1 Хаан түрэнүүд 1 - Библи

Элканаа гэр бүлэтэеэ Шилоодо байна

¹ Эпрааимай хадалиг газартахи Цүүпэй Раматааһим хотодо эпрааим угай нэгэ хүн байдаг байгаа. Тэрэнэй нэрэнь Элканаа, тэрэ хадаа Ероһаамай хүбүүн, Элиһүүгэй аша, Тоохугай гуша, Цүүпэй дүшэ һэн.

² Тэрэ хоёр һамгатай байгаа: нэгэнь Ханнаа, нүгөөдэхинь Пэниннаа гэжэ нэрэтэйнүүд бэлэй. Пэниннаа үхи хүүгэдтэй, харин Ханнаа хүүгэдгүй һэн.

³ Энэ хүн жэл бүри түрэл хотоһоо гаража, Түмэн Сэрэгтэ Эзэндэ мүргэхэеэ, үргэл хэхэеэ Шилоо руу ошодог бэлэй. Тэндэ Элии гэгшын хоёр хүбүүд – Хопнии ба Пинэһаас Эзэнэй санаартад байгаа.

⁴ Элканаа үргэл хэһэн үдэртөө Пэниннаа һамгандаа, хүбүүд, басагадтаа үргэлһөө хубинуудые хүртөөдэг һэн.

⁵ Харин Ханнаада хоёр дахин ехэ хуби үгэдэг байгаа, юуб гэхэдэ, Эзэнэй тэрээндэ үхибүү үршөөгөөгүйшье һаань, Ханнаада тэрэ угаа дуратай бэлэй.

⁶ Ханнаагай үхибүү түрэдэггүй ушарһаа боложо, Пэниннаа тэрэниие доромжолдог, Эзэнэй умайень хааһан ушарта гомдон голхоруулхые оролдодог һэн.

⁷ Жэл бүхэн Эзэнэй һүмэ ошохо бүринь нэгэнь нүгөөдэеэ голхоруулдаг, нүгөөдэнь уйлажа, эдеэ хоолһоо гарадаг бэлэй.

⁸ Элканаа үбгэниинь тэрээндэ: – Ханнаа, юундэ ши бархирнабши, юундэ эдеэлнэгүйбши, ямар ушарһаа зүрхэншни гажарнаб? Би шамда арбан хүбүүдһээ дээрэ бэшэ аалби? – гэжэ хэлэдэг байба.

Ханнаа ба Элии

^9-10 Нэгэтэ Шилоодо эдеэлжэ ууһанай удаа Ханнаа бодожо, сэдьхэлэйнгээ ехэ гажарһанда угаа гашуудалтайгаар уйлан, Эзэндэ һүгэдэн мүргэбэ. Энэ үедэ Элии санаартан Эзэнэй һүмын үүдэнэй хажууда, һандали дээрэ һуужа байгаа.

¹¹ Ханнаа дашаа тангариг үгэжэ, иигэжэ хэлэбэ: – Түмэн Сэрэгтэ Эзэн, Танай шэбэгшэ болохо минии гай гашуудалые хаража, нам тушаа һанажа, мартангүй, хүбүү үршөөгөө һаатнай, тэрэниие бүхы наһаараа Танай мэдэлдэ үгэхэб. Толгойнь үһые хайша хүрэхэгүй.

¹² Тэрэ удаан сагта Эзэндэ зальбараа. Элии амыень гэтэн байгаа һэн.

¹³ Теэд Ханнаа досоогоо шэбшэн зальбаржа, гансал уралынь хүдэлжэ, абяаниинь дуулдабагүй. Тиимэһээ Элии тэрээниие һогтуу гэжэ һанаба.

¹⁴ Элии тэрээндэ: – Хэды болотор һогтуу эндэ зогсохобши? Ошожо тэлэрэ! – гэжэ хэлэбэ.

¹⁵ Гэбэшье Ханнаа: – Үгы даа, эзэн. Би сэдьхэлээ гажаржа байһан эхэнэрби. Үзэмэй дараһан архи, шара ундашье уугаагүйб, харин Эзэнэй урда сэдьхэлэйнгээ шарха элирхэйлжэ байнаб.

¹⁶ Танай шэбэгшэ болохо намайе муу һамган гээд бү һанагты. Ушар юуб гэбэл, угаа ехэ уйдхар гашуудалһаа боложо би мүнөө болотор зальбаржа байгааб, – гэжэ харюусаба.

¹⁷ Элии тэрээндэ: – Амгалан һайн ябыш даа. Израилиин Бурхан шинии гуйһан гуйлтые бэелүүлхэнь болтогой! – гэбэ.

¹⁸ Ханнаа: – Юрөөл тогтог! – гээ һэн. Тиигээд тэрэ бусажа, эдеэндэ орожо, нюур шарайнь урданайхидал адли гунигтай байхаяа болёо бэлэй.

Самуил мүндэлбэ

¹⁹ Удаань тэдэ үглөөгүүр бодожо, Эзэндэ мүргөөд, һөөргөө Рамаада байдаг гэртээ бусаба. Элканаа Ханнаа һамгантаяа унтажа, Эзэн Ханнаагай гуйлта анхараа бэлэй.

²⁰ Иигэжэ тэрэ хээлитэй боложо, нэгэ жэл үнгэрхэдэ хүбүү түрэбэ. – Би энэ хүбүүе Эзэнһээ гуйжа абааб, – гэжэ хэлээд, тэрэ Самуил гэжэ нэрэ тэрээндээ үгэбэ.

²¹ Тиигээд дахин Шилоо руу ошожо, Эзэндэ жэл бүриин үргэл болон тангариглан хэлэһэн тусхай үргэлөө үргэхэ сагынь Элканаада ба гэр бүлэдэнь тудаба ха.

²² Теэд Ханнаа ошобогүй. Тэрэ үбгэндөө: – Үхибүүнэй хүхэнһөө гарахадань би тэрэниие Эзэнэй урда абаашахаб, тиигээд тэрэ тэндээ хэтэдээ үлэхэ, – гэбэ ха.

²³ Элканаа үбгэниинь: – Һанаһаараа боло даа. Хүхөөрөө тэрэнээ тэнжээтэрээ гэртээ бай. Эзэн үгэеэ бэелүүлхэнь болтогой! – гэжэ тэрээндэ харюусаа һэн. Иигэжэ һамганиинь үлэжэ, хүбүүнэйнгээ хүхэнһөө гаратарынь хүхүүлжэ тэжээбэ.

²⁴ Тэрэнэйнгээ хүхэнһөө гарахадань тэдэ хамта Шилоо руу ошобо. Тэдэ гунан буруу, нэгэ эфаа гурил болон нэгэ арһан тулам үзэмэй дараһан архи абаад ошоо һэн. Хүбүүниинь үшөө нялха наһандаа ябаа.

²⁵ Тиигээд тэдэ буруугаа үүсэлжэ үргэбэ, хүбүүгээ Элиидэ дүтэлүүлбэ.

²⁶ Ханнаа тэрээндэ иигэжэ хэлэбэ: – Эзэн! Ута наһатай, удаан жаргалтай ябахатнай болтогой! Би эндэ, танай хажууда зогсожо, Эзэндэ мүргэн зальбаржа байгааша үнөөхи эхэнэр гээшэлби даа.

²⁷ Энэ үхибүүнэй түлөө мүргэн зальбаржа байгаа бэлэйб. Гуйһан гуйлтыемни Эзэн бэелүүлээ.

²⁸ Тиимэһээ хүбүүгээ Тэрээндэ зорюулан үгэнэб. Энэ хүбүүн бүхы наһаараа Эзэндэ алба хэжэ байха. Элии Эзэндэ һүгэдэн мүргэбэ.