YEREMIA 8 - Bible en langue Bulu

Bôt be maneya bo mindindim

¹ Eyoñe te, nalé Nti a jô, ba ye vaa bivese bejô bôte ya Yuda, bi biwôlô bebo bisaé bié, bi betuni, e bi bekulu mejô a bi bôte be too Yérusalém e mesoñe mab été.

² Ba ye bôôé bie mmialan ôsu jôp, di ngon, a di ateté ese ya yôp, mbie be nga nyeʼe a kañ, mbie be nga late bie a jeñe bie, a mbie be nga kute meboñe si ôsu viap. Ba ye bo te beta kôane bie nge jame bie, bia ye bo akun étyiʼa yôp.

³ Awu da ye bo jôme ya kañese a dañ ényiñ e be mebukaʼa ma ye liʼi be mvoñe bôt é ne nkpwala éte, e mevale mevôm mese me nga mane wôé be, nalé Nti ya minsamba mewosan a jô.

⁴ Wo ye jô be na: Nti a jô avale di na: ye be wôʼô ku mbek te beta kôlô si, nge na, ye be wôʼô lume mvus te beta bulan?

⁵ Amu jé ñhe bôte ya Yérusalém ba be bulaneya mvus, mbulane ya nnôm éto? Ba langane meduʼan été, ba bene bulan.

⁶ Me too ne séé, me vôʼôlôʼô, be nji kobô, avale be nga yiane kobô; teke wua yʼété a jôbane mbia mboone wé, nge jô na: Jé me nga bo ji? Bese ba beta taté mbile wop, avalʼanʼékabela ja ke bita.

⁷ Jaʼane ngôkoé, e yôb été, ja yeme mbu wé, ôdu, nguleyebe a bingo, ba fombô éyoñe ba suan, ve bôte bam be nji yeme metiñe me Zambe.

⁸ Mi ne yeme jô aya na: bi ne mimfefek, metiñe me Zambe me ne be bia? Nkôse minsose beyeme bekalate ñwô ô nga tili meduʼan.

⁹ Mimfefek mi nga ye wu ôson, woñ ô biya be, be biliya, ô lôô be nga biasé ajô Zambe a feʼe fé be bili?

¹⁰ Ajô te ma ye ve binga bap e be bôte befe a mefube map, e be bôt ba ye wôlé be biôm. Amu ataté nyô a dañ atek a kui nyô a dañ éwôlô, bese, be nʼôzañ akum; ataté nkulu mejô a kui ntuni , bese be ne mvô.

¹¹ Ba saé aveñe ngone ya bôte bam éngbwemese nsaan; ba jô na: Mvoʼé! Mvoʼé! Mvoʼé ki é too momo.

¹² Ba yiane wôʼôsone ya beangôndô be mam ba bo, vʼôson ô ne te bi be. Be nji fe beta yeme wôʼôson, ajô te ba ye ku ba be ba ba ku, ba ye kolé éyoñe ma ye wosane be, nalé Nti a jô.

¹³ A maneya e zañe bia be be, nalé Nti a jô. Teke fe bibuma e figié; mekaé ma ye kôt; be maneya ndaman jôme me nga ve be.

¹⁴ Amu jé bi too te fôʼôsan? Sulaʼane vôme wua, e nkeane bitison bi bili aleme na bi wu été, amu Nti, e Zambe wongan, a bo na bi wu, a bo na bi nyu mendim me bili nsu, amu bi maneya bo Nti abé .

¹⁵ Bi nga yange mvoʼé , ve teke jam éziñ é ne mvaé; bi nga yange éyoñe nsaéban, ve woñ e ñwô bi bili.

¹⁶ Eduñe ya bikabela bié ja wôʼé mfaʼa ya Dañ, a si ése ja fôʼôsan a éduñe mintate ya mingungule bikabela bié; be soya, be mineya si, a biôm bise bi nʼété. Tison a bôte be too été.

¹⁷ Amu ma nyô! Ma lôme benyo a mekpwe be mia, teke jôm é ne teʼe be; ba ye lôbe mia, nalé Nti a jô.

Nkulu mejô a tat

¹⁸ Ôlune wom ô ne teke biañ, nyôle jam ése é ne nteʼan.

¹⁹ Tame yene miñyône mi ngone yʼayoñe dam. mia so si é nʼôyap. Ye Nti a nji fe bo Sioñ? Ye njô bôte wé a nji fe bo e zañe jé? Amu jé be nga soñe ma me yaa a minkpwelane biveʼela miap, a bemomo be mame ya bikuu?

²⁰ Nkôane bidi ô maneya, ésebe fe é lôteya, a bia bi nji nyiiban!

²¹ Me ne ntyaʼan amu aveñe ngone ya bôte bam, me ne ne lumaa, atek e biya ma.

²² Ye biañ é nji fe bo Galad? Ye dokita a nji fe bo wé? Amu jé ñyetane ngone ya bôte bam wo bo te yaé?

²³ Za a ye tyendé nlô wom ô bo anjeñe mendim, nge mise mam anjeñe milik, me nga ye yône mimbim mi ngone ya bôte bam alu ba môs .