ZAKARI 9 - Bible en langue Bulu

Meyoñ me ne Israél bebé ma nyiiban

¹ Mbañete Nti. Nkobô wé wo kui afôla si yʼAdrak, a nkobô te wo ke tebe tisone Damas. Nti a nji fombô ve meyoñ yʼIsraél étam, ve fe bôte bese be vee.

² A kobô fe Amat, bebé a Damas, a bitisone bi: Tir a Sidoñ, mbie bi nʼatyeñ abui.

³ Tir a nga lôñ émien ôlem, a nga kôane argent, avalʼane tyia é ne mezen, a kôane fe or abim ane mbuluk ô ne minjoñ.

⁴ Ve Nti a ye vaa nye biôm bite, a ye kpwé minkaʼalé mié e mañ été, a nduan ja ye diʼi tison.

⁵ Tisone Askalôn ja ye ko woñ, ñyenan a ye yene jame te, Gaza a ye fôʼôban a woñ, Ekroñe fe avale da, amu a kooé na a dimiliya mvolan a mbe a yangeʼe. Gaza a ye bo teke fe njô bôt, Askalône ki teke fe bôt,

⁶ mbundaʼane meyoñ a ye tabe Asdôd. Nti a jô na: avale di nde ma ye tyame mebune Befilisteñ,

⁷ ma ye wôlé tit é nji kui metyi, nge na é nga veban e be bengunemelan e menyu map. Bôte bap ba ye nyiñ, ba ye bi ma ane Zambe, avale fe ane ayoñe Yuda, Ekroñ a ye nyiin ayoñe dam avale Beyébuzieñ be nga bo.

⁸ Ma ye telé bebaʼale mbômaʼane si jam, asu ya kamane je e be minsamba mewosan mia lôt, Teke môt a ye beta zu kpweʼele ayoñe bôte dam, amu éyoñe ji mise mam me lôô de.

Njô bôt a ye zu telé mvoʼé

⁹ Vaʼak a Yérusalém! Loñ ôyenga a tisone Siôn! O lôô njô bôt a zu be wo, a too zôsôô a ndañan, nsilibane si a bete éjakase yôp, e mon éjakase yôp, e mon ngal éjakas.

¹⁰ A ye vaa bevagoñe bita Efrayim, a bikabela e Yérusalém; a ye buʼu bilaé bita, a ye telé mvoʼé e meyoñ; a ye bo njôô ataté mañe ma a kui ma mevok, ataté Efrat a kui akuʼu si.

Nkôtane mimbôk

¹¹ Nti a jô na: amu élate bia be mia bi nga bo, ñyemetan a metyi biyem ba tyik, ma zu kôté ba ya be mia be ne nda mimbôʼô été nje ja funan anjeñ e ne teke mendim.

¹² A mia mimbôk mia nyiñ a ndi nlem , bulaʼan e tisone jenan, nje mimfin mi nto mbetan. Ma kate mia de éyoñe jina na: ma ye yaʼane mia minjuʼu mienan a mbamba be mam biyoñ bibaé.

¹³ Ma ye belane Yuda anʼélaé bita, Efrayim nye a ye bo akoñe yʼété. A Siôn, ma ye lôme bôte bôé be té ba ya grés mintañete. Ma ye belane be ane nkpwaté mekône nyô a wosan.

¹⁴ Nti a ye vam ayoñe bôte dé yôp. Akoñe dé da ye ke ane feleves. Nti nyô a ne Zambe a ye loñe toñ, a ye so a akôse ya nké.

¹⁵ Nti yʼémo a ye kaman ayoñe dé, a ye wua metaʼa, asu ya tyam a koʼo ntebane ngame yat ôse: metaʼa mete ma ye bo na metyi besiñ me kui, avalʼane nge woone le, nge metyi ya biyem ba tyik asu metunaʼa, mme ma jalé bisua ba miame bie metyi, a woʼoban e mekuʼu yʼataʼa metunaʼa.

¹⁶ Nti, nyô a ne Zambe, a ye nyii ayoñe dé éyoñe te, avalʼane mbaʼale mintômba a nyii mbame wé! Efunan ane mekoʼo yʼékat me nʼédima, ba ye faé e si nyô,

¹⁷ e vôme mvom a abeñ bia ye jôô. Fôn a mfefé woon bia ye ve ngu e be bisoé bendôman a bisoé bengon.