ZAKARI 4 - Bible en langue Bulu

Nyenane tane: ébeʼe bifufub a beôlivié

¹ Engele a mbe a kobôʼô ma a nga beta zu a vele ma avalʼane môt ba velʼôyo.

² A nga sili me na: ô lôô jé? Me na: jôm me lôô é ne ébeʼe belambe é too or, éfuti mbon é too éfase ya yôp, belambe zamgbwa a minsoñe zamgbwale ki bi too mfaʼa wo dañ ôyabe yôp;

³ beôlivié bebaé be too je mefefel, wua e mbo nnôme ya ébi bifufup, nyô mbok mbo ngal.

⁴ Nde me nga beta kobô a sili éngele a mbe a kobôʼô me na: a Nti wom, jame te da liti jé?

⁵ Nye me na: ye ô nji yem e jame jame te da liti? Me na: momo a Nti wom.

Mimbañete milaa asu Zôrôbabél

⁶ Ve beta toʼé nkobô a jô me na: belambe bete zamgbwa be ne ndeme ya mise me Nti; ma fombô si ése. Nkôbô Nti a nga kobô asu Zôrôbabél ñwô le: sake amu ndañan nge évô, foʼo vʼamu Nsisime wom, nalé Nti a ne ngul ése a jô.

⁷ O mbe jé, wo, beta nkô? O ntoo njeʼese ôsu be Zôrôbabél, e vôm a nga vaa akoʼo ya jua ayenga été na: yaa! Yaa! Asu akoʼo ya Jua te.

⁸ Ajô Nti e nga zu be ma na:

⁹ e mo me Zôrôbabél e mme me nga bôôé mbôkaʼa ya nda nyôna, e mme fe ma ye mane je, a mia ye yeme na: Nti a ne ngul ése nye a lômeya ma.

¹⁰ Za ñhe a mbe a viniʼi môse metataʼa me ne teke zôʼé? A ntoo ñhe ve vak éyoñ a yen akoʼo e ne ntoban e mo me Zôrôbabél!

¹¹ Nde ñhe ma beta kobô a sili nye na: beôlivié be ne ébi bifufup e mbo nnôm a mbo ngal be ne ndeme jé?

¹² Me nye éyoñe baa na: mintyaé mi ôlivié mibaé, mia sôé mbone or wop e minkoñ mi or mibaé, mi ne ndeme jé?

¹³ Nye me na: ye ô ne te yeme jôme mia liti? Me na: momo a Nti wom.

¹⁴ Eyoñe te ñhe a jô me na: mia liti bôte bebaé be ne ñwoʼone mbon be tele asu Nti ya si ése.