YOANES 11 - Bible en langue Bulu

Yésus a wômôlô Lazar

¹ Môt éziñ a mbe a konôk, e Lazar ya Bétani, e jal Marie baa monyañe wé Martha.

² Marie ate a mbe minga a nga woʼo Nti mbone menyum a fimine nye mebo a ésile ya nlô wé, ndôme minga ate, Lazar, e nje é mbe é konôk.

³ Ane bekale be nga lôme nye mbañete na: A Nti, yeme na nyômvôé a kon.

⁴ Awôʼô Yésus a nga wôʼô nalé, nye na: Okon ôte ô nji bo ôkon awu, ô ne asu Duma Zambe, ane Mone Zambe a ye nyoñe duma été.

⁵ Yésus a mbe a nyekeʼe Martha baa monyañ a Lazar.

⁶ Eyoñe ñhe Yésus a maneya wôʼô na a kon, e nde a nga beta tabe vôm ate tañe melu mebaé,

⁷ e mvuse valé ane a nga jô beyéʼé bé na: E nkelan, bi bulan e Yudé.

⁸ Beyéʼé ki be nga jô nye na: A Rabbi, ke beyude be ndôme jeñ anaʼana na ba lume wo mekok , éyoñe te wo téé na wo beta ke wôé?

⁹ Ane Yésus a nga yalane na: Ye mewolo me nji bo awôm a mebaé e ngumba môs ? Nge môt a wulu a môs , a ye bo te kolé ôbak, amu a wulu a yene éfufub ya si nyô.

¹⁰ Nge môt a wulu a alu, a kolé ôbak, amu éfufub é nji bo be nye.

¹¹ Eyoñ a maneya kobô mejô mete, mvus éte nje a zu jô be na: Mvôé jam Lazar, a ne ôyo; ma ke vele nye ôyo.

¹² Ane beyéʼé be nga jô nye na: A Nti, nge a ne ôyo, ke a ye ñhe nyiñ.

¹³ Yésus nye a mbe a jôʼô na a wuya, be ke be buniʼi na a kobô ajô zezé nya ôyoo.

¹⁴ Eyoñe te ñhe Yésus a zu kate be ne ngeññ na: Lazar a wuya,

¹⁵ ve ma yene de mvaé asu denan na mi buniʼi, amu me nji ke tabe wôé. Nkelane ñhe vôm a né.

¹⁶ Ane Thomas nye ba loone Didime a nga jô beébe beyéʼé na: Bia fe nkelan, bia be nye bi ke wu.

Yésus Nwômôlô bôt a ényiñ

¹⁷ Ake ñhe Yésus a nga ke kui, a kooé na a mbôô soñ melu menyin.

¹⁸ Bétani baa Yérusalém be mbe foʼo zañ bebé tañe kiliméta éla.

¹⁹ Beyude abui be nga ke fe tabe Martha baa Marie ébeñese na be volô be minlem ajô awu ndôme jap.

²⁰ Eyoñe Martha a wôʼôya na Yésus a zu, e nde a nga ke tôbane nye. Marie ki a liʼi a to si e nda .

²¹ E nde ñhe Martha a nga jô Yésus na: A Nti, nge ô to tabe va, ve nge ndôme jam é nji ke wu.

²² Ve, éyoñ ébiene ji, ma yeme fe na e jôm ése ô ne sili Zambe, Zambe a ye ve wo je.

²³ Ane Yésus a nga jô na: Nyo ndôm a ye wômô.

²⁴ E nde Martha a nga jô nye na: Ma yeme foʼo na a ye wômô éyoñe ñwômane ya môse wo suʼulan.

²⁵ Ane Yésus a nga jô nye na: Ma me ne ñwômôlô, me to fe ényiñ. E môt a buni ma, jaʼane a wu, a ye nyiñ,

²⁶ a môt ase a nyiñ a buniʼi ma, a se ngule ya wu nnôm éto. Ye wo buni jame te?

²⁷ E nde a nga jô Yésus na: Owé, a Nti, me buniya ayab na wo ô ne Krist Mone Zambe, e nye a zuya e si ndône mu.

Yésus a yi

²⁸ Aman a nga mane kobô nalé, e nde a nga ke loone Marie monyañ wé a laʼa nye ôfôfoé na: Nyeʼele a ntoo va, a loone wo.

²⁹ Eyoñe nye ki a wôʼôya nalé, ane a nga kôlô si ne vup, a ke mfaʼa a mbe.

³⁰ Valé Yésus a ngenane teke kui e nlam, a ngenane ve vôme Martha a nga ke tôbane nye.

³¹ E Beyude baa be Marie be nga too e nda été valé na ba ve nye ayôñe nyô, ayene be nga yen ane a kôlô si avôl avô a kui atan, be nga ke ba tôñe nye, be siʼako na a ke soñ na a ke yôn.

³² Eyoñe Marie a nga kui e vôme Yésus a mbe, ayen a nga yene nye, ane a nga bibane si e mebo mé été a jôʼô nye na: A Nti, nge ô nga ye tabe va, ve ndôme jam é nji ke ye wu.

³³ Eyoñe Yésus a yeneya ane a yôn, Beyude baa be nye be nga zu nsamba be fe be yônôk, ane nlem ô nga tôlé nye abum, a nga fôʼôban

³⁴ a jô na: Mi nga jame nye vé? E nde ba jô nye na: A Nti, zaʼa yen.

³⁵ Ane Yésus a nga yi.

³⁶ Beyude be nga ke ba jô na: Mi lôô abim avé a mbe a nyekeʼe nye!

³⁷ Bôte bevoʼo ya été ki ba ke ba kobô na: E ne môt a nga bo ndindime na mise me yombô nye, a nga kate bo aya na môte nyô a bo te wu?

Lazar a bulan ényiñ

³⁸ E nde nlem ô nga beta tôlé Yésus, ane a nga téé a ke e soñ. Soñ éte é mbe mbas akôm, akok e butu été yôp.

³⁹ Ane Yésus a nga jô na: Fenekaʼan akok! Ane Martha, kale môt a nga wu a zu jô nye na: A Nti, ke a nga nyum, amu kʼa wu den melu menyin.

⁴⁰ Ane Yésus a nga jô nye na: Ye me nji kate wo na nge wo buni wo ye yene duma Zambe?

⁴¹ E nde ñhe be nga vaa akok. Ane Yésus a nga bete mise yôb a jô na: A Tat, ma ve wo akéva, amu ô wôʼôya ma.

⁴² Me ma zu ma yeme na wo wôʼô ma kom ése, ma te kobô kobô ve asu ba bôtô a tele me mbômaʼane nyôl na be buni foʼo na wo foʼo ô nga lôme ma.

⁴³ Eyoñ a maneya kobô mame ma, ane a nga yôtane tyiñe yôb ngu a jô na: A Lazar, kui atan!

⁴⁴ Ane môt a nga wu a nga kui atan, mo a mebo nkaʼan a bibab biyé, ndombo é to nye ñyalan asu. E nde Yésus a nga jô be na: Tiʼane nye biôme nyôl, mi jôʼé fe nye a ke.

Emoʼo ya wôé Yésus

⁴⁵ Abui ba Beyude be nga zu be Marie, éyoñe be yeneya mame Yésus a nga bo, be nga buni nye.

⁴⁶ Ane bevoʼo ya été be nga ke yene Befarizieñ a mane kañete be mame Yésus a nga bo.

⁴⁷ E nde Minlô Betuni baa Befarizieñ be nga bañete Ekôane Bôbenen a jô na: Bia ye bo aya, e môte nyô a boʼok abim abui bitua bi mame di?

⁴⁸ Nge bia jôʼé nye nalé, bôte bese ba ye buni nye, éyoñe te bôte ya Rôm ba ye so, be mane wôlé afôla si dangan a ayoñe bôte dangan.

⁴⁹ Ane môte wua ya be be, Kayifa, Nlô Betuni ya mbu ôte, a nga jô be na: Mi nji foʼo yeme jam éziñ.

⁵⁰ Ye miaa simesane ke na, e ne mia mfi nge môte wua wua nye a wu asu babôtô, a lôte na ngum ayoñe bôt ôse ô jañ?

⁵¹ A nji kobô jame te e soʼo be émien, ve amu e nye a mbe Nlô Betuni ya mbu ôte, e nde a nga kobô a kulu mejô na Yésus a ye wu asu ayoñe bôt,

⁵² sake ve awu ya asu ayoñe bôt étam, a ye fe bo na, e bone be Zambe be nga mane tyamelan, a tôkane be a bo be jôme jia.

⁵³ Ataté môs ôte, bôte bete be nga bu ñhe feʼe ya wôé nye.

⁵⁴ Yésus a nto teke fe beta wulu éngengeñ, e Beyude été, e nde ñhe a nga kôlô valé, a ke e jal e mbe afane bebé, e tison ba loone na Efrayim, a ntoo wé, baa beyéʼé bé.

⁵⁵ Valé Pak Beyude a nto bebé, ane bôte abui be nga téé dulu be soʼo mefôla ya si éte ôsusua Pak, a bet a ke e Yérusalém na ba ke fubu bebien.

⁵⁶ E bôte be mbe e Nda Zambe été be nga jeñe ñhe Yésus e mis, ba ke ba kobô e zañe jab na: Mia simesan aya? Ye a ye foʼo zu abôk ye momo?

⁵⁷ Bivet betuni a Befarizieñ ki be nga mane ve abendé na nge môt éziñ a yem e vôm a né, a kulaʼane de, be bi nye.