YOANES 1 - Bible en langue Bulu

Ajôô a nga boban minsôn

¹ E metataʼa Ajôô a nga too, a Ajôô a mbe baa Zambe, a Ajôô a mbe Zambe.

² E nye a mbe atataʼa baa Zambe.

³ Mame mese me nga boban a ngule jé, a jôm éziñ é nji boban tekeʼe nye.

⁴ E ne ényiñ é mbe e be nye, a ényiñ éte é mbe éfufub ya bôt.

⁵ Efufub ki ja faé e dibi été, ve dibi teke kômbô nyoñ éfufup.

⁶ E nde môt éziñ a nga so, e nlômane Zambe, a too jôé na Yôanes.

⁷ Môt ate a nga so na a bo ngaa a boʼolô ajô ya éfufup, a bo na bôte bese be bi mbunan vʼamu nye.

⁸ Sake émien nye a mbe éfufube te, a mbe ve na a bo ngaa éfufube te.

⁹ Efufubu émien a mbe, e nye a faé môt ase a zu e si ndôn nyô.

¹⁰ Efufubu a nga zu e si ndôn, a si ndôn é nga boban a ngule jé, ve si ndôn teke kômbô yeme nye.

¹¹ Eyoñ a zuya e vôma wé, e bôte bé teke kômbô nyoñe nye.

¹² E bôte bese be nga nyoñe nye, a nga ve be ngule ya bo bone be Zambe, e ba bese ba buni e jôé dé,

¹³ e ba be nga bialé sake a ngule ya metyi, nge nkômban éziñ ya minsôn, nge nkômbane ya be nnôme fam éziñ, foʼo ve a ngule Zambe.

¹⁴ Ane Ajôô a nga bo môt, e nde a nga lôñe mvôʼô be bia, ane bi nga yene duma dé, e funaʼane étôtoʼo atyiʼi mon da nyoñ e be Esaa, njalane ne lut a mvam a bebela.

¹⁵ Yôanes a kañete ajô dé a kele a yôtane yôb été na: E nye nyôna e môte me nga jôô nye na, e nyô a zu me mvus a ne ma ôsu, amu a mbe ma ôsu.

¹⁶ E jôm é ne nye njalan e nje bia bese bi nga nyoñ, mvam é bete mvame yôp.

¹⁷ Amu na Môze a nga ve bia metiñ, ve mvam a bebela kik bi nga so e be Yésus Krist.

¹⁸ Teke môt éziñ a nga tameya yene Zambe; ve Atyiʼi Mone Zambe, e too Esaa wé e tôé, nde e nga liti bôte Zambe.

Yôanes Babtist a kañete ajô Yésus

¹⁹ Wuna ô ne nkañetan Yôanes a nga tuʼa boʼolô, éyoñ Beyude ya Yérusalém be nga lôme Betuni a Belévit e be nye be ke sili nye na: ô ne ne za?

²⁰ Ane a nga mem, teke veʼele kat, ane a nga meme na: Sake ma me ne Krist.

²¹ E nde be nga sili nye na: Wo jô aya? Ye wo ô ne Eli? Ane a nga jô na: Sake ma! Ye ô ne nkulu mejô? E nde a nga yalane na: Tekéʼé!

²² Ane be nga jôô nye na: ô ne ñhe za? Amu bia yiane ve e bôte be nga lôme bia éyalan: wo jô womien aya?

²³ E nde a nga jô na: Me ne tyiñe môt a ke a yôtan afan afane na: Kômane zene Nti, aval ane nkulu mejô Ezayi a nga jô.

²⁴ E bôte be nga lôm be mbe bôte ya ngame Befarizieñ.

²⁵ Ane be nga beta nyoñe nkobô a sili nye na: Ve amu jé wo du bôt, nge ô nji bo Krist, nge Eli, nge ke nkulu mejô?

²⁶ E nde Yôanes a nga yalane be na: ma ma du bôt a mendim; ve môt éziñ a ntele mia zañ, e nyu mi nji yem,

²⁷ a zu me mvus, ve me nji bo nté nkôñe ma tiine nye ve nkole silefas.

²⁸ Mame mete me nga boban e Bétani, e kindiʼi Yordane yat, e vôme Yôanes a mbe a du bôt.

Yésus Mone ntômba Zambe

²⁹ Tyé kpwaa, éyoñ Yôanes a yeneya Yésus a zaʼa nye ôsu, ane a nga jô na: Mi lôô, e mone ntômba Zambe a vaa nseme ya si ndôn!

³⁰ E nye a nee ajô me nga jô na: E nnôme fam a zu me mvus a ne ma ôsu, amu a mbe ma ôsu.

³¹ Mfaʼa wom, me nji bo me yeme nye, ve me nga zu du bôt a mendim na Israél a yene nye.

³² Ane Yôanes a nga boʼolô a jôʼô na: Me nga yene Nsisim a sisik, a funaʼane zum, a zu selebe nye e nlô yôp.

³³ Mfaʼa wom, me nji bo me yeme nye, ve e nyu a nga lôme ma na me du bôt a mendim, e nye a nga jô me na: Nge ô yene Nsisim a sisik, a zaʼa selebe môt e nlô yôp, e nye ñhe le, e môt a du bôt a Mfufub Nsisim.

³⁴ Avale me nga yen, e nde fe ma boʼolô na e nye a ne Mone Zambe.

Beyéʼé be ôsu

³⁵ E bia-tyé fok, Yôanes a ntele baa beyéʼé bé bebaé.

³⁶ Ayen a nga yene Yésus a ke a tebe, e nde a nga jô na: Mone Ntômba Zambe e nye nyô!

³⁷ Eyoñe beyéʼé bé bana bebaé be wôʼôya a kobôʼô nalé, ane be nga ke ba tôñe Yésus.

³⁸ E nde Yésus a nga buʼu tyiñ , a yene ane ba zu ba tôñe nye, nyee be na: Mia jeñe jé? Ane be nga jô nye na: Rabbi, nalé a tinane na: A Ñyeʼele; e ne ô too vé?

³⁹ E nde a jô be na: Zaʼane mi yen! Ane be nga ke, be yene vôm a too, be tabe fe e be nye valé ngumba môse te ôse: bi ne va bebé awolo awômô.

⁴⁰ André, monyañe Simon Pierre, a mbe wua ya bôte bebaé be nga wôʼô ane Yôanes a kobô, a ke ba tôñe Yésus.

⁴¹ E môt ôsu a nga tôbane nye, a mbe Simon, e monyañe wé émien, ane a nga jô nye na: Bi yeneya Mesie, nalé a tinane na Krist.

⁴² E nde a nga kee nye e be Yésus. Afombô Yésus a nga fombô nye, nye na: Wo ô ne Simon, e mone Yônas, wo yôbane jôé na Séfas, nalé a tinane na Akoʼo.

⁴³ E bia-tyé ya valé, e nde a nga jô na a ke e Galilé, a ke koé Filip wé. Ane Yésus a nga jô nye na: Tôñe ma!

⁴⁴ Filip a mbe môte ya Bétsaid, e tison André baa Pierre.

⁴⁵ E nde Filip ki a nga ke yene Natanaél a jô nye na: E môte Môze a nga tili e Kalate metiñ, bekulu mejô be kobô fe ajô dé, bi yeneya nye, a ne Yésus, mone Yôsep, môte ya Nazarét.

⁴⁶ Ane Natanaél a nga yalane nye na: Ye jôm é ne mvaé é ne ngul ya so Nazarét? E nde Filip ki a nga jô nye na: zaʼa ke yen!

⁴⁷ Ayene Yésus a nga yene Natanaél a zaʼa be nye, e nde a nga jô na: Etôtoʼo mon Israél ñhe ji, tekeʼe mone mvôl éziñ a too be nye.

⁴⁸ Ane Natanaél a nga sili nye na: Wo yeme ma aya? E nde Yésus a nga beta nyoñe nkobô a jô nye na: Te yene Filip a za loʼone wo, éyoñ wo too élé fige si, éyoñ éte me me yeneya wo.

⁴⁹ Ane Natanaél a nga yalane na: A Rabbi, wo ô ne Mone Zambe, wo ô ne njôô ya Israél.

⁵⁰ E nde Yésus ki a nga nyoñe nkobô, nyee nye na: Amu ma te kate wo na ma te yene wo ô tele élé fige si, e nde wo buni! Ke wo ye yene yen alôte valé.

⁵¹ Ane Yésus a nga jôô nye na: Bebela, bebela émiene foʼo, ma jô mia na, mia ye yene yôb e yoo ne ngeññ, bʼéngele be Zambe be betek, be susuk, e nlô yôb be Mone Môt.