ZAKARI 8 - Bible en langue Bulu

Ngakaʼa mvoʼé a afok

¹ Ajô Nti a ne ngul ése e nga zu be ma na:

² avale di Nti ya ngul ése a jô na: me ne aban abui asu Siôn, nya nyeʼan a bili ma asu dé

³ ajô te ma jô na: me bulaneya Yérusalém, ma beta kôm éto e Siôn. Ba ye loone Yérusalém na: tison ja baʼale élat. A nkôle Siôn wom wo ye bo jôé na: nkôl ô nʼétyi.

⁴ Yaa ma yemete njôane wu na: minnôm, befam a binga ba wulu a ntum , amu abui mimbu dap, ba ye beta zu tabe bito ya Yérusalém.

⁵ Bobefam a bobebinga ba ye beta zu ézuk, a bo bivôé e minjoñe ya tison.

⁶ Mfaʼa bôte yʼIsraél ba ye nyiñe melu mete, jam da zu te da yené ane jam e se nguleya boban, ve ma me ne nguleya bo étua jame te, ma, Nti yʼémo ése.

⁷ Ma ve mia de ngakaʼa na: ma ye nyii ayoñe bôte dam, nde e nga ke minkôm e bifuse bi si ya jôp da tôô a jôp da dim.

⁸ Ma ye soo be wé be tabe e Yérusalém. Ba ye bo ayoñe dam, a ma ki ma ye bo Zambe wop. Ma ye jôô be ane metiñ a nya ntyiʼane mejôô bi né.

⁹ Nti yʼémo ése a jô na: boʼone ngule nlem , éyoñe ji, mi wôʼôya mengakaʼa bekulu mejô be tameya kat asu dam, éyoñ be nga bo mbôkaʼa ya beta lôñe Nda Zambe.

¹⁰ Ôsusua, môt éziñ a nji zu, a yaʼan ésaé bôt, nge ji betit. Môt a nji bo nguleya ke, nge zu a sobô besiñ, amu me nga suu bôt be wosan, bana a ba bevok.

¹¹ Vʼéyoñe ji, ma yemete njôane wu na: ma ye bo te beta bo bôte yʼayoñe di abé , ba ye nyiñ avale me nga bo be melu mvus.

¹² Ma ye miase mvoʼé e si nyô: mefube mindik ma ye wume bibuma, si ja ye yô bidi ya kôan. Abui mveñ da ye nnoñ é soʼo yôp. Abui mvaé te ése, ma ye ve je e bôte bam, ba ye nyiñ.

¹³ A bijôé ya Yuda a Israél, e meyoñ été, bi mbe éveʼela ya ayoñ e ne biyoʼé. Eyoñe ji, ma nyii mia, mia ye bo éveʼela yʼayoñ e nʼébotan. Te beta koone woñ! Boʼone ngule nlem !

¹⁴ Nti yʼémo ése a jô na: éyoñ me nga tyiʼi na ma futi mia e njuʼu été, amu benyômvam be nga bo me na me wôʼôlun, me nji bulane mvus mfaʼa ya ntyiʼane me nga tyik.

¹⁵ Vʼéyoñe ji me tyiʼiya na ma jalé mia a mbamba be mam. Nde a bôte ya Yérusalém a si Yuda ése, te mia beta ñhe ko woñ.

¹⁶ Avale di nde mia ye bo: môt ase a kobôʼô nyô mboʼo bebela. Meba mejô menan me tame tyiʼi mejô zôsôô a futi mvoʼé !

¹⁷ Bôt be boʼo te bo ba bevoʼo abé , benan ajô ya kane ngana minsos, amu ma vini avale mimboone te, ma, Nti.

Mimôse ya ntyiane bidi, mia ye veñesane mimôse mebôk

¹⁸ Nti yʼémo ése a nga kalane ma foé nyô na:

¹⁹ Ma kate mia na: ntyiane bidi mia tyi e ngone nyini, tane, zamgbwale a awômô ya mbu ôse, wo ye bo ataté éyoñe ji, asu ayoñe Yuda, beta mebôk , njalane mevak a mefôn. Ve jam mia yiane dañe kômbô e ne bebela a mvoʼé !

²⁰ Nti yʼémo ése a jô na: meyoñe bikuu, bôt be too abui bitison, ba ye beta zu e Yérusalém.

²¹ Bôte ya tison éziñ ba ye jô ba ye tisone foʼo na: zaʼan, bia ke yeʼelane Nti yʼémo, a jeñe Nye. Ba ye yalane na: bia be mia bia ke.

²² Yaa abui bôt a meyoñ me ne ngu, ba ye zu Yérusalém a jeñe ma, a jaʼé me mam e meyeʼelane mab été.

²³ Ma bele na éyoñe te ébien, bikul awôm, môt ase yʼété a kobôʼô nkobô wé, bia ye bi mone Beyude ñwôndé ngômesane wé, a jô nye na: bia kômbô ke nsamba wôé, amu bia wôʼôtane na Zambe a ne be mia.