ZAKARI 12 - Bible en langue Bulu

Yérusalém a kôtéban

¹ Mbañete Nti ajô Israél. Avale di nde Nti, a jô, Nyô a nga ndamé yôp, a bôé mbôkaʼa ya si, a ve môt ényiñ a jô na:

² Ma zu bo Yérusalém na a bo élaé é ne njalan a woone yʼayaa dam: a ye ve meyoñ ma bômane nye bijôñe mis. Bijôñ bia kui e be Yuda ase, éyoñe Yérusalém a ye dilibane bita.

³ Eyoñe te ma ye bo Yérusalém avise mekok , nde meyoñ ma ye kômbô bete si. Ba ba ye veʼele, ba ye balé meveñ. Eyoñe te meyoñ mese ya si nyô ma ye vute ngam a wosane Yérusalém.

⁴ Ma jô na, éyoñe te, ma ye bo bikabela biabe na bi soʼo woñ, a bewulu bikabela bap mekut, a woñ wo ye bi be. Ma ye kamane Yuda, ve ma ye bo bikabela ya meyoñ mefoʼo ndim.

⁵ Bivete ya Yuda bia ye jô bibiene na: e be Zambe, Nti yʼémo, nye bôte be too Yérusalém ba nyoñe ngule jap.

⁶ Eyoñe te, ma ye bo bivete ya Yuda bi funan éwoñ ja diʼi afan, nge ane ésiʼi nduan ja yôñ e bikumba bi fône si! Ba ye tyame meyoñ e mekuʼu mese ma bômane be. Ve da na bôt be too Yérusalém ba ye kʼôsu a nyiñ e tisone jap.

⁷ Nti a ye taté zu volô menda me bôte ya Yuda, amu mvoñe bôte David a bôte be too Yérusalém ba dañe bôte bevoʼo ya Yuda.

⁸ Eyoñe te Nti a ye kamane bôte ya Yérusalém: ba ba dañ ateʼe be be, ba ye bo ngu ane David, a e mvoñe bôte David ja ye bo mfaʼa wop ane Zambe, avalʼane éngele Nti, a wuluʼu ôsu viap.

Minyôn e si ése

⁹ Nti a jô na, éyoñe te, ma ye zu tyame meyoñ mese ma kômbô wosane Yérusalém.

¹⁰ Eyoñe te ma ye sôé nsisime ya mbamba nkômban a meyeʼelan e be nda David a bôt be too Yérusalém. Ba ye fombô ma, nyô be nga jii akoñ. Ba ye yône nye ane ba yôn ntôle monafam.

¹¹ Eyoñe te abui miñyôn da ye bo e Yérusalém avalʼane mi mia boban asu Adad-Rimmon e mbiʼili Megidô.

¹² Abum ese ya si da ye bo awu mfaʼa wé: abume ya mvoñe David, vôm étam, a binga vôm étam, di ya mvoñe Natan, vôm étam; a binga vôm étam;

¹³ di ya mvoñe Lévi, vôm étam, a binga vôm étam; di ya mvoñe Simeyi, vôm étam, a binga vôm étam.

¹⁴ Avale te fe mebum me bôt mevoʼo mese ma ye bo awu, abum ese mfaʼa wé, a binga mfaʼa wop.