YOANES 9 - Bible en langue Bulu

Yésus a bo môt a nga bialé ndim mvoʼé

¹ Valé Yésus a lôtôk, ane a nga yene môt a nga bialé ndindim.

² E nde beyéʼé bé be nga sili nye na: A Rabbi, ye môte nyô, ye bebiaé bé, za nye a nga sem, nde a nga bialé de ndim?

³ Ane Yésus a nga yalane na: Toʼo môte nyô, toʼo ke bebiaé bé, môt éziñ a nji sem, e ne foʼo ve amu na mimboone mi Zambe mi yené e be nye.

⁴ Bi bili na bi boʼo bisaé bi môt a nga lôme ma e nté môs ô ngenan. Alu da zu, éyoñe môt éziñ a se fe ngule ya bo ésaé.

⁵ Eyoñe me nee si ndône mu, me ne éfufub ya si ndôn.

⁶ Akobô a nga kobô nalé, a tui mendene si, a nga fuʼu étek a menden, a woʼo nye ndoboʼo te e mis,

⁷ a jô nye na: Kele woban étame ya Silôé (nalé a tinane na: Nlôman). E nde ñhe a nga téé, a mane ke woban, a nga bulan a yenek mvoʼé .

⁸ E bôte baa be nye be nga too vôme wua, a ba be mbe be yene nye ôsusua a too nzezak, be nga ke ñhe ba jô na: Ye sa môte nyô e nye a mbe a too ve si a jakéʼé bôte biôm?

⁹ Bôte bevoʼo be nga jô na: Emiene le, e ba bevoʼo ke na teke jôm, baa nye ba funa funan. E môte nyuna ki a jôʼô na: Mamiene foʼo nyô.

¹⁰ Ane be nga jô nye na: E mise môé ma te kuiban aya?

¹¹ E nde a nga yalane na: E môte ba loone na Yésus a nga fuʼu étek, a woʼo me je mis a jô me na, Kele Silôé, ô wobaan. Ake me nga ke, me mane woban, ane me nga yen.

¹² Ane be nga jô nye na: Môte ate émien a ne vé? Nye na: Me nji yem.

Befarizieñ ba fas ajô mvoʼé ndindim

¹³ E nde be nga kee môt a mbe ndime nyuna e be Befarizieñ.

¹⁴ E môse Yésus a nga fuʼu éteʼe wu a kui nye mis, ô mbe môse Sabat.

¹⁵ Ane Befarizieñ be fe be nga sili nye na mis mé me nga kôme bo mvoʼé aya? E nde nye kʼa nga jô be na: A nga woʼo ma éteʼe mis, me mane woban, ayene te ma yene di.

¹⁶ Ane Befarizieñ bevoʼo bʼéziñ be nga jô na: Môt ate a nji so be Zambe, amu a nji baʼale atiñe Sabat! E ba bevoʼo na: E môt a ne nseme minsem a ne bo bitua bi mam ana aya? Ane nkandan ô nga bo e zañe jap.

¹⁷ E nde be nga beta jô ndindime na: Wô wo jô ajô dé aya, amu na e nye a te kui wo mis? Ane nye kʼa nga jô na: Kʼa ne nkulu mejô!

¹⁸ Ve da Beyude be teke yebe ajô dé na a mbe ndim, e nde a nga yen, akekui be nga bañete bebiaé be môte mise me nga yombô.

¹⁹ E nde be nga sili be na: Ye môte nyô e nye a ne mone wônan mia jô na a nga bialé ndim? A yen éyoñe ji aya?

²⁰ E nde bebiaé bé be nga nyoñe nkobô a jô na: Bia yeme na e môte nyô a ne mbiane mone wongan, a na a nga bialé ndim.

²¹ Aval avé a nga yen éyoñe ji, bi nji yem, a za émien ki a nga yooé nye mis, bi teke yem. Silaʼane émien, a nto môt, émien a ye kañete ajô dé.

²² Bebiaé be môt ate be nga jô mame ma, be koo Beyude woñ, amu éyoñe te Beyude be maneya kui tyiñe na nge ba ye wôʼô môt éziñ a meme na Yésus a ne Krist, ba ye titane nye aba Zambe.

²³ Ajô te nde ñhe bebiaé be nga viane kobô na: Emien a nto môt, silaʼane nye minsili.

²⁴ E nde ñhe, éyoñe baa, be nga beta loone môt a mbe ndim a jô nye na: Vaʼa Zambe duma; ve mfaʼa wongan, bia yeme na môt ate a ne nseme minsem.

²⁵ Ane ndindim ô nga yalane na: Nge a ne nseme minsem, me maa yem kik; e jam dada ma yem e ne ve na me mbe ndim, ve éyoñe ji ma yen.

²⁶ E nde be nga beta jô nye na: A nga bo wo jé? A nga yooé wo mis aya?

²⁷ Ane a nga yalane be na: Me maneya kañete mia ajô di, ve mi teke yebe; jé éfe e nje mia kômbô beta wôk? Ye na mia fe mi nga kômbô bo beyéʼé bé, nga?

²⁸ Ane be nga kpweʼele nye be jôʼô na: Nge wʼô ne ñyeʼé wé, bi bi ne beyéʼé be Môze.

²⁹ Mfaʼa wongan, bia yeme na Môze nye Zambe a nga kobô nye, ve nyuna ki bi nji yeme mfaʼa a so.

³⁰ E nde môt ate a nga nyoñe nkobô a jô be na: E jame ma semé e ne na mi mi nji foʼo yem e mfaʼa a so, ve nye a te yooé me mis.

³¹ Bia tuʼa fe yeme na Zambe a ne te wôʼô bebo mam abé , ve nge môt a ko Zambe woñ a boʼo fe nkômbane wé, Zambe a wôʼô nye.

³² Bi ngenane teke tame wôʼô foé na, môt éziñ a nga yooé e môt a nga bialé ndindime mis.

³³ Nge e nga ye bo na môt ate a nji so be Zambe, a nji ke ye bo jam éziñe nalé.

³⁴ Ane be ke be nga nyoñe nkobô a jô nye na: E wo ô nga bialé e minsem été ngumba ngumba, wo zu yeʼele bia jé? E nde be nga titane nye, be kulu nye nseñ.

Ndim ya Nsisim

³⁵ Yésus a nga mane wôʼô na be kuluya nye atan. Eyoñ a nga tôbane nye, ane a nga jô nye na: Ye wo buni foʼo Mone Môt?

³⁶ Ane nye kʼa nga yalane na: A ne za a Nti, ane me ne buni nye?

³⁷ E nde Yésus a nga jô nye na: Ke ô maneya yene yen nye, amu e nye ate a laane wo nyô.

³⁸ Ane a nga jô na: Ma buni, a Nti: e nde a nga kute meboñ si a kañe nye.

³⁹ Eyoñe te Yésus a zu jô na: Me nga zu tyiʼi ajô ya si ndône nyô, a ntoo na e bôte be nji yen, be nga yen, a ba ba yene ki be nga viane ku ndim.

⁴⁰ Awôʼô Befarizieñ baa be nye be nga too be wôʼôya mame ma, ane be nga jô nye na: ye na bia fe bi ne mindindime nga?

⁴¹ Nde Yésus a nga jô be na: Nge mi too bo mindindim, ve mi nji bi nsem. Ve éyoñ ji mia jô na, bia yen, nsem wônan ô tootoo.