1 Хаан түрэнүүд 10 - Библи

Хаан болгоһон ёһолол

¹ Самуил һабатай оливын тоһо абажа, Саулай толгой дээрэ адхаад, тэрэниие таалаад хэлэбэ: – Эзэн Өөрын угай баялигай захирагша болгон, шамда тоһо түрхин ёһолно.

² Ши мүнөөдэр намһаа ошожо ябахадаа, Бэньямиинэй газар нютагта Цэлцаадахи Рахээлэй хүүрэй дэргэдэ хоёр хүнтэй уулзахаш. Тэдэ шамда «Шинии бэдэржэ ошоһон элжэгэнүүд олдоо. Ойлгогты, эсэгэшни элжэгэнүүд тухайгаа һанаагаа зобохоёо болижо, хүбүүнэйнгээ хаана ябаһые һурагшална, һанаагаа зобоно» гэжэ хэлэхэ.

³ Ши тэндэһээ саашаа ябажа, Табоорой сарса модондо хүрэхэш. Тэндэ Бэт-Ээлдэхи Бурхан руу ошожо байһан гурбан хүнтэй уулзахаш. Нэгэнь гурбан эшэгэ, нүгөөдэнь гурбан хүбриг хилээмэ, гурбадахинь нэгэ тулам үзэмэй дараһан архи абаад ябаха.

⁴ Тэдэ шамтай мэндэшэлдэхэ, хоёр хүбриг хилээмэ шамда үгэхэ. Ши гарһаань хилээмэ абахаш.

⁵ Удаань Пилиштын харуулай бүлэгэй байһан газарта, Бурханай Гибаада хүрэхэш. Хото руу орожо байхадаа, тэндэ ятаг, хэнгэрэг, лимбэ, хуур дуугарган, бүжэглэн, үргэлэй обооһоо буужа байһан лүндэншэдэй бүлэгтэй уулзахаш. Тэдэ абарал буулгажа ябаха.

⁶ Эзэнэй һүр һүлдэ шам дээрэ хүсэтэй буужа, ши тэдэнтэй хамта бүжэглэн, абарал буулган, ондоо хүн болон хубилхаш.

⁷ Тэдэ дүлгэ тэмдэгүүдэй шамда хүрэжэ ерэхэдэнь, һанаһан юумэеэ хээрэй. Юуб гэхэдэ, Бурхан шамтай хамта байна.

⁸ Ши намһаа уридшалан Гилгаал руу ошоорой. Хараарайгты, би түгэс шатаалта үргэлнүүдые болон амгалан байдалай үргэлнүүдые үргэхэеэ шамда ерэхэб. Минии шамда ерэтэр долоон хоног тэндэ хүлеэгөөрэй. Хэхэ юумыешни бултыень би шамда заажа үгэхэб.

⁹ Самуилые орхин эрьехэ үедэнь Бурхан Саулай ухаан бодол хубилгаба. Тэдэ бүхы дүлгэ тэмдэгүүд тэрэл үдэртөө хүсэлдөө бэлэй.

¹⁰ Саулай зарасатаяа хамта Гибаада хүрэхэдэнь, лүндэншэдэй бүлэг тэдээндэ дайралдажа, Бурханай һүр һүлдэ Саул дээрэ хүсэтэйгөөр буугаад, тэрэ тэдээнтэй хамта абарал буулгажа ябаа һэн.

¹¹ Саулые үнинэй мэдэдэг бүхы зон лүндэншэдтэй хамта тэрэнэй айладхал табижа байхые обёороод, өөһэд хоорондоо иигэжэ хэлсэбэ: – Киишэй хүбүүнтэй юун болоо гээшэб? Саул мүн лэ лүндэншэдэй нэгэн юм гү?

¹² Тэндэ байһан нэгэ хүн: – Теэд бусадайнь эсэгэнэр хэд бэ? – гэбэ. Тиимэһээ «Саулшье баһа лүндэншэ юм гү?» гэжэ хэлсэдэг болоһон гэхэ.

¹³ Саул абарал буулгажа дүүргээд, үргэлэй обоондо ошобо.

¹⁴ Саулай абга тэрэниие болон зарасыень хаража, иигэжэ асууба: – Таанад хаагуур ябаабта? Саул харюусаба: – Элжэгэнүүдые бэдэрээбди. Теэд олоогүйбди, Самуилда ошообди.

¹⁵ Саулай абгань хэлэбэ: – Самуилай таанарта юу хэлэһые намда хөөрэжэ үгыш.

¹⁶ Саул абгадаа харюусаба: – Элжэгэнүүд олдоо гэжэ тэрэ маанадта соносхоо һэн. Гэбэшье хаан түрэ тухай Самуилай тэрээндэ хэлэһые тэрэ абгадаа хэлэбэгүй.

Саулые хаан гэжэ зондо соносхобо

¹⁷ Удаань Самуил арад түмэниие Мицпаа руу, Эзэндэ дуудан суглуулба.

¹⁸ Тиигээд Израилиин арад зондо тэрэ иигэжэ соносхобо: – Израилиин Эзэн Бурхан иигэжэ айладажа байна: Би таанадые Египедһээ гаргаад, таанадые египетшүүдэй һабарһаа болон таанадые дарлажа байһан бүхы хаан түрэнүүдһээ абараа һэм.

¹⁹ Бүхы гай тодхорһоо, зоболонһоо абардаг Намайе, өөрынгөө Бурханиие, таанад мүнөөдэр үлүү харабат. Маанад дээрэ хааниие табигты гэбэт. Зай, мүнөө Минии урда обог болон мянгаараа зогсогты.

²⁰ Тиигээд Самуил Израилиин бүхы обогуудые дүтэлхыень захирба. Бэньямиинэй обог шэлэгдэн заагдаһан байна.

²¹ Удаань тэрэ Бэньямиинэй обогые бүлэ бүлөөрөө дүтэлхыень захирба. Матриин гэр бүлэ шэлэгдэһэн байна. Киишэй хүбүүн Саул шэлэгдэбэ. Харин тэрэниие бэдэрээд, зон олобогүй.

²² Тиимэһээ зон Эзэнһээ: – Тэрэ эндэ ерэхэ гү? – гэжэ асууба. Эзэн айладаба: – Харагты, тэрэ ашаан соо хоргодоод байна.

²³ Зон гүйн ошожо, тэрэниие тэндэһээ абаад ерэбэ. Саул арад зоной дунда зогсоходоо, улад зонһоо мүрөөрөө үндэр байгаа.

²⁴ Самуил бүхы арад зондо соносхобо: – Эзэн хэниие шэлээб гэжэ ойлгон харана гүт? Бүхы арад түмэнэй дунда энэ хүнтэй зэргэсэхэ хүн үгы! Тиимэһээ бүхы зон баярлан хашхаралдаба: – Хаан мандаха болтогой!

²⁵ Самуил арад зондо хаанай эрхэ, уялгануудые ойлгуулжа, хуйламал ном соо бэшэжэ, тэрэ номоо Эзэнэй оршодог нангин газарта табиба. Удаань тэрэ бүхы арад зониие гэр гэртээ бусахыень захирба.

²⁶ Саулшье баһал Гибаадахи гэр руугаа бусаба. Бурханай зүрхэ сэдьхэлыень хүдэлгэһэн ушарһаа зориг ороһон зарим улад зон тэрэниие дахаба.

²⁷ Харин зарим этэгээдүүд: – Энэ хүн маанадта яажа туһалха юм? – гэлдэн, тэрэниие баһажа, бэлэгүүдые тэрээндэ асарбагүй. Харин Саул энээниие хараагүй мэтэ ябаа бэлэй.