YUDE 1 - Bible en langue Bulu

Mebatan

¹ Ma, Yude, mbo ésaé Yésus Krist, monyañe Yakob, ma tili ba be ne nloon, nyeʼan e be Zambe Esaa, a mbaʼalan mfaʼa Yésus Krist.

² Mvam, mvoʼé , a nyeʼan, bi zaʼa e be mia abui abui.

Mbia beyeʼele

³ A bemvôé bam, éyoñ me nga dañe kômbô tili mia ajô nyiane wongan bia bese, me mbe ntindane ya bo nalé, amu me tômôlô mia na, mi wosan, a kamane mbunan ô nga veban e be mimfufup éyoñe jia nté ényiñ.

⁴ Amu bôt bʼéziñ be nyineya e zañe jenan asoé, mbe bete mveane mekua wop ô maneya litiban. Be ne mbia be bôt ba kôñelane mvame Zambe wongan bisôk, a katee susuʼa Njôô, a Nti wongan Yésus Krist.

⁵ Ma kômbô na mi simesan, akôsa bo mi maneya yeme mame mete mese na, Nti, éyoñ a nga mame nyii bôte bé e si ya Ejipte, a nga jiane ba be nga bo ayete minlem.

⁶ E be éngele be nga bo te baʼale nkôñe wop, ve be nga liʼi étabaʼa jap, a baʼaleban nkaʼan kom, e dibi été, akekui ntyiʼane mejô ya beta môs .

⁷ Mfaʼa Sodom a Gomor, a bitison bi nga bômane bie, be nga bo mejian avale daada ane be, a tôñe minsôn mia selan abialé dap. Be ne ntelan ane éveʼela, e njañane ya nduane kom.

⁸ Avale te fe bôte bete, e befeʼe ya biyeyeme biab été, ba bo minsône mvin, a biasé ngule njôan a ta e ba be ne bitôtok.

⁹ Jaʼane Miké, éyoñ a nga sañetane Satan, a kobô nye ajô mbime Môze, a nji veʼele kobô nye nkobô meta, ve a nga mane jô na, Nti a vaʼa wo melep .

¹⁰ Ve bôte bete ba kobô e mam be nji yem ébiasé. A e jame ba yem ñyemane ya nlô, akut ane betit, wo kee be ve njañan.

¹¹ Amu ajô tañ, nde be nga ku e meveʼele me Balam a be nga jañ nkangane Koré été.

¹² Bôte bete bebien mbe ba ve ndiane wônan ya nyeʼane bobenyañ mvin, éyoñ ba di te wôʼôson a toñe ve bebien. Be ne minkut mi ne tee mendim, mmie mite mia dutuban a évuñulu. Be ne bilé bi ne tee bibuma, ñwuan biyoñe bibaé, ntéane si.

¹³ Be ne mbia mintyôa mi mañ, mmie mite mia kuli avule ya ôsone viap, ateté da ndeñendeñ, mbaʼalan e dibi ya nnôm éto.

¹⁴ Enok a nga kulu mejô ajô dap, e môse zamgbwale, ataté melu me Adam, a jô na: Tameka yenan, Nti a zu nsamba, a bizuʼu mimfufube mié.

¹⁵ A zu tyiʼi si nyô ése mejô a kpwéé mbia be bôt bese, a mbia mimboon mi abé miap mise ya wôé, a mbia mejô mese, e mbia beboabé be nga kobô nye.

¹⁶ E mbe bebiene le! E ba ba kobô e menyiñ, a bikalak éyoñ ése. Ba dutuban a mbia minkômban. Menyu map ma kobô bivuvuʼu bi mam a belane bôt, ve amu mfi wop bebien.

Melep mfaʼa bebuni

¹⁷ Ve mia, a bemvôé bam, simesaʼan minkulane mejô minlôman mi Nti wongan Yésus Krist be nga taté jô mia.

¹⁸ Be nga bo be jôʼô mia na: Melu ma suʼulan, bôt ba ye zu a kpweʼele mia, mbe bete ba wulu e mbia minkômban miap été.

¹⁹ Bebiene le! Ba mias nkandan mengam. Be bili ve asimesane ya si nyô. Nsisim a nji bo e be be.

²⁰ Ve mia, a bemvôé bam, lôñane mia bebien e mfubane mbôkaʼa mbunan e yôp yeʼelan e Nsisim été.

²¹ Tabaʼan e nyeʼane Zambe été. Ajô ényiñe ya melu mese, telaʼane ndi minleme jenan e nkoon éngôngol Nti wongan Yésus Krist été.

²² E ba ba sôan, dutaʼane be a njiban ôse.

²³ Nyiʼane be, a vaa be nduan. Wôna, mfaʼa ba bevok, dutaʼane be a nkoon éngôngo, ve a woñ, a vini, jaʼan alôʼô e ne mvin a zene ya minsône miap.

Mbamba njôan

²⁴ E be nyô a ne ngule ya baʼale mia mi za veʼele ku, a telé mia ôsu ya étôtoʼo jé mi too teke bijô e mevak été,

²⁵ e be Zambe étam, nyô a ne nyii wongan amu Yésus Krist Nti wongan, étôtok, éjijin, ngu a njôan bi boʼo be nye te na biyoñ bise bi boban, éyoñe jina a kui miaé mise, Amen!