1 Хаан түрэнүүд 12 - Библи

Самуил улад зондо хандана

¹ Самуил бүхы Израильда хандан: – Харагты. Би таанарай намда хэлэһэн бүхы юумые шагнаад, үгыетнай дуулажа, таанад дээрэ хааниие томилон табяаб.

² Мүнөө таанарта хаан алба хэжэ ябана. Харин би үбгэрөөб, үһэмни сайгаа. Минии хүбүүд таанартай хамта байна. Би эдир наһанһаа хойшо энэ үдэр хүрэтэр таанадта алба хэжэ ябааб.

³ Мүнөө эндэ улаан нюураараа урдатнай байхадамни Эзэнэй урда болон тоһо түрхин томилһон хүнэйнь урда намда хэлэгты. Би хэнэй үхэр буляажа абаабиб? Хэнэй элжэгэ абаабиб? Хэниие дарлаа, зобоогообиб? Хэнһээ эдилгэ абаад, юумэ мэдээшэгүй болоод байгаабиб? Хэрбээ тиимэ юумэн байгаа һаань, би таанадта бултыень бусаахаб, – гэбэ.

⁴ Тэдэ: – Та маанадые дарлаагүйт, зобоогоогүйт, хэнэйшье гарһаа юушье абаагүйт, – гэбэ.

⁵ Самуил тэдээндэ: – Таанарай намда ямаршье гэм зэмэ олоогүй тухай Эзэн мүнөөдэр таанадай дунда гэршэ боложо, Тэрэнэй тоһо түрхин арюудхаһан хүн мүн лэ гэршэ боложо байна, – гэхэдэнь, тэдэ: – Тэрэ болбол гэршэ мүн! – гэлдэбэ.

⁶ Тиихэдэнь Самуил арад зондо: – Моисей, мүн Аһароониие томилһон, таанадай үбгэ эсэгэнэрые Египедһээ гаргаһан Эзэн гэршэ мүн.

⁷ Тиимэһээ мүнөө бодогты. Таанарта болон танай үбгэ эсэгэнэртэ Эзэнэй хэһэн бүхы үршөөл хайра тухай би Тэрэнэй урда таанадтай заргалдахамни.

⁸ Яковай Египедтэ ерэхэдэ, танай үбгэ эсэгэнэрэй Эзэндэ хашхаран байжа мүргэхэдэ, Эзэн Моисей болон Аһароониие эльгээжэ, тэдэ танай үбгэ эсэгэнэрые Египедһээ гаргаа, энэ газарта һуурижуулаа.

⁹ Теэд тэдэнэй өөһэдынгөө Эзэн Бурханаа мартахадань, Тэрэ урдаһаань дайлалдажа байгаа Хацоорой сэрэгэй жанжан Сисэраагай, пилиштүүдэй болон Моһаабай хаанай гарта тэдэниие дамжуулаа һэн.

¹⁰ Эзэндэ мүргэн шашхалдан, «бидэ Эзэниие орхижо, Баалнуудта ба Аштаартуудта мүргэжэ, нүгэл хээбди. Харин мүнөө дайсадаймнай гарһаа маанадые мултаруулыт. Бидэ Танда мүргэдэг болохобди» гэжэ тэдэ гуйгаа бэлэй.

¹¹ Тиихэдэнь Эзэн Еруббаал, Бэдаан, Иптаа болон Самуилые эльгээжэ, тойроод байһан дайсадһаатнай таанадые абараа һэн. Тиигээд таанад хэнһээшье айнгүй ажаһуугаат.

¹² Таанад Аммооной хаан Наһаашай урдаһаатнай дайлажа ерэхые хараад, «үгы, бидэниие хаан захирха ёһотой» гэжэ намда хэлээ һэнта. Эзэн, танай Бурханай, хаантнай байһаар байтар иигэжэ хэлээт.

¹³ Зай, таанадай шэлэһэн, таанадай эриһэн хаан энэ байна. Харагты, Эзэн таанад дээрэ хааниие табиба.

¹⁴ Хэрбээ Эзэнһээ айжа, Тэрээндэ алба хэжэ, Тэрэнэй үгэ дуулажа, Тэрэнэй айладалда эсэргүүсэнгүй байгаа һаа, таанад болон таанадые зонхилогшо хаан Эзэн Бурханайнгаа хойноһоо дахан ябаа һаа, һайн байхат.

¹⁵ Хэрбэеэ Эзэнэй үгэ дуулангүй, айладхалдань эсэргүүсэжэ байгаа һаатнай, Эзэн танай үбгэ эсэгэнэрэй урдаһаа эсэргүү байһандал урдаһаатнай эсэргүүсэхэ.

¹⁶ Одоошье зогсожо, Эзэнэй таанарай нюдэн дээрэ үйлэдэхэ энэ агуу хэрэгые харагты.

¹⁷ Мүнөө ургаса хадаха саг. Зүб гү? Теэд минии Эзэниие дуудахадамни, Тэрэ аянга, бороо эльгээхэ. Тиихэдэнь таанад өөһэдтөө хааниие гуйжа, Эзэнэй урда хэһэн нүгэлэйнгөө угаа ехэ байһые мэдэхэт, харахат, – гэбэ.

¹⁸ Тиин Самуилай Эзэниие дуудахада, Эзэн тэрэ үдэр аянга, бороо эльгээбэ. Бүхы арад зон Эзэнһээ болон Самуилһаа угаа ехээр айба.

¹⁹ Тиигээд бүхы зон Самуилда: – Бидэ өөһэдтөө хааниие гуйжа, өөһэдынгөө бүхы нүгэл дээрэ энэ бузар муухай юумэ нэмээбди. Тиимэһээ маанадай үхэхэгүйн тула богоол бидэнэйнгээ түлөө Эзэн Бурхандаа мүргэн зальбарыт, – гэбэ.

²⁰ Самуил арад зондо: – Бү айгты. Таанад энэ бүхы муу муухай юумэ хээт. Гэбэшье Эзэниие дахан ябахаһаа бү хадуурагты, Эзэндэ бүхы сэдьхэл зүрхөөрөө алба хэгты.

²¹ Хэрэггүй, туһа хүргэхэгүй, абархагүй дэмы юумые бү дахагты.

²² Юуб гэхэдэ, Эзэн агууехэ нэрынгээ түлөө Өөрын арад түмэниие орхихогүй. Ушарынь гэбэл, Эзэн таанарые Өөрынгөө арад зон болгон шэлээл!

²³ Мүн би таанадай түлөө зальбархаяа болихогүйб – Эзэнэй урда нүгэл хэхэеэ тэбшэхэб. Би таанадта һайн, сэхэ зам заахаб.

²⁴ Гансал Эзэнһээ айжа, Тэрээндэ бүхы зүрхэ сэдьхэлээрээ, үнэн сэхээр алба хэгты. Эзэн таанарта ямар агууехэ юумэ хээ гээшэб, һанан байгты!

²⁵ Хэрбээ муу юумэ хээ һаа, таанадшье, танай хааншье усадхагдахат, – гэжэ хэлэбэ.