YOANES 16 - Bible en langue Bulu

¹ Me maneya kate mia mam ma mi za kolé ôbak.

² Ba ye titane mia e meba me Zambe. Yaa, awolo da ye bo, éyoñ môt ase a wôé mia a ye simesane na a ve Zambe ékañaʼa ja yian.

³ Ba ye bo mam mete amu na be nji yeme toʼo Tate, toʼo ma.

⁴ Ve me maneya kate mia mam mete, ajô te, éyoñ awolo ya été da ye kpwaan, mia ye yeme na mamien me nga mane kate mia me.

Esaé Nsisim

⁵ E nde, éyoñe ji, ma ke e be Môt a nga lôme ma, a teke môt éziñe ya be mia a sili me na: Wo ke vé?

⁶ Ve mbôl me maneya kobô mia mam ma, e nlem ô jaéya mia a ôlun.

⁷ Ma kate foʼo mia bebela na, e ne mia beta mfi na me ke. Amu nge ma bo te ke, Mvolô minlem aa ye ke zu be mia. Ve nge ma ke ki, ma ye ke lôme mia nye.

⁸ Eyoñ a ye so, émien a ye kpwé si nyô ajô abé , ajô zôsôô , a ajô ntyiʼane mejô.

⁹ Mfaʼa ajô abé , amu na be nji buni ma.

¹⁰ Mfaʼa ajô zôsôô , amu ma ke e be Tate, mi teke fe beta yene ma.

¹¹ Mfaʼa ajô ntyiʼane mejô, amu na ajô njôô ya si ndône nyô e maneya tyiʼi.

¹² Me ngenane me bili mam abui ya kate mia, ve mi nji bi ngule ya jibi beʼe adite te éyoñe ji.

¹³ Eyoñe ñhe, Nsisim bebela nye a ye so, a ye liʼitane mia zene ya bebela ase ngumba. Amu a ye bo te kobô mam mé, ve mam mese a ye wôk, e me a ye kobô, a kate fe mia mam ma zu.

¹⁴ E nye a ye ve me duma, amu e jam a ye nyoñe be ma, e nde a ye kate mia.

¹⁵ E mam mese Tate a bili me ne émam. Ajô te nde ma te jô na, a nyoñ e be ma a kate mia.

Olun wo ye veñesane mevak

¹⁶ Ane mon étun a lôté mia ye bo, teke beta yene ma, mon étun a beta lôt mi beta fe yene ma.

¹⁷ E nsamba beyéʼé été bôte bʼéziñ be nga ke ba jô ba bevoʼo na, za akaʼajôô a kate bia di na, ane mon étun a lôté, mia ye bo te beta yene ma, mon étun a beta lôt, mi beta fe yene ma, amu ma ke e be Tate?

¹⁸ E nde be nga jô na: Jé nje a jô na, mon étun? Bi nji yem e jam a kobô.

¹⁹ Eyoñe Yésus a nga yeme na ba kômbô sili nye ajô te, ane a nga jô be na: Mia ke mia silane minsili zañe jenan a ajô ma jô mia na, ane mon étun a lôté, mia ye bo teke beta yene ma, mon étun a beta lôt, mi beta fe yene ma?

²⁰ Ma bele foʼo ane ma jô mia na, mia ye yôn a tat, ve si ndône ki ja ye vak. Mia mia ye foʼo wôʼô ôlun, ve ôlune wônan wo ye kôñelan a veñesane mevak.

²¹ Eyoñe minga a kôʼôlô mmie, a tabe éyôé, amu éyoñe jé ya mintaé é soya. Ve ane mon a bialé, teke fe beta simesane mintaé, amu mevaʼa ya na ngumba môt ô bialéya e si ndôn.

²² Mfaʼa wônan, mi bili foʼo ôlun éyoñe ji. Ve ma ye beta zu yene mia. A nleme wônan wo ye fôn a mevak, a mevaʼa menan mete, teke môt a ye vaa mia me.

²³ Môs ôte, mia ye bo te sili ma nsili éziñ. Bebela, bebela émien foʼo ma kate mia na, e jôm ése mia ye sili Tate a jôé dam, a ye ve mia je.

²⁴ Azukui éyoñe ji, mi nji jaʼé jam éziñ a jôé dam. Jakaʼane ñhe, mia ye nyoñ, éyoñe te avaʼa denan da ye bo njalan ne lut.

Me dañeya si nyô

²⁵ Me maneya zu ma kobô mia mam ma a minkana. Ve éyoñ ja zu, ma ye bo te beta kobôô mia a minkana, ma ye kate mia ajô Esaa wom ne ngeññ.

²⁶ Môs ôte, mia ye jaʼé Tate mam a jôé dam, a me nji kôsa jô mia na ma ye yeʼelane Tate ajô denan.

²⁷ Amu Tate émien a nyeʼe mia, amu mi nga nyeʼe ma, mi buni fe na mamien me nga so e be Zambe.

²⁸ Me nga so be Tate, ane me nga zu e si nyô. E nde ma beta liʼi si ndôn nyô a ke be Tate.

²⁹ Ane beyéʼé bé be nga jô na: Ke bia yene foʼo éyoñe ji na wo kobô ne ngeññ, teke ku nkana éziñ.

³⁰ Eyoñe ji, bia yeme na wo yeme mam mese, a teke mfi éziñe na môt a sili wo nsili. E ne bia buni valé na ô nga so be Zambe.

³¹ Ane Yésus a nga jô be na: Ye mi buniya éyoñe ji?

³² Ke awolo da zu, e soya fe so, mia ye mane tyamelan, môt ase a kele mfaʼa wé, mi liʼi ma étam. Ve da me nji bo étam, amu bia Tate bi ne.

³³ Me nga mane kate mia mame ma na, mi tabe mvoʼé ne mieññ amu ma. Mia ye foʼo bi bitibelaʼa; ve da, boʼone ngul minlem, mamien me dañeya si ndôn.