ZAKARI 13 - Bible en langue Bulu

¹ Eyoñe te, anjeñ da ye vame si asu ya sôb abé a mvine ya mvoñe bôte David a e bôt be too Yérusalém.

Zambe a ye vaa bengunemelan A bekulu mejô be ne minsos

² Môs ôte, nalé Nti a jô, ma ye vaa bengunemelan e si nyô, a teke môt a ye beta tote môé map. Ma ye fe vaa ba ba jô na be ne bekulu mejô a tyame nkômbane wônan mi bili ajô biyeñeyeña.

³ Nge môt a beta kulu mejô, ésaa wé émien a nyia wé émien ba ye jô nye na: wo yiane wu, amu wo kômbô jô na wo kobô asu Zambe, ve e ne bebela na wo laane minsos; a bebiaé bé bebien ba ye wôé nye nté a kulu mejô.

⁴ Eyoñe te bekulu mejô ba ye wôʼôsone ya kulu mejô a kañete miñyenane miap, ba ye bo te beta bo ayoʼo ya duʼu bôt a njaan alôʼô bekulu mejô e ne mboon a mimvot.

⁵ Môt ase ya be be a ye jô na: me nji bo nkulu mejô! Me ne mbéé mefup, amu be nga kuse ma aso mongô.

⁶ A nge môt éziñ a sili nye na: meveñ me ne wo nkuʼu mana ma tinan aya? a ye yalane na: me nga nyoñe me e be bemvôé bam.

Ba yeme Nti ane Zambe

⁷ A nkpwaté mekôn wosaʼane mbaʼale mintômba me nga bo élat a nye. Wôék mbaʼale mintômba, éyoñe te mintômba mia ye mialane vôm ase, a ma ye jimbi bone ya mbam.

⁸ A beta jô na: ngab ébaé ya mengabe melale ya bôt be too si ja ye wu, ngabe lale étam nje ja ye nyiñ.

⁹ Ma ye fubu a veʼele bôt ba ye nyiñ ane or a argent ba lôt e nduan. Eyoñe te ba ye yeʼelane ma, a ma ma ye yalane be. Ma ye jô be na: e bôte bam a be ba ye yemete jô na: Nti a ne e Zambe wongan.