Фессалоникиинхидтэ 1-дэхи 4 - Библи

Бурханда һайшаагдаха ажамидарал

¹ Аха дүүнэрни, Бурханда һайшаагдадаг ажамидарал ямар байдаг бэ гэжэ таанад бидэнһээ һураа бэлэйт. Мүнөөшье таанад тиимэ ажамидаралтай байнат. Тиин саашадаашье тиигэжэл ажамидарагты гэжэ бидэ мүнөө Эзэн Иисүүсэй нэрээр таанадые гуйха, аргадаха байнабди.

² Эзэн Иисүүсэй эрхэ мэдэлээр бидэнэй таанадта үгэһэн захяа заабаринуудые өөһэдөө мэдэжэ байнат.

³ Бурхан таанадые забхай бэшэ, харин гэгээн хүнүүд байхыетнай хүсэнэ.

⁴ Хүн бүхэнтнай бэеэ арюун нангин ба сэбэрээр абажа ябаха ёһотой.

⁵ Бурханиие мэдэхэгүй бусад арадуудта адли зальхай забхай хүсэлэнгүүдтэ бү абтагты.

⁶ Тиимэһээ таанадай хэншье Христоосто һүзэглэгшэ ондоо хүндэ муу юумэ хэхэ, мэхэлэн барашхаа ёһогүй. Тиимэ юумэ хэһэн зониие Эзэн хэһээхэ гэжэ бидэ уридшье хэлээ һэмди, мүнөөшье хатуугаар һэргылнэбди.

⁷ Бурхан бидэниие забхайралдахыемнай бэшэ, харин арюун гэгээнээр амидархыемнай уряалаа юм.

⁸ Тиимэһээ энэ һургаал буруушааһан хүн болбол хүниие буруушаана бэшэ, харин таанадта Арюун Һүлдэеэ үршөөжэ байгаа Бурханиие буруушаана.

⁹ Бэе бэедээ дуратай байгты гэжэ бэшэхэ хэрэггүй байха. Бэе бэедээ дуратай байхые Бурхан таанадта заажа үгөө.

¹⁰ Таанад Македонидо ажаһуугаа бүхы һүзэглэгшэдтэ дуратайт. Аха дүүнэрнай, бүришье ехээр бэе бэедээ дуратай байгты гэжэ таанадые гуйнабди.

¹¹ Бидэнэй түрүүн хэлэһэн ёһоор таанад даруухан ажамидарха, өөрынгөө ажал хэхэ, өөһэдөө бэеэ тэжээхэ зорилго табигты.

¹² Тиигэжэл таанад һүзэггүй хүнүүдэй дунда хүндэтэй байхат, юугээршье дуталдахагүйт.

Һүзэглэгшэдэй этигэл найдабари

¹³ Аха дүүнэрни, этигэл найдабаригүй байһан хүнүүдтэй адли гашуудахагүйнтнай тула наһа бараһан хүнүүд тухай үнэнииень мэдэжэ байхыетнай бидэ хүсэнэбди.

¹⁴ Иисүүс үхөөд амидыраа гэжэ бидэ этигэнэбди. Тиимэһээ Тэрээндэ һүзэгтэй наһа бараһан хүнүүдые Бурхан Иисүүстэй хамта хүтэлжэ ерэхэ гэжэ бидэ этигэнэбди.

¹⁵ Мүнөө бидэ таанадта Эзэнэй һургаал номнонобди: Эзэнэй ерэхэдэ, амиды байгаа бидэ үхэһэн хүнүүдһээ түрүүн Тэрээнтэй уулзахагүйбди.

¹⁶ Айладхаһан абяанай гарахада, Бурханай ахалагша Эльгээмэлэй дуу дуулдахада, Бурханай бүреэгэй дуугархада, Эзэн Өөрөө тэнгэриһээ доошоо бууха. Эдэ бүхэнэй болохын урда тээ Христоосто һүзэгтэйгөөр наһа бараһан зон амидырха.

¹⁷ Тиигээд амиды байһан бидэнэр тэдэ үхэһэн хүнүүдтэй хамта Эзэниие угтахаяа агаарта үүлэн дээрэ дэгдэхэбди. Тиигээд Эзэнтэй ходол хамта байхабди.

¹⁸ Иигэжэл, эдэ үгэнүүдээр бэе бэеэ урмашуулжа байгты.