YEREMIA 52 - Bible en langue Bulu

Ndilan a nyoñane Yérémi

¹ Sédékias a mbe mimbu mewôm mebaé a wua éyoñ a nga tebe njôô, a nga jôô mimbu awôm a wua Yérusalém. Nyia a mbe jôé na Hamutal, ngone Yérémi ya Libna.

² A nga bo mam me nʼabé e mise me Nti, e mezene mese, avale Yôyakim a nga bo.

³ Mame mana me nga kui amu ayaa Nti e nga yené Yérusalém a Yuda ngame yat, a kui a nga wua bʼôyab a asu dé. Ve Sédékias a nga ben éjôé njô bôte ya Babilôn.

⁴ Mbu ébulu ya njôane wé, ngon awômô é too melu awôm, Nébukatnétzar, njô bôte ya Babilôn, a nga zu a nkane mewosane wé a wosane nye; be nga vule minkan ôsu vié, be nga lôñ alem e bômaʼane nye.

⁵ Tison é mbe ndilane bita a kui mbu awôm a wua njô bôte Sédékias a nga jôô.

⁶ Ngone nyini é too melu ébu, mfumbale zaé a too ngu e tison été, bidi bi jembaʼane fe asu bôte ya ngume si,

⁷ zen é nga yombô tison; nde bôte mewosan bese be nga tup a kôlô tison alu, be lôtôk e zen é ne mbé , zañe mimfin mibaé, bebé afube njô bôt, Bekaldééñ ki be bômaʼane tison. Be nga ke zene yʼAraba.

⁸ Ve nkane bita Bekaldééñ ô nga tôñe njô bôt a koone Sédékias minjeʼese ya Yérikô, a nkane bita wé ôse ô nga mialan a ke nye ôyap.

⁹ Be nga bi njô bôt a kee nye be njô bôte ya Babilôn e Ribla e si ya Hamat; a a nga tyiʼi nye ajô.

¹⁰ Njô bôte ya Babilôn a nga bo na be wôé bone be Sédékias émien a lôô; avale te fe a nga bo bivete ya Yuda e Ribla.

¹¹ Wôna a nga bo na be tube Sédékias mis a bo na be kaʼa nye a bengôkob be mvot. Njô bôte ya Babilôn a nga kee nye Babilôn a futi nye mimbôk a kui môs a nga wu.

¹² Ngone tane é too melu awôm, mame ya mbu awôm a ébulu Nébukatnétzar, njô bôte ya Babilôn a nga jôô, ñwô Nébuzaradañ, évete bezimbi ja saane njô bôte ya Babilôn, a nga zu Yérusalém.

¹³ A nga diʼi Nda Nti, nda njô bôt a menda mese ya Yérusalém; jaʼane beta nda ase, a nga diʼi je nduan.

¹⁴ Nkane bita Bekaldééñ ôse ô mbe a évete bezimbi, ô nga mane tyame mimfine mise mi nga bômane Yérusalém.

¹⁵ Nébuzaradañ, évete bezimbi, a nga kee awutuk a mebukaʼa me bôt me nga liʼi Yérusalém, ba be nga ke ngame njô bôte ya Babilôn, a mebukaʼa me bôt ba tiñe biôm.

¹⁶ Ve da, Nébuzaradañ, évete bezimbi, a nga liʼi bevoʼo ya Yuda be mbe nsamba bedañ azoé, be liʼi be too bekôme mindiʼi mi woon a bebo mefup.

¹⁷ Bekaldééñ be nga buʼu beta mekône me mvot me mbe Nda Nti, metin, mañ me mvot me mbe Nda Nti be nga kee mvot ése e Babilôn.

¹⁸ Be nga nyoñe meviek, bisobelé, atyeñ, bilaé, mekob a biôme bi mvote bise be mbe be belaʼane bie.

¹⁹ Evete bezimbi é nga nyoñe fe befandé, bikanda bi nduan, bisua, meviek, bibi bifufup, metôk a bidoʼo bisua, jôm ése é mbe or a jôm ése é mbe argent.

²⁰ Beta mekône mebaé, mañ a benyaʼa be mvot awôm a bebaé be mbe tin, mbe njô bôte Solômon a nga bo asu Nda Nti, biôm bi mvot bite bise adite dap te kʼayemé.

²¹ Ve mfaʼa beta mekôn, ô too menyiʼi me mo awôm a mebaé ô nga bômane de; afibe dé e mbe anyu anyiin: e mbe nlom été.

²² Mendoʼo me mvot me mbe de yôp; andoʼo da e mbe ôyabe yôp menyiʼi me mo metan; ntiñane bibuma bi grenade ô nga bômane mendok, bise bi too mvot; akône baa e mbe fe avale te a begrenade bé.

²³ Bibuma bi grenade bi mbe mewôm ébu a bisaman mimfaʼa mise a bibuma bi grenade bise bi mbe mbômaʼan bi mbe ntet.

²⁴ Evete bezimbi é nga nyoñe Séraya Ntuni-nnen, Sôfôni baa ntuni a bebaʼale mimbé belaa.

²⁵ E tison, a nga nyoñ évete bôte mewosan, nalé fe bôt awôme ya nseñe njô bôt a ntilimam évete nsamba mewosan é mbe é bili ésaé ya nyoñe bôte bisaé, a bôte ya Yuda mewôm mesaman; bôte bete bese be mbe Yérusalém.

²⁶ Nébuzaradañ a nga kee be be njô bôte ya Babilôn e Ribla.

²⁷ Nye ki ve bo na be wôé be awolo te ébien e si ya Hamat.

²⁸ Avale di nde bôte ya Yuda be nga ke minkôm ôyap a si jap. E bôte Nébukatnétzar a nga kee be minkôm mbe ba: mbu zamgbwale Beyude 3.023;

²⁹ mbu awôm a muam Nébukatnétzar a nga jôô a nga kee bôt 832 be soʼo Yérusalém;

³⁰ mbu mewôm mebaé a lale Nébukatnétzar a nga jôô, ñwô Nébuzaradañ évete bezimbi é nga kee Beyude 745 minkôm, bese bôte 4.600.

³¹ Mbu mewôm mela a zamgbwale Yôyakin, njô bôte ya Yuda a nga ke minkôm, ngone awôm a baa é too melu mewôm mebaé a metan, ñwô Evil-Mérôdak, njô bôte ya Babilôn, mbu ôsu a nga jôô, a nga telé Yôyakin, njô bôte ya Yuda, e duma dé été, a a nga vaa nye mimbôk.

³² A nga kobô nye mvoʼé a telé éto njôane jé é dañe ji bejô bôte baa be be be nga too Babilôn.

³³ A nga bo na be tyendé nye mengômesan me mbôk a Yôyakin a nga di vôm a né nté ôse a nga vee.

³⁴ Mbelan be nga belane nye, mbelane yʼéyoñ ése ô mbe nye nkôman be njô bôte ya Babilôn, môs ane môs , akekui môs a nga wu, nté ényiñe wé ôse.