ZAKARI 7 - Bible en langue Bulu

Ntyiane bidi asu ya simesane ntyamane Yérusalém

¹ E mbu nyini Darius a nga jôô, ñwô ajô Nti e nga zu be Zakari, e ngon ébulu, ba loone Kisle, é to melu menyin.

² Bétél-Saréser, évete bezimbi njô bôt a e bôte bé, be nga lôme nsamba bôt, asu ya volô Nti nlem ,

³ a sili betuni be mbe be boʼo ésaé Nda Zambe Nti a ne ngul ése a bekulu mejô nsili wu na: ye me yôn e ngone tane, a tyili mamiene mam, avale ma zu ma bo den mimbu abui?

⁴ Eyoñe te ajô Nti a ne ngul ése e nga zu be ma na:

⁵ Jôʼô bôte bese ya si a betuni na: éyoñe mi nga tyi bidi a miñyôn e ngone tane a zamgbwale den a ntoo mimbu mewôme zamgbwa, ntyiane bidi ôte ye mi nga bo wô asu dam?

⁶ A éyoñ mi mbe mi jaʼak a nyu, ye mi nji di a nyu asu denan?

⁷ Ye sa atinane ya mejô Nti a mbe a kobôʼô anyu minnôme bekulu mejô, éyoñe Yérusalém a mbe mvoʼé ne mieññ, bitisone bié bi bômaʼane nye, Négéb a nlumbu si ki njalan a bôt?

⁸ Ajô Nti e nga beta zu be Zakari na:

⁹ avale di nde Nti a ne ngul ése a mbe a kobôʼô na: tyiʼane mejô zôsôô a môt ase a litiʼi monyañe mvam a éngôngô.

¹⁰ Avale te fe mfaʼa nkus a monenyui, ntabe a nzôzoé , te mia kpweʼele be; môt éziñ ya be mia a boʼo te bôndé feʼe ya bo monyañ abé .

¹¹ Ve be nga bene vôʼôlô; be nga lume mvus a dibe melo na be bo te wôk.

¹² Be nga bo minleme miab ayet anʼakok; be nji kômbô nyoñe miñyeʼelane mi Nti ya émo, mmie Nsisime wé ô mbe ô kate be anyu bekulu mejô ya melu mvus. Ajô te Nti a nga dañe yaa

¹³ a jô na: amu be nji kômbô vôʼôlô, éyoñe me mbe me dutuʼu be na be bo mewôk, ma fe me nga bene yalane be, éyoñ be nga sili mvolan.

¹⁴ Me nga mialane be e be meyoñ mevale mese, mme be nji boʼo be yemek. Be nga liʼi si é ne teke jôm e mvuse jap, vôme môt éziñ a nji beta ke nge so. E si jap é mbe mbamba vôme ya tabe, be nga kôñelane je bilik.