Фессалоникиинхидтэ 1-дэхи 5 - Библи

¹ Аха дүүнэрни, эдэ бүхэнэй ушарха саг, болзор тухай таанадта бэшэһэнэй хэрэггүй.

² Эзэн ерэхэдээ, һүниндөө гэтэжэ ороһон хулгайшандал хүлеэгөөгүй байхада ерэхэ гэжэ таанад өөһэдөө яһала һайн мэдэнэт.

³ Хүнүүдэй «Амгалан тайбан, аюулгүй һуунабди» гэжэ байхада, тэдэниие гэнтэ һүйдхэхэ. Тэрэ һүйдхэл болбол түрэхөө байһан эхэнэрэй үбдэдэг мэтэ гэнтэ эхилхэ, тиимэһээ хүнүүд тэрээнһээ зайлажа шадахагүй.

⁴ Харин таанад, аха дүүнэрни, харанхы бүрэнхы соо һуунагүйт. Тиимэһээ тэрэ Үдэр болбол хулгайшан мэтэ хүлеэгөөгүй байхадатнай ерэхэ ёһогүй.

⁵ Таанад булта гэрэл туяа бэдэрһэн, үдэрэй харьяалай хүнүүд гээшэт. Бидэ болбол һүниин, харанхы бүрэнхыгэй хүнүүд бэшэбди.

⁶ Тиимэһээ бидэ бэшэ зондо адли унтаха ёһогүйбди. Бидэ һэргэлэн, эрүүл байха ёһотойбди.

⁷ Юундэб гэхэдэ, һүниндөөл хүнүүд унтадаг, һүниндөөл хүнүүд һогтотороо уудаг.

⁸ Гэхэдээ бидэ үдэрэй харьяалай хүнүүд хадаа эрүүл байха ёһотойбди. Бидэ һүзэг ба дуран хоёроо хуяг мэтэ үмдэжэ, абарагдаха найдалгаа дуулга мэтэ углаад байха ёһотойбди.

⁹ Бурхан хэһээхын тула бэшэ, харин Эзэн Иисүүс Христоосой туһаар абархын тула бидэниие шэлэжэ абаа юм.

¹⁰ Иисүүс бидэнэй орондо үхөө, тиимэһээ Тэрэнэй ерэхэдэ, бидэ амиды гүбди, наһа бараа гүбди, Тэрээнтэй хамта амидарха ёһотойбди.

¹¹ Тиимэһээ таанад бэе бэеэ урмашуулдаг, бэе бэедээ туһалдаг заншалаа үргэлжэлүүлжэл байгты.

Һүүлшын захяа заабари ба амаршалга

¹² Аха дүүнэрни, таанадай дунда ажаллажа, Бурханда һайшаагдаха ажамидаралда таанадые хүтэлжэ, һургажа байһан хүнүүдые хүндэлжэ байгты гэжэ бидэ гуйнабди.

¹³ Хэжэ байһан ажалайнь түлөө тэдэнээ хүндэлжэ, тэдээндээ дуратай байгты. Өөһэд хоорондоо эбтэй эетэй байгты.

¹⁴ Аха дүүнэрни, залхуу хүнүүдтэ ухаан заагты, зориггүй хүнүүдые урмашуулжа байгты, һулахан хүнүүдтэ дэмжэлгэ үзүүлэгты, хүн бүхэндэ ехэ тэсэбэритэй хандажа байгты гэжэ бидэ баһа гуйнабди.

¹⁵ Таанадта муу юумэ хэхэдэнь, харюудань муу юумэ бү хэгты, харин бэе бэедээ, хүн бүхэндэ ходо һайн юумэ хэхые оролдогты.

¹⁶ Ходо баяртай байгты.

¹⁷ Ходо зальбаржа ябагты.

¹⁸ Ямаршье нүхэсэлдэ бүхы юумэнэй түлөө бүгэдэндэ баясхалан хүргэжэ байгты. Иисүүс Христоосой харуулһан ёһоор тиимэ юумэ хэжэ байхыетнай Бурхан таанадһаа хүсэнэ.

¹⁹ Арюун Һүлдынгөө гэрэлыень бү унтараагты.

²⁰ Уридшалан хэлэгдэһэн юумэнүүдые бү доромжологты.

²¹ Бүхы юумые шалгажа үзөөд, һайнииень баримталжа ябагты.

²² Элдэб гэмтэ ябадалнуудые хэнгүй байхые хэшээгты.

²³ Бидэндэ амгалан тайбаниие үршөөжэ байһан Бурхан таанадые бүримүһэн арюун гэгээн болгог, Эзэн Иисүүс Христоосой ерэтэр танай һанал бодол, һүнэһэ һүлдэ, махабад бэе бүрин бүтэнөөрөө ямаршье зэмдэг дутагдалгүй хадагалагдажа байг.

²⁴ Таанадые дуудаһан Бурхан найдабаритай ушарһаа тэрэ бүхэниие бэелүүлхэ.

²⁵ Аха дүүнэрни, бидэнэй түлөө баһа зальбаржа байгты.

²⁶ Бүхы һүзэглэгшэдые арюунаар таалан амаршалагты.

²⁷ Бүхы һүзэглэгшэдтэ энэ бэшэгые уншажа үгэгты гэжэ би Эзэнэй нэрээр гуйнаб.

²⁸ Эзэн Иисүүс Христоосой үршөөл хайра та бүхэнтэй оршожо байхань болтогой.