ZAKARI 5 - Bible en langue Bulu

Nyenane samane: kalate biyoʼé

¹ Ane me nga beta bete mis a yene ñyenane wu: mvulekane kalate ô yeleʼe.

² Engele nye me na: ô lôô jé? Me na: me lôô mvulekane kalate wo yele, nté menyiʼi me mo mewôm mebaé, ndame ki menyiʼi me mo awôm.

³ Nye me na: biyoʼé bia mialan e si ése mbie le. Biyoʼé bite bia liti na: ba ye titane ñwuwub ôse va, a titane fe nkalane minkal ase va.

⁴ Ma mialane bie, nalé Nti a ne ngul ése a jô, nalé bia ye nyiin e nda ñwuwup, a e nda nyô a kalane jôé dam mbia nkalan, nalé biyoʼé bite bia ye tabe e nda éte a diʼi je mfulaʼan a andile dé a mekoʼo mé.

⁵ Engele bia nye bi mbe bi kobôʼô a nga subu a jô me na: beteʼe ñhe mis a yene jôme ja kui le.

⁶ Me na: jé le? Nye na: nkoé le wo zu. A na: abé dabe ya si ése nde le.

⁷ Wôna njiñelete ésua afiti é nga yené, minga a too je été.

⁸ Engele na: abé ñhe le! Ve beta sôʼôlô minga ésua été, a wua ébañ afiti e mbé .

⁹ Nde ma bete mis a yene ñyenan: binga bebaé be zaʼak. Evuñulu é mbe é vuñuk e mefabe mab été, mefap me funaʼan ane ma me bingobingo, nde ba bete njiñelete ésua e zañe si a yôp.

¹⁰ Me ve sili éngele a mbe a kobôʼô me na: binga ba ba kee njiñelete ésua vé?

¹¹ Nye me na: e si ya Sinéar, asu ya lôñe minga a ne e njiñelete ésua nda . Eyoñe nda é maneya lôñeban, ba ye telé minga ate éto jé yôp tekʼafôʼôsan.