Фессалоникиинхидтэ 1-дэхи 3 - Библи

^1-3 Һүүлэй һүүлдэ бидэ тэсэхэ аргагүй болообди. Тиимэһээ Христоос тухай Һайн Мэдээсэл номнон бидэнтэй Бурханда алба хэжэ байһан Тимофей дүүгээ таанадта эльгээгээд, өөһэдөө Афины хотодо үлэхэ гэжэ шиидээ һэмди. Хэнэйтнайшье хашалга мүрдэлгэнүүдһээ айн сухарихагүйн тула таанадые бата бэхи болгохо, һүзэгыетнай урмашуулха зорилготойгоор бидэ Тимофейе ябуулаа һэмди. Тиимэ хашалга мүрдэлгэнүүдые Бурханай бидэндэ заяаһые таанад өөһэдөөшье мэдэнэт.

⁴ Түрүүн таанадтай хамта байхадаа хашуулан мүрдүүлхэбди гэжэ бидэ уридшалан хэлээ һэмди. Тон тиимэл юумэн ушараа.

⁵ Саашадаа тэсэхэ аргагүй байһандаа, һүзэг тухайтнай мэдэжэ ерэхээрнь Тимофейе эльгээгээбди. Шолмос таанадые хорхойтуулаашье һаань, бүхы манай ажал дэмы үнгэрөөгүйл байха гэһэн этигэлтэйбди.

⁶ Мүнөө Тимофей бусажа ерээ, танай һүзэг ба дуран тухай һайн мэдээсэл асараа. Таанад бидэниие ходо һайнаар дурданат, таанадые харахаяа ехээр хүсэдэгтэмнайл адляар таанадшье бидэниие харахаяа ехэл хүсэнэт гэжэ тэрэ дуулгаа.

⁷ Аха дүүнэрни, зоболонтой, дутагдалтай ажамидаржа байхадамнай таанад бидэниие һүзэгөөрөө урмашуулбат.

⁸ Эзэнтэй нэгэдэһэн амидаралаа бата бэхеэр сахижа байхадатнай бидэ мүнөө жэнхэни амидарбабди.

⁹ Таанадай бидэндэ асарһан бүхы баярай түлөө бидэ яажа Бурханда гүйсэд баясхалан хүргэхэбибди?

¹⁰ Таанадтай уулзаха, этигэл һүзэгтэтнай дутажа байһан юумые үгэхэ хүсэлтэйгөөр бидэ үдэр һүнигүй Бурханиие үнэн зүрхэнһөө гуйнабди.

¹¹ Таанадта ошохо харгыемнай Эсэгэ Бурхан Өөрөө, манай Эзэн Иисүүс бэлдэжэ үгэг лэ.

¹² Таанадта аргагүй ехэ дуратай байдагтамнайл адляар бэе бэедээ болон бусад зондо дуратай байхыетнай Эзэн таанадта үршөөг лэ.

¹³ Тиигэбэл Эзэн Иисүүсэй Өөрынгөө хүнүүдтэй ерэхэдэнь, Эсэгэ Бурханай урда нүгэлгүй, арюун сэбэр байхынтнай тула Эзэн таанадые бэхижүүлхэ.