YEREMIA 6 - Bible en langue Bulu

Yérusalém a ye dilibane bita

¹ Kôlaʼane Yérusalém a bone be Bényamin, loñane toñ e Tékôa, betaʼane nlinga e Bét-Akévem! Amu bidim a beta nzametaʼan bia yené bi soʼo akôé.

² Ma tyame ngone Sioñ, nyô a nʼabeñ a biyeʼe!

³ Bebaʼale mintômba a mimbame miap ba zu mfaʼa a né, ba lôñe nye menda bindelé nyôle mbômaʼan; môt ase a kendé ngabe jé.

⁴ Kômesaʼane bita mi wosane nye, tebaʼane tetele! Mbetan e zañe môs ! Ve njuʼu wongan ô ne na: Môs ô nga ndeñ, minsisiñ ya mamengôʼé mi nga limetan

⁵ Tebaʼane tetele! Mbetan a alu! Ntyamane biwôlô menda bejô bôt!

⁶ Amu avale di nde Nti ya minsamba mewosan a jô na: bakaʼane bilé, bôʼane bikolé ôbak, asu ya wosane Yérusalém! Tison éte ja yiane nyoñe melep , amu jam ese da boban été é ne ve étibelaʼa.

⁷ Avalʼ anjeñ da kuli mendime mé, avale te Yérusalém a kuli mbia mboone wé, éduñe ja boban été, é ne ve ji yʼévô a éndaman; jôme ja yené mise mam éyoñ ése, é ne ve mintaé a meveñ,

⁸ a Yérusalém, nyoñe nyeʼelan, me za kôlô be wo. Me za bo wo élik, e si môt a nji beta tabe!

⁹ Avale di Nti ya minsamba mewosan a jô na: Ba ye sondô kolé mebukaʼa yʼIsraél ane ndiʼi woon. Betaʼa kee wo ane nkôane bibuma a kee wo e mintyaé mi ndiʼi woon.

¹⁰ Me kobô za? A za nye me nyoñe ngaa ane ba ye vôʼôlô ma? Ô lôô melo map me ne teke ntyiʼiban, a be nʼateʼe ya yeme vôʼôlô; ô lôô ajô Nti e ne jam ôson e be be, be nji yene mvaé éziñ été.

¹¹ Me ne njalan a ayaa Nti, me nʼateʼe ya kamane de. mialaʼane de e be mon a tele njoñe yôp, avale te fe e be bendôman. Amu fam a minga ba ye bili, nalé fe nnôme môt a nyô a ntoo melu abui.

¹² Menda map ma ye kalan e be bôte befe, nalé fe mefup a binga, éyoñe ma ye same wo wom e be bôt be too si nyô,

¹³ Amu na, ataté be nyô ya be be a ne tyôtyoé, a kui nyô a dañ anen, bese be nʼôzañ akum; ataté nkulu mejô a kui ntuni , bese ba belane meduʼan.

¹⁴ Ba saé aveñe bôte bam égbwemese nsaan; ba jô na: Mvoʼé! Mvoʼé; ve mvoʼé ke momo;

¹⁵ ba yiane wôʼôsone ya bʼangôndô be mam ba bo, ve ôson ô ne te bi be, be ne teke fe yeme wôʼôson, ajô te ba ye ku ba be ba ba ku. Ba ye kolé éyoñe ma ye wosane be nalé Nti a jô.

¹⁶ Avale di Nti a jô na: tebaʼane mezen, fombaʼan, yemelaʼan ajô mezene ya melu mvus; nya zene a ne ñhe vé? Wulaʼan été, a yen awoʼone ya minleme mienan! Ve ba yalane na: bia ye bo te wulu été.

¹⁷ Me teléya mia bemombô; vôʼôlaʼane tyiñe toñ! Ve ba yalane na: bia ye bo te vôʼôlô.

¹⁸ Ajô te vôʼôlaʼan a meyoñe bikuu! A wo a ékôane bôt, yeme jam da lôt e be be!

¹⁹ Vôʼôlôʼô a si! O lôô: ma ma zuu bidim e be bôte ba; bibuma yʼasimesane dap; amu be nji vôʼôlô mejô mam; a be nga biasé metiñe mam

²⁰ ma bo ôtu wo so Saba a nkaé ya si é nʼôyap wo nyume mvaé jé? Me nji yene mimveane mienan ba diʼi ngumba mvaé, a me nji nyeʼe bityiʼa bienan.

²¹ Ajô te Nti a jô avale di na: me nyô, ma bôôé ékolé ôbaʼa mekok ôsu ya bôte ba, vôm ate bon a bʼésaa ba ye kolé ôbaʼa nsamba wua; nalé fe bemvôé, a bôt be too vôme wua, ba ye wu.

Kpwatôlô

²² Avale di Nti a jô na: ô lôô bôte ba so éfuse si yʼakôé, beta ayoñe bôt a vee e mekuʼu ya si nyô.

²³ Ba samese élaé a ayab akoñ; be ne njet, te kʼéngôngo; tyiñe jap ja sôk ane mañ; be bete bikabela yôp, ntaʼane nsamba ane môte wua asu mewosan, wo ba zu wosane nye, a ngone Sioñ!

²⁴ Bi wôʼôya foé a mo mangan me maneya tek, biyebe bi biya bia, nalé fe mintaé ane mi minga a biaé.

²⁵ Te kean afan, te keane mezen; amu nsiñ a ne wé a bili nkpwaté mekôn wé, a miase woñe mekuʼu mese!

²⁶ A ngone bôte bam, jaék nkuta ane kandé, a bum asub été. Nyoñe meyep ane atyiʼi monafam, juu womien abui du été amu nsa biôm a ye kui be bia atemetem.

²⁷ Me teléya wo ane nyô a veʼele bôte bam, ane ôlem, nalé ate ô yeme na wo veʼele mezene map.

²⁸ Be ne mbia mimbenan bese, bôte bibôta, be too ane mvot a anʼétyé, bese ba bo mbia be mam

²⁹ nkôm ô nʼayôñ abui afiti a maneya nyemé e nduan été. Ba jañele éyoñe ya fubu étyé ésôm é nji kôlô.

³⁰ Ajô te ba loone be na, argent ba biasé. Amu Nti a biaséya be.