ZAKARI 10 - Bible en langue Bulu

Silaʼane Zambe sa ñhe bengunemelan

¹ Silaʼane Nti na a lôme mia suʼu ésep: amu nye a bo akôs. A ye ve mia abui mveñ a bo na mefube me môt ase me faa bilok.

² Bengunemelan mia sili mam, ba yalane mia ve minsos. Mimvimviʼi mia bo minkulane mi mam, mi ne minsos, biyeyem mia kañete bi ne momo jam, mvolane nlem mia soo wô ô ne meduʼan. Ajô te bôte bam be nga ke, éngôngo ane mbam ô ne te mbaʼale.

Mengakaʼa ya nkôtan

³ Me yaaya bebaʼale mintômba be ne bikuu, mbe ba veʼe feʼe ya wulu ayoñe dam, ma ye tebe be ngame yat. Yaa, ma jô nalé na: ma, Nti yʼémo, ma zu belane mbame wom, ayoñe Yuda. Ma ye kee de e mewosan, ane ékabela ya duma.

⁴ Bivete mevale mese bia ye so be nye, bi too éwôlô anʼakoʼo ya jua, ñyeman anʼakône ya nda éndelé, ngu anʼélaé bita.

⁵ Bia ye wulu ane bevevee bewosan, be tibiʼi ba ba wosane be a mebo, ane mbuluʼu ya minjoñ. Ba ye wosane nalé amu ma, Nti, me ne be ngam. A bewulu bikabela be ne besiñ ba ye woban ôson.

⁶ Ma ye yemete ayoñe Yuda, ma ye kôté ayoñ Israél. Ma ye bulane be jale dap, a ma ye liti nyeʼane wom avalʼane nge me nji tame bene be. Me ne Nti e Zambe wop a ma ye yalane meyeʼelane map.

⁷ Bôte yʼEfrayim ba ye yené ngu ane bezimbi, mevak vʼane nge be nga nyu woon. Bone bap ba ye vak éyoñe ba yene jame te, minleme miap mia ye jaé a mevak amu Nti.

⁸ Ma ye loon ayoñe dam a kôane de, amu me tyiʼiya na ma kôté de. Ba ye bo abui ane melu mvus.

⁹ Me nga mialane be meyoñ été ane ba miase mvoñ, ve e mesi me nʼôyap, ba ye simesane ma. Ba ye bo nguleya nyiñe wé, ba be bone bap, wôna ba ye beta so.

¹⁰ Ma ye vaa be Ejipte a Asiri, ma ye zuu be vôme wop, ma ye fe kee be e si ya Galad a Libañ, ve toʼo wé, afôla da ye jembane be.

¹¹ Ba ye dañ évele mañ, a ma, Nti, ma ye bibi mintyôa, toʼo Nil fe a ye bo nkôt. Asiri a ne mebun a ye koo yôp, Ejipte ja ye dimili ngul ése.

¹² Ma ye yemete ayoñe dam, da ye bo avale ma yene mvaé nnôm éto. Ma Nti ma jô nalé.