YOANES 2 - Bible en langue Bulu

Abôʼô aluʼu ya Kana

¹ E mvuse valé, e môse lale, ane be nga kaʼa abôʼô aluk, e Kana ya Galilé, nyia Yésus a too abôʼô te;

² be nga bañete fe Yésus baa beyéʼé bé aluʼu te.

³ Eyoñe woon a nga man, e nde nyia Yésus a nga jôô nye na: Be ntoo teke fe woon!

⁴ Ane Yésus a nga jô nye na: A minga, bia wo bi ne za ajôô? Awolo dam e ngenane te kpwaan.

⁵ Ane nyia a nga jô bongô bisaé na: E jam ése a ye jô mia, boʼane de!

⁶ Nde beta minkaʼa mekoʼo mendim mi mbe valé, ntelan mfaʼa ya ntunan beyude be nga bo be tunu bebien, tañe bone be fôndô bebaé nge belaa.

⁷ Ane Yésus a nga jô be na: Jalaʼane mevieʼe mekoʼo mana mendim; e nde be nga jalé me mendim ne lut.

⁸ Ane a nga beta jô be na: Bietane ñhe éyoñe ji, mi ke ve môt a jôô mame ya dina; e nde fe be nga ke ve nye.

⁹ Atyeʼe njôô dina a nga tyeʼe mendime me nga kôñelane woone ma, ve nye teke yem e mfaʼa woon a so, e bongô bisaé be nga lab mendim, be be yemek, e nde njôô dina a nga loone nluʼu minga

¹⁰ a jô nye na: Môt ase a bo a tatéʼé ve e woon a ne zam , e nyô a ne te dañe zame kik, éyoñ bôte be nga bili; ve wô wo te viane baʼale woon a ne zam a zu kui aval éyoñe di.

¹¹ Jina é ne étua jam ôsu ya bitua bi mam bié; a nga bo je e kana ya Galilé, a liti bôt duma dé, ane beyéʼé bé be nga buni nye.

¹² E mvuse éte, a nga siliki a ke Kapernawum, émien, a nyia wé, a bobenyañ, a beyéʼé bé, ane be nga tabe valé abe melu.

Yésus a fubu nda Zambe

¹³ Eyoñe Pak Beyude é nga bo bebé, ane Yésus a nga beta bet e Yérusalém.

¹⁴ E nde a nga koone bôte ntaʼan e nda Zambe été: a ba ba kuane benyak a mintômba a bezum, a ba ba tyendé bemoné,

¹⁵ ane a nga bo nkasa a minsinga minko, a titane bese be kôlô nda Zambe été a kui atan baa be mintômba a benyak, a nga tyamelane moné betyendé moné, a sôʼôlô fe betebele bab e si.

¹⁶ A jô bôte ba kuane bezume na: Vaʼane me biôme bite va, te mia bo nda Esaa wom nda minkuan.

¹⁷ Eyoñe éte beyéʼé bé ba zu simesane jam e ne ntilane na: Nyeʼan ma nyeʼe nda jôé wo ye wôé ma.

¹⁸ E nde Beyude be nga nyoñe nkobô a jô nye na: Za ndem éziñ wo liti bia na wo yiane foʼo bo mame wo bo ma?

¹⁹ Ane Yésus a nga yalane be a jô na: Tyamane nda Zambe nyô, ma ye beta telé je tetele ve melu mela mela.

²⁰ E nde Beyude ba zu jô nye na: Melôñ, ya nda Zambe nyô me nga sili mimbu mewôme menyiin a misaman, ve mfaʼa wôé, wo ye beta telé je tetele ve melu mela mela!

²¹ Nde nye ke a mbe a kobôʼô ajô nda Zambe ya nyôle jé émien.

²² Ve éyoñ a wômôya a kôlôʼô miñwuan, ane beyéʼé bé be nga simesane na a nga kobô be ajô te, e nde be nga buni Mintilan a ajô Yésus a nga kobô.

Yésus a yeme môt été

²³ Eyoñ Yésus a nga too e Yérusalém, abôʼô Pak été valé, ane bôt abui be nga buni nye, amu be nga yen bitua bi mam a mbe a boʼok.

²⁴ Ve Yésus émiene kik, nye teke dañe tabe be ndi, amu a mbe a yeme be bese,

²⁵ a teke mfi éziñ asu dé na môte mfe a kañete nye ajô ya be môta binam; amu na émien a mbe a yeme jam e ne môta binam e nlem été.