YONA 3 - Bible en langue Bulu

Yôna a kate foé e Ninive

¹ Ane Nti a nga kobô Yôna éyoñe baa na:

² Kôlôʼô si, kele Ninive, beta Tison ate, kate be foé nyô ma kate wo.

³ Ane Yôna a nga kôlô si a ke e Ninive avale Nti a nga jô nye. Ninive a mbe étua beta tison môse mi dulu mila.

⁴ Eyoñ Yôna a wuluya ngume môs , a nga yôtane na: A liʼiya foʼo ve melu mewôm menyin, wôna Ninive a ye tyamban!

⁵ Ane bôte ya Ninive be nga buni nkobô Zambe. Ane be nga bendé ntyiane bidi, a jaé minkuta, ataté bôbenen a kui bôbetok.

⁶ Ane foé é nga kui e be Njô bôte ya Ninive: ane a nga kôlô éto njôô jé, a vaa kôte jé, a jaé nkuta a tabe asubʼété.

⁷ Ane a nga mialan foé nyô e Ninive na: Njô bôt a tyiʼiya a minkukuma mié mise na: Bôt, betit, mimbam mi beta biyem a mimbam mi bone biyem, môt a bo te tyeʼe jôm ya di nge nyu mendim.

⁸ Bôt a betit be jaé minkuta, be loone Zambe a ngul ése a môt ase a bulane mvus e mbia ntabane wé a mboon évô ya mo mé!

⁹ Za a yem nge Zambe a ye bulan a jôban a jôʼé ayaa dé da yôñ ane nduan, ndemben bia ye bo te jañ?

¹⁰ Eyoñ Zambe a nga yene mboone wop, avalʼavé be nga bulane mvus e mbia mboone wobʼété, ane a nga jôban abé a nga tyiʼi na a bo be: nde a nga jôʼé te beta bo de.