YEREMIA 9 - Bible en langue Bulu

Bebela a nji fe bo

¹ Ngoʼé nge me too ye bi nda afan été, vôme bewulu dulu be ne nguleya sobô! Me nga ye liʼi bôte bam a ke be ôyap! Amu bese be ne bebo mejian , nsamba bekoñe bôt.

² Ba kolé ôyem anʼélaé, asu ya laane minsos; be nji beta bo ngu e si jab été, amu nkobane benya mejôô; ba mane bo mbia jame va, a beta bo nyô mboʼo valé, a be ne te yeme ma, nalé Nti a jô.

³ Môt ase a tabeʼe ba bevoʼo ntye, a te buni wua ya bobenyoñe bôé; amu monyoñ ase a ne mvômvôle mvamban, a mvôé ése ja miase bibôta.

⁴ Ba bo duʼaduʼan e zañe jap, teke kobô bebela; ba belan ôyeme viap asu ya kobô mam me ne minsos. Ba teʼe nyôle jap a mboon abé .

⁵ Eto jôé é ne meduʼane zañ; ba bene yeme ma e meduʼane yôp, nalé Nti a jô.

Nti a yaa

⁶ Amu ajô te Nti ya minsamba mewosan a jô na: ô lôô ma zu nyemé be a veʼele be; amu ô ne bo ngone yʼayoñe bôte dam za jam afe?

⁷ Ôyeme viap ô ne nsoñetan akoñ élaé . Ba kobô ve meduʼan; ba kobô ébemôtô mvoʼé ve biyaé ve nlem été be lame nye melam.

⁸ Ye ma ye bo te yaa be amu nalé, nalé Nti a jô. Ye ma ye bo te kune mamien e bʼaval ayoñe dina nga?

⁹ Ma zu yi a tat e miñyanebe yʼafan; ma lomé du; amu be maneya diʼiban, teke yene môt a lôtôk, tyiñe mimbame biyem é nji fe wôʼé; biôm bise bi maneya ke, ataté anone ya yôp a kui betit.

¹⁰ Ma ye bo Yérusalém avise mbuan, éto bemvu yʼafan. A ma ye veñesane bitisone ya Yuda jôme melunga, môte momo été.

¹¹ Mfefeʼe môt wo wôʼô mame ma ô ne vé? A kate ñhe de, nyô Nti a nga kobô nye a anyu dé! Si jenan ja jañ amu jé, a amu jé é ntoo ndiʼan ane nkôte si, vôme môt éziñ a nji fe lôt?

¹² Nti a jô na: amu be nga liʼi metiñe mam, ma me nga telé ôsu viap; amu be nga bo te vôʼôlô tyiñe jam, a bo te wulu ane ma jô,

¹³ amu be nga tôñe melo ya minleme miap, a tôñe fe Bebaal, avale bʼésaa bap be nga yeʼele be.

¹⁴ Ajô te Nti ya minsamba mewosan, e Zambe Israél a jô avale di na: ô lôô ma zu bôte ba ôvuta be di, a ve be mendim me bili nsu, be nyu.

¹⁵ Ma ye mialane be e meyoñe bikul été, mme toʼo bebien, toʼo bʼésaa, be nji tame yem. A ma ye lôme nkpwaté mekôn mvuse jap, akekui me maneya jiane be.

¹⁶ Avale di Nti ya minsamba mewosan a jô na: fasan! Loʼone binga ba yeme yi, be zaʼak! Lômane bôt be ke loone binga be nʼatyeñ, be zu!

¹⁷ Be boʼo avôle ya bete tyiñe du jap ajô dangan, nalé milik ma ye kui bia mis, a mendim ma ye kui bia bivula.

¹⁸ Amu miñyôn mia so Sioñ; jia! Be maneya sa bia! Oson ô jaéya bia nyô. Amu bia yiane liʼi si jangan, a be maneya sôʼôlô menda mangane si!

¹⁹ A binga, vôʼôlaʼane ñhe ajô Nti, a alo denan e wôʼôk jam anyu dé da jô! Yeʼelaʼane bobebinga benan ane ba yôn, yeʼelaʼane mevale me du ézezañe jenan, bana a ba bevok.

²⁰ Amu awu e beteya bevundi bangan, e nyiineya menda bejô bôte mangan, da wôé bon be ne minjoñ, bendôman be ne mevôm me ne ndam.

²¹ Jôʼô na: Avale di nde Nti a jô na: mimbim mi bôt mia ye ku afan été ane mebi, a ane mbome nkôane bidi a liʼi mvuse jé; teke môt a toʼé wô!

Fek a ntyiʼiban atyele ya nlem

²² Avale di Nti a jô na: mfefek ô boʼo te wumu ôbien amu feʼe jé, a ngungu ô boʼo te wumu ôbien amu ngule jé, nkukum ô boʼo te wumu ôbien amu akume dé.

²³ Ve môt a kômbô wumulu émien a wumuluʼu amu na a ne atyeñ a a yeme ma, amu a yeme na: Me ne Nti, nyô a liti mvam , zôsôô a nya ntyiʼane mejôô e si nyô. Amu jame te nde ma yene mvaé nalé Nti a jô.

²⁴ Tame yen, melu ma zu, nalé Nti a jô, ma ye yaa bentyiʼiban atyele bese be nji tuʼa bo nalé e minleme biab été:

²⁵ Ejipte, Yuda, Edom, Beamônit, Môab, e ba bese ba tyeñeban ntyiʼi, ba be too afan; amu meyoñ mese me ne tee ntyiʼiban metye, a nda bôt Israél ése é ne tee ntyiʼiban metye mfaʼa ya minleme miab été.