1 Хаан түрэнүүд 11 - Библи

Саул аммоонуудые диилэнэ

¹ Аммооной хаан Наһааш сэрэгээ ударидан ерэжэ, Ябээш-Галаадые бүһэлбэ. Ябээшэй бүхы зон Наһаашда: – Маанадтай хэлсээ баталаа һаашни, бидэ шинии албатан болохобди, – гэжэ хэлэбэ.

² Аммоон хүн Наһааш тэдээндэ: – Би таанадтай иимэ гуримаар хэлсээ баталхаб: хүн бүхэнэйтнай баруун нюдые тэһэлжэ, бүхы Израилиин нэрэ гутаахаб, – гэбэ.

³ Ябээшэй аха захатан тэрээндэ: – Израилиин бүхы нютагуудта элшэнэрые эльгээхыемнай бидэндэ долоон хоногой хугасаа үгыт. Хэрбээ маанадые хэнэйшье абархагүй байгаа һаань, бидэ гаража, танда бэеэ тушаахабди, – гэжэ гуйба.

⁴ Элшэнэр Саулай Гибаа руу ерэжэ, эдэ үгэнүүдые арад зондо дуулгаба. Тиихэдэнь бүхы зон шангаар уйлалдаба.

⁵ Энэ үедэ Саул сарнуудые туун, таряаланһаа бусажа ябаа. Тэрэ: – Зон уйлалдана, энэ юун болоноб? – гэжэ асууба. Зон тэрээндэ Ябээшэй ажаһуугшадай үгэнүүдые хэлэжэ үгэбэ.

⁶ Эдэ үгэнүүдые дууламсаарнь, Бурханай һүр һүлдэ Саул дээрэ хүсэтэй бууба. Тэрэ угаа ехээр сухалдаба.

⁷ Тэрэ хоёр сар абажа, сабшан хубаагаад, элшэнэрээр Израилиин бүхы нютагуудта эльгээжэ: – Саул болон Самуилай хойноһоо ябаагүй хүнэй сарнуудтай иимэ юумэн тохёолдохо, – гэжэ хэлэбэ. Арад зон Эзэнһээ айжа, нэгэ хүн мэтэ бултадаа ерээ һэн.

⁸ Саул тэдэниие Бээзэгтэ тоолобо. Израилиин зон гурбан зуу мянга, Иудын эрэшүүл гуша мянга байба.

⁹ Тэдэ ерэһэн элшэнэртэ: – Ябээш-Галаадай зондо иигэжэ хэлээрэйгты: «Үглөөдэр үдын тэн багаар абарагдахат», – гэбэ. Тиигэжэ элшэнэр бусажа ерээд, Ябээшэй хүнүүдтэ дуулгахадань, тэдэнь баярлаба.

¹⁰ Тиигээд Ябээшэй зон: – Үглөөдэр бидэ гаража, танда бэеэ тушаахабди. Таанад дураараа маанадтай хэхэ юумэеэ хээрэйгты, – гэжэ Наһаашта хэлэбэ.

¹¹ Үглөөдэрынь Саул сэрэгээ гурбан бүлэг болгон хубааба. Үүрэй толоной задарха үедэ тэдэ хотон хүреэлэн руунь сүмэрэн орожо, үдэ хүрэтэр аммоонуудые хюдаба. Амиды үлэһэн хүнүүдынь нэгэ нэгээрээ бутаран таража тэрьедэбэ.

Гилгаалда Саулые хаан гэжэ тунхаглаба

¹² Тиихэдэ арад зон Самуилда: – «Саул маанадые зонхилжо байха юм гү?» гэдэг зон хэд бэлэй? Тэдэ хүнүүдые асарагты, бидэ тэдэниие алахабди, – гэлдэбэ.

¹³ Теэд Саул: – Энэ үдэр хэнииешье алажа болохогүй. Юуб гэхэдэ, мүнөөдэр Эзэн Израильда абарал буулгаа, – гэжэ хэлэбэ.

¹⁴ Тиигээд Самуил арад зондо: – Гилгаал руу ошоё. Тэндэ хаан түрын эхи тэмдэглэе, – гэбэ.

¹⁵ Иигэжэ бүхы арад зон Гилгаал руу ябажа, тэндэ, Гилгаалда, Эзэнэй урда Саулые хаан гэжэ тунхаглаба, амгалан байдалай түлөө үргэлнүүдые Эзэндэ үргэбэ. Саул болон Израилиин бүхы зон тэндэ угаа ехээр баярлан байгаа бэлэй.