YOANES 15 - Bible en langue Bulu

Yésus nyia ndik

¹ Ma me ne nyia ndik, Esaa wom ki e nye a bo ésaé ya été.

² Efaʼalé ése é tii be ma te wum bibuma, a tyiʼi je, a e ji ése ki ja wum bibuma a seb je na é wum bibuma abui.

³ Mfaʼa wônan, mi ne mfuban amu mejô me nga kate mia.

⁴ Tabaʼane ñhe be ma, ma fe e be mia. Aval éfaʼalé é se ngule ya wum bibuma étam, nge é nji timbi be nyia ndik, avale te fe mia nge mi nji tabe be ma.

⁵ Ma me ne nyia ndik woon, mi ki bifaʼalé. E môt a too be ma, ma fe me too be nye, e nye a wum bibuma abui, amu me momo, mi se ngul ya bo toʼo jam éziñ.

⁶ Nge môt éziñ a nji tabe be ma, ba ye wua nye atan aval ane éfaʼalé, ve mane kôt, be ve kôane bie a wua bie nduan été, bi ve mane dik.

⁷ Nge mia tabe be ma, mejô mame ki me tabe be mia, jakaʼane jôm ése mia kômbô, mia ye nyoñe je.

⁸ Esaa wom a nyoñe duma amu na mia wum bibuma abui a nalé ate mia ye bo beyéʼé bam.

⁹ Aval Tate a nga nyeʼe ma, ma fe me nga nyeʼe mia, tabaʼan e nyeʼane wom été.

¹⁰ Nge mia baʼale metiñ mam, mia ye tabe nyeʼane wom été, aval ane mamien me nga baʼale metiñe mʼEsaa wom, a me too e nyeʼane wé été.

¹¹ E mam ma, me nga kate mia me na avaʼa dam e bo be mia, a na avaʼa denan e jaé ne lut.

¹² Atiñe dame ke di na mia mia mi nyeʼesan, aval ane me nga nyeʼe mia.

¹³ Môt éziñ a nji bi nyeʼane wo dañ wuna na môt a ju ényiñ jé a butane bemvôé bé.

¹⁴ Mfaʼa wônan, mi ne bemvôé bam nge mia bo mam ma bendé mia.

¹⁵ Me nji fe loone mia na bebo bisaé, amu mbo ésaé a nji yem e jam masa wé a bo. Me nga loone mia na bemvôé, amu na e mam mese me nga wôk e be Esaa wom, me maneya bo na mi yeme me.

¹⁶ Sake mia mi nga tob ma, mamien me nga tob mia, a telé mia na mi ke, a wume bibuma, a bibuma bienan bia ye dañe libi, a na, nge mia ye jaʼé Tate jôm éziñ a jôé dam, a ye ve mia je.

¹⁷ Jam ma bendé mia e ne ve na mi nyeʼesan, wua a nyô mbok.

Ziñ ya si nyô

¹⁸ Nge si ndôn ja wôʼô mia biko, mi yeme na mamien é nga taté wôʼô biko.

¹⁹ Nge mi nga ye bo ba ya si ndôn, si ndôn é nga ye nyeʼe jôme jé. Ve mbôl mi nji bo ba ya si ndôn, amu mamien me nga ke ma tob mia e si ndôn été, ajô te si ndôn ja wôʼô mia biko.

²⁰ Mi simesaʼan ébuʼu me nga jô mia na, mbo ésaé a nji dañ masa wé. Nge be nga feme ma, ke ba ye fe feme mia. Nge be nga baʼale mejô mam, ba ye fe baʼale émenan.

²¹ Ve mam mese ma, ba ye bo mia me, amu jôé dam, amu na be nji yem e môt a nga lôme ma.

²² Nge me nga ye bo te so a kobôô be, ve be nga ye bo te bi abé . Ve éyoñe ji be nji bi, atyebe éziñ ya bo meveñ, mfaʼa ya nsem wop.

²³ E môt a siñe ma, a siñe fe Esaa wom.

²⁴ Nge me nga ye bo te bo, mame môte mfe a nji tame bo e zañe jap, ve nge be ne teke abé . Ve éyoñe jina ki, be yeneya me a mis, be nga viane siñ mamien a Esaa wom.

²⁵ Ve jam e ne ntilan e Kalate metiñ wob da yiane tôéban na: Be nga siñe ma teke akalaʼa.

²⁶ Eyoñe Mvolô minlem, nye ma ye lôme mia a soʼo be Tate, Nsisimi benya mejô wo so be Tate, a ye bo ngaa ya ajô dam.

²⁷ Ve mia fe mia ye kañete ajô dam, amu bia be mia bi tabeya aso atataʼa.