ZAKARI 1 - Bible en langue Bulu

Bulaʼan e be Nti

¹ E ngone muame ya mbu baa Darius a nga jôô, ñwô Nti a nga kobô nkulu mejô Zakari, e mone Bérékia, e mone Iddô na:

² Nti a nga wôʼô bʼésoo bôé ôlun abui.

³ Ajô te jôʼô be na: avale di nde Nti a ne ngul ése a jô na: Bulaʼane be ma, nalé Nti a ne ngul ése a jô, a ma ma ye bulane be mia, nalé Nti a ne ngul ése a jô.

⁴ Te mia vu bʼésoo benan mbe bete bekulu mejô be nga kobô be melu mvus na: avale di nde Nti a ne ngul ése a jô na: bulaʼan a bene mbia mezene menan a mbia mimboone benan, ve be nji wôk nge nyoñe me ngap, nalé Nti a jô.

⁵ Ve be, bʼésoo benan, be ne vé den? Bekulu mejô ki ye be ngenane be vee?

⁶ Ve minkobô miam a mintyiʼane miam me nga kalane bebo bisaé bam, bekulu mejô, ye mi nji kui e be bʼésoo benan? Eyoñe te be nga bulan a meme na: Nti a ne ngul ése a nga tyiʼi na a bo bia avalʼane mezene mangan me né, a avalʼane mboone wongan ô né, a avale te foʼo a nga bo bia.

Nyenane bikabela

⁷ E mbu baa Darius a nga jôô, e ngon awôm a jia ba loone Sebat é too melu mewôm mebaé a menyin, nje Nti a nga kobô nkulu mejô Zakari, e mone Bérékia, e mon Iddô na:

⁸ Alu di, me yeneya jame dina na: môt a bete évele ékabela yôp, a tele e zañe bone bilé, e mbiʼili si. Bikabela bife bi too nye mvus, nyôl évele, angôô a éfumulu.

⁹ Nde ma sili nye na: a Nti, bikabela bi bia liti jé? Engele a mbe na a yiane kobô a nga yalane me na: ma zu kate wo jame te.

¹⁰ Ve môt a nga tele e zañe bone bilé a nga kobô na: e bikabela Nti a lômeya na bi wulu vôm ase e si nyô mbie le.

¹¹ Eyoñe te bikabela bi bi nga kobô Engele Nti a nga tele e zañe bone bilé na: bi maneya bômane si, tame yen si é ne mvoʼé a ja woʼon.

¹² Eyoñe te éngele Nti a nga beta jô na: a Nti a ne ngul ése, a kui éyoñ évé wo ye langane ko Yérusalém a bitisone ya Yuda éngôngo, mbie wo wôʼô ôlun den a ntoo mimbu mewôme zamgbwa?

¹³ ajô te Nti a nga ve éngele a mbe a kobôʼô ma éyalan ja ve ngule nyô, ji ja bôé môte nleme si.

Zambe a ko Siôn éngôngo

¹⁴ Nde éngele a mbe a kobôʼô ma a nga jô me na: yôtaʼane na: avale di nde Nti a ne ngul ése a jô na: ngul aban é bili ma asu Yérusalém a asu Siôn.

¹⁵ Ve ma wôʼô meyoñ me tele mvoʼé mbia ôlun; amu na me nga too me wôʼôlun ve tyôtyoé, ve me zuya kôʼôlane bidime bié.

¹⁶ Amu ajô te Nti a jô na: ma beta zuu Yérusalém a nlem éngôngo, nda jam ja ye beta lôñeban, nalé Nti a ne ngul ése a jô, a ba ye beta limi nkol e Yérusalém.

¹⁷ Betaʼa yôtane na: Avale di Nti a ne ngul ése a jô na: mvom é ngenane momo e bitisone biam. Ve Nti a ye beta volô Siône nlem a tobe Yérusalém.