Yo 1 - Bible en langue Bulu

¹ Nkobô Nti wu ô nga kui be Yôél, e mone Pétuél.

Kpwatôla bitandak a beta mfum

² Vôʼôlaʼane jame dina, a mia bemvendé be bôt kuʼane melo menane mese a mia bôt mi too Yuda! Ye avale jame di e tameya boban nté mi nyiñeya, nge melu benyô mvam ?

³ Kañetaʼane jame te e be bone benan, a bone benane ki e be bone bap a bone bap e be miaé wo tôñe valé!

⁴ Jôme nkôñ ô nga lik, étandak é mineya je, a jôm étandak é liʼiya, aselek é diya je; jôm aselek é nga lik, mbaʼa a diya je.

⁵ Veʼan ayo, mia besoʼo bilam, mi yôn! Mia benyuu bilam, yônane mia bese; mia ye bo teke mfefé woon amu bibuma bi ndiʼi woone momo.

⁶ Nkane bitandak ô yianeya si jangan. Bi nʼayok, tekʼalañé, bia jiane jôm ése ane mesôñe me ngbwengbwem nge minkekeʼe mi ngale ngbwengbwem.

⁷ Nkane te ô maneya di mefube mindiʼi miangan, a mane ndamane befigié bangan ne meñ. Ba mane kpwele be, a mane soé be bikôbe biap a liʼi ve bifumulu mintyaé.

⁸ Yônan anʼésoé minga é bili ôlun a yônôk nnôme wé a ndôme luk.

⁹ Mimveane mi fôn nge mi mi woon mi nji fe beta kui nda Zambe. Ajô te betuni be ne meyeb été, mbe be ne ntelane ya saane Nti.

¹⁰ Mefup me maneya diban, si ébien é nyoñeya ôlun été. Te ke fe fôn, teke fe mendime ya ébuma ndik, teke fe atoé mbon ô ne mfefé.

¹¹ Bebé mefup be kuya avem Bebé mefube mindik ba yôn amu ateʼe nlem é biya be. Avute fôn a nlisi bi maneya, a bidi bise ba kôan bi ntoo momo.

¹² Ndiʼi woon ô maneya kôt befigié ki be maneya joʼolan, bilé bia wum bibuma: begrenadié, bedatié a bepômié be maneya wulan. Avak ese e maneya e bôt été.

Nloone ya tyi bidi a yeʼelane Nti

¹³ A mia betuni, jaane minkuta a tabane meyeb été! Yônan, mia mia bo ésaé ataʼa metunaʼa! Zaʼan a lôtan alu mi beʼe minkuta, mia mia bo Zambe wom ésaé! Amu mimveane mi fôn, nge mi mi woon mi nji fe beta vebane nda Zambe.

¹⁴ Bendaʼan éyoñe ntyiane bidi, a bañete bôt be sulan; sulaʼane bemvendé be bôt a jama bôte mboʼo ase e nda Nti, e Zambe wongan, yeʼelaʼane nye.

Môs ayaa Zambe

¹⁵ Angônda môs wo zu, môs ayaa Nti! Baa njañ be ne nsamba Zambe a ne ngul ése a tyiʼiya nalé.

¹⁶ Bidi biangan bia jañ mise mangan été, mefôn a mevak bi se ke fe bebé a ndaa Zambe wongan.

¹⁷ Mefese mevoñ me maneya kôt e bibañe bi tyia si. Fôn é ntoo momo! Mengun teke jôm été a mekañ bikôkoé.

¹⁸ Vôʼôlaʼan ane betit ba tat! Mimbame biyem mia ndeñ li a li, amu teke fe bidi ya di. toʼo na mintômba, mie fe mia wu.

Meyeʼelane me nkulu mejô

¹⁹ A Nti ma yône be wo! Nduan ja diʼi biloʼo yʼôzôm, minkabaʼa mi nduan mia diʼi bilé bise ya mefup.

²⁰ Betite ya fé bebiene fe ba kôñelane nlô wop mfaʼa ô né, amu atôñe mendim e maneya vele. Nduan ja diʼi biloʼo yʼôzôm.