогтохогүй. Эзэн Өөртөө Өөрынгөө һанаа сэдьхэлдэ таарама хүниие олохо, тэрэ хүндэ улад зоной ударидагша байхые захирха. Юуб гэхэдэ, Эзэнэй захирһан юумэ бэелүүлээгүйш, – гэбэ.

¹⁵ Самуил бодожо, Гилгаалһаа Бэньямиинэй обогой газар дайдын Гибаа руу ошобо. Саул өөртэйнь хамта байһан хүнүүдые тоолобо, зургаан зуугаад хүн байба.

¹⁶ Саул болон тэрэнэй хүбүүн Ёнатаан, мүн тэдэнтэй хамта байһан хүнүүд Бэньямиинэй обог зоной газар дайдын Гээбэдэ байба. Пилиштүүд Михмаашта хотон хүреэнээр байгаа һэн.

¹⁷ Пилиштүүдэй хотон хүреэнһөө гурбан бүлэг хюдагшад гараад, нэгэ бүлэгынь Опраа руу харгыгаар, Шуһаал газар руу шэглэбэ.

¹⁸ Нүгөөдэ бүлэгынь Бэт-Һороон руу шэглэбэ, гурбадахи бүлэг элһэн сүл губидахи Цэбоһиим нюруугай хилэ руу шэглээ һэн.

¹⁹ Израилиин бүхы нютагуудта хаанашье түмэршэ дархан байдаггүй бэлэй. Юуб гэхэдэ, еврейнүүд һэлмэ, жада хэжэ болохо гэжэ пилиштүүд түбэгшөөдэг байгаа.

²⁰ Тиимэһээ бүхы Израиль анзаһа, түмэр хүрзэ, һүхэ, хадуураа хурсадуулхын тула пилиштүүд руу ошохо ёһотой байгаа.

²¹ Анзаһа, түмэр хүрзэ, аса, һүхэ, мүн хадхуур заһахын тула ехэ үнэтэй үнэ сэн – шээкэлэй гурбанай хоёр хуби тус тустань түлэхэ хэрэгтэй һэн.

²² Тиимэһээ байлдаанай үдэр Саул болон Ёнатаантай хамта байһан арад зоной хэнэйньшье гарта һэлмэ, жада байбагүй. Гансал Саул болон тэрэнэй хүбүүн Ёнатаанда байгаа.

²³ Пилиштүүдэй сэрэгэй бүлэг Михмааш гаталхаяа гаража ерээ бэлэй.