ZAKARI 2 - Bible en langue Bulu

Minlak a belui melui

¹ Me nga bete mis a yene minlaʼa minyin.

² Nde ma sili éngele a mbe a kobôʼô me na: mi ne ndeme jé? Nye me na: minlaʼa mi nga mialane Yuda, Israél a Yuda mmie le.

³ Nde Nti a liti ma belui melui benyin.

⁴ Me na: bana ba zu bo jé? Nye me na: minlak mi ne mi mi nga mialane Yuda, avale môt a nji fe bo nguleya bete nlô. Ve belui melui ba te zu bo mie na mi fôʼôban, asu ya kpwé minlaʼa ya meyoñ mete, meyoñ me nga bete minlaʼa miap e si ya Yuda na a mialan.

Nkole ya veʼe si

⁵ Nde ma bete mis a yene môt a bili nkole ba veʼe wô si e wo.

⁶ Me môt ate na: wo ke vé? Nye me na: a ke veʼe Yérusalém a yene ndame jé a nté wé.

⁷ Ane éngele a mbe a kobôʼô ma a nga subu ôsu, nyô mboʼo ki a zaʼa tôbane nye,

⁸ a jô nye na: mateʼe a kobô ndômane môte nyô, ô tele wé a jô nye na: Yérusalém a yiane bo tison é yoo, amu jama bôt a betit ba ye tabe été.

⁹ A ma ma ye tabe valé, nalé Nti a jô, ma ye bo ôleme nduan mfaʼa wé a ézezañe jé, ma ye bo étôtoʼo jé.

Nti a bulane bekee minkôm

¹⁰ Nkelan! Nkelan! Kôlaʼane si yʼakôé avôl, nalé Nti a jô. Mi kôlôʼô mekuʼu menyine ya si, e vôme me nga mialane mia, nalé Nti a jô.

¹¹ A bôte ya Yérusalém mi too minkôme Babilôn, boʼon avôle ya tup.

¹² Avale di nde Nti a ne ngulʼése, Nyô a nga lôme ma ajô meyoñ me nga sa mia a kobô na: nyô ase a nnambe mia, a nnambeya fe nyia dise wom.

¹³ Yaa, me nyô, ma ye telé be wo wom e ngame yat, nalé ba ye bo jôme nsa ya besiñe bap, a mia ye yeme na, Nti a ne ngulʼése nye a lômeya ma.

¹⁴ Loñ ôyenga, vaʼak, a ngone ya siôn! Amu me nyô ma zu tabe ézezañe jôé, nalé Nti a jô.

¹⁵ Jama meyoñ a ye kabetane Nti môs ôte. Ba ye bo bôte bame mamien, a me ki ma ye tabʼézezañe jôé. Eyoñe te wo ye yeme na Nti a ne ngul ése nye a lômeya ma be wo.

¹⁶ Nti a ye nyoñe Yuda ane ngabe jé e si é nʼétyi été. A a ye beta tobe Yérusalém éyoñe jia éfe.

¹⁷ Etétéa ése é kpwaʼa ne kubuk asu Nti, amu a kôlô si a soʼo e nda jé é nʼétyi.