YOANES 5 - Bible en langue Bulu

Yésus a yete mbôbôk e Yérusalém

¹ E mvuse mame mete, e nde abôʼô beyude e nga bo, ane Yésus a nga bet a ke e Yérusalém.

² E Yérusalém valé, e mfaʼa ya mbé mintômba, beta ndame tam a nga too, be loʼone je e nkobô ébre na Bétzéta, é bili beta biyas bitan e mbési,

³ vôm ate e nye bizuʼu minkôkon bi nga bôô: mindindim, miñyeyem a mimbôbôk, mi mbe mi yangeʼe na mendim me fôʼôsan;

⁴ amu éngele a mbe a sisik ébata mingum biyoñ a zu fôʼô mendim, a e môt yʼôsu ase a mbe a sisik éyoñe mendim ma fôʼôsan, a nga bo mvoʼé , jaʼane ôkone wé ô mbe zʼavale ôkonôô.

⁵ Môt éziñ a mbe valé, a koneya tañe mimbu mewôm melal a muam.

⁶ Eyoñe Yésus a yeneya nye a bôô si, a yemeya fe na a mbili ôkone te ayap, e nde a nga jô nye na: Ye wo kômbô bo mvoʼé ?

⁷ Ane nkôkon ô nga yalane Yésus na: A Nti, me nji bi môt a ne bo na, éyoñe mendim ma kumutu, a ke wua ma étam été; éyoñe me ngenan me kelek, môte mfe a viane señesan ma ôsu.

⁸ E nde Yésus a nga jô nye na, kôlôʼô si, nyoñe ôkala wôé ô wulu!

⁹ Ane môt ate a nga bo mvoʼé été été, a nyoñe énoñe jé a wulu. Môs ôte ô mbe môse Sabat.

¹⁰ Ane Beyude be nga jô môt a nga yete na: Ke den a ne Sabat, ajô te ô nji bi ngule ya beʼe énoñe jôé.

¹¹ E nde nye kʼa nga yalane be na: E môt a te bo ma mvoʼé e nye a te jô me na: Bekeʼe énoñe jôé ô wuluu.

¹² Eyoñ éte be nga sili nye na: E môt a te jô wo na: Bekeʼe ô wuluu a ne za?

¹³ Ve môt a nga saéban a nji yem za a nga saé nye, amu Yésus a nga sôlan, éyoñ abui ndula bôt a sulaneya vôm ate.

¹⁴ E mvus éte, ane Yésus a nga ke koone nye e nda Zambe été a jô nye na: O lôô ane ô nto mvoʼé , te ñhe wo beta sem, e jam da lôt nsem e za bi wo.

¹⁵ Ane môt ate a nga ke, a nga ke a kañete Beyude na Yésus nye a nga bo nye mvoʼé .

¹⁶ Beyude ki be nga viane feme Yésus, amu na a nga bo mame mete e môse Sabat.

¹⁷ E nde Yésus a nga yalane be na: Esaa wom a bo ésaé a zaʼa kui éyoñe ji, a ma fe ma bo ésaé.

¹⁸ Beyude be nga beta ñhe dañe jeñe jeñ na be wôé nye, amu na, a nji tyame ve atiñe Sabat étam, a tuʼaya fe beta jô na Zambe a ne Esaa wé, a nga bo émien a Zambe nté nkôñe wua.

Ngulenjôane Mon

¹⁹ Ane Yésus a nga yalan a jô be na: Bebela, bebela émien, ma kate mia na, Mon a se ngule ya bo a nye émien e jôm a nji yen Esaa a boʼok; amu na e mam Esaa a bo, Mon a bo fe me avale da.

²⁰ Amu na Esaa a nyeʼe Mon a liti fe nye e mame mese a bo, a ye fe liti liti nye e mame ma dañe mana, na mia bebien mi bo feʼe ne vema.

²¹ Aval ane Esaa a wômôlô mimbim a ve ényiñ, avale te fe Mon a ve ényiñ e be môt ase a kômbô ve.

²² Esaa a nji ve môt éziñ mekua, amu a nga ve Mon ngul ya tyik ajô ese,

²³ e nde bôte bese ba ve Mon ôluʼu be vaʼa fe Esaa ôluʼu avale da; e môt a nji ve Mon ôluʼu a ne fe teke ve Esaa a nga lôme nye ôluʼu.

²⁴ Bebela, bebela émien, ma jô mia na e môt a wôʼô mejô mam a buni fe e Nyô a nga lôme ma, môt ate a mbili ényiñe ya melu mese, a nji zu vôm ya ntyiʼane mejô, amu a lôteya a kôlôʼô awu a kui ényiñ.

²⁵ Bebela, bebela émien, ma jô mia na, awolo da zu, e soya ke so, éyoñe mimbim mia ye wôʼô tyiñe Mone Zambe, e bôte ba ye wôʼô je mbe ba ye nyiñ.

²⁶ Aval Esaa a bili ényiñ e be émien, avale te fe a nga ve Mone na nye fe a bi ényiñ e be émien.

²⁷ E nde fe a nga ve nye ngul éjôé ya tyiʼi mejô, amu na a ne Mone Môt.

²⁸ Te mia vembe jame te, amu awolo da zu, awolo bôte bese be ne e mesoñ ba ya wôʼô tyiñe jé;

²⁹ bevok, e ba be nga bo mbamba be mam, ba ye wômô a nyoñ ényiñ, e ba bevok, e ba be nga bo mbia be mam, ba ye wômô a nyoñe mekua.

³⁰ Me nji bi ngule ya bo jam éziñ a mamien étam; avale ma wôk, e nde ma tyik, a ntyiʼane wom ô ne zôsôô , amu me nji jeñ nkômbane wom, ma jeñ ve nkômbane môt a nga lôme ma.

Bengaa ba tyiʼi mvaʼa ajô Yésus

³¹ Nge ma tyiʼi mamiene mvaʼa, e mvaʼa ma tyik a nji bo bebela.

³² Môte mfe e nye a tyiʼi mvaʼa ya be ma, a ma yeme na e mvaʼa a tyiʼi ma a ne foʼo bebela.

³³ Mia bebien mi nga lôme bôt e be Yôanes, ane a nga tyiʼi mvaʼa ntyiʼane bebela.

³⁴ E mvaʼa ma tyik, me nji nyoñe nye e be môta binam, ve ma kobô mame ma na mi bi ényiñ.

³⁵ E môt ôsu a mbe lambe a yôñ e vaʼa fe éfufup, ve mi nga kômbô vak a éfufub jé ve mon étun éyoñ.

³⁶ Ve me ki me bili nkañetan wo dañ wu Yôanes: amu mingume mi mam Esaa wom a nga ve me na me bo, e mame ma bo mete e me ma liti na Tate a nga lôme ma.

³⁷ A Esaa wom a nga lôme ma e nye a tyiʼi mvaʼa ya be ma. Ve tekeʼe éyoñ éziñ mi nga kômbô vôʼôlô tyiñe jé nge yene kik e mam a liti,

³⁸ a mi nji bi mejô mé me too mia e minlem été, amu na, e nlômane wé a nga lôm, mia bebien mi nga ben mi buniʼi wô.

³⁹ Mia ke mia fas Mintilan, amu mia bebiene mia yene na, ényiñe ya melu mese, mi ne nyoñ je été; a Mintilane mite mibien, mia boʼolô ajô dam.

⁴⁰ Ve mia ben mi zaʼa be ma na mi bi ényiñ.

⁴¹ Me nji nyoñe duma éziñ e be bôt;

⁴² ve ma yeme mia, mi nji bi nyeʼane Zambe e minlem.

⁴³ Me nga so a jôé Esaa wom, e nde mia bene nyoñe ma; nge môte mfe a ke ñhe so a jôé dé émien, nyuli ate e nye mia ye nyoñ.

⁴⁴ Mi ne ngul ya buni aya, mia mia yeme nyoñe ve duma da so e zañe jenan, ve duma da so e be Zambe étam kik, mi te jeñe de?

⁴⁵ Te mia simesane na ma ma ye somane mia e be Tate; Môze nye a ye somane mia, e Môze mi too nye ndi.

⁴⁶ Amu na, nge mi to foʼo buni Môze, nge mia buni fe ma; amu a nga tili e mame ma tinane ma.

⁴⁷ Nge mi nji buni e mam a nga tili, e mame ma kobô, mia ye buni me aya?