YEREMIA 51 - Bible en langue Bulu

¹ Avale di Nti a jô na: ô lôô, ma ye bete évuñulu ja tyam, é wosane Babilôn a bôte be too Léb-Kamayi.

² Ma lôme beseʼese be wosane Babilôn mbe ba ye seʼese nye. Mbe ba ye liʼi si jé ne ngeññ; amu môse bidim, ba ye suʼulane nye yôbe mimfaʼa mise.

³ Be koléʼé élaé e nyôle môt a kolé élaé , e nyôle môt a bo mebun alôʼô bityé dé été! Te léane bendômane bé! Jiʼane nsamba mewosane wé ne meñ!

⁴ Bebalé meveñ a kui awu be kpwaʼak e si Bekaldééñ, a ba be ne nlumane mekoñ e minjoñe ya Babilôn.

⁵ Amu Israél a Yuda be nji bo minkuse mi Zambe wop, mi mi Nti ya minsamba mewosan. Akôsa bo na si jab é bili mekua ntet a ntet asu Nyô yʼIsraél a nʼétyi.

⁶ Tubane Babilôn, a môt ase a nyiʼi ényiñe jé, te taban évô amu ékobe jé! Amu éyoñ akunaʼa Nti nje ji; a ye bulane nye jôme ja yiane nye!

⁷ Babilôn a mbe élaé or e wo Nti été, nje é nga bo si nyô ése na é sok; meyoñ me nga nyu woone wé, ajô te me nga taté na ma fôtan ane mekut.

⁸ Atemeteme na Babilôn ve ku, a ntoo mbôlan! Koʼone nye mvôñ, nyoñane biañ asu fôle jé, ndôʼôtô na ja ye yet.

⁹ Bi nga kômbô yete Babilôn, ve a nji ke bo mvoʼé . Nliʼane nye, a e nkean, môt ase, e si jangan, amu ntyiʼan ajô wé wo bet a kui yôp, a kui minkut.

¹⁰ Nti a bo na zôsôô wongan a yené, zaʼane bi kañete ésaé Nti, e Zambe wongan Sioñ.

¹¹ Jebane mekoñ mʼélaé, jalaʼan mimfeʼe miap! Nti a fôʼôya nsisime bejô bôte ya Beméde, amu a bili nkômban ya tyame Babilôn. Amu akunaʼa Nti le, akunaʼa ya nda Zambe jé.

¹² Betaʼane nlinga wo wosane mimfine ya Babilôn! Yemetaʼane mmomban, telaʼane bemombô, kômane mevôme ya yabe asoé! Amu Nti a bili jam a kômbô bo, a a bo jam a nga tote na a bo bôte be too Babilôn.

¹³ Wo ô too mfôm abui asôé a ô bili jama akum, asuʼulane dôé e soya e too abim ane ôzañ akume viôé ô né!

¹⁴ Nti ya minsamba mewosan a kaneya de ngana a Emiene na: yaa, ma ye jalé wo a bôt ane nge be mbe meselek, a ba ye yôtane wo miñyône mevak,

¹⁵ a nga bo si a ngule jé a nga bo mbôkaʼa yʼémo a feʼe jé, a nga ndamé yôp a atyeñe dé.

¹⁶ Eyoñ a ve tyiñ , mendim ma kôane yôp; a bo na minkut mi bet mi soʼo akuʼu si. A bo feleves asu mveñ a kuli évuñulu e vôm é solô.

¹⁷ Môt ase a ntoo asuk e ñyemane wé été, mmé or ase a wôʼôson, amu éveʼela jé é ne nkpwelan; amu bengunemelane bé be ne ve minsos, mvebʼényiñ ô nji bo be be.

¹⁸ Be ne foʼo ve momo, ésaé é ne teke jam; ba ye bo momo éyoñ melebe mab ma ye so.

¹⁹ Nyô a ne ngabe Yakob, a nji bo ane be; amu nye a mé biôme bise, a dañe dañ ayoñe ya ngabe jé, jôé dé e ne na Nti ya minsamba mewosan.

Amané Babilôn

²⁰ Ô nga too ôkutaʼa wom, mengale bita. A wo, me nga bômôlô meyoñ . A wo, me nga tyame bijôé.

²¹ A wo me nga bômôlô ékabela ba môt a bete je yôp. A wo, me nga bômôlô vagoñe bita a môt a too nye yôp.

²² A wo, me nga bômôlô fam a minga. A wo, me nga bômôlô nnôme môt a mongô. A wo, me nga bômôlô ndôman a ngone minga.

²³ A wo, me nga bômôlô mbaʼale mintômba a mbame wé. A wo, me nga bômôlô nsenane si a bivôle bié a bo bie ésaé. A wo, me nga bômôlô bengovina a bôte metiñ;

²⁴ ma ye bulane Babilôn a bôte bese be too si Bekaldééñ abé ese be nga bo Sioñ mise menan me lôô, nalé Nti a jô.

²⁵ Me nyô, me ne wo ngame yat a nkôle wo tyam, nalé Nti a jô, wo ô nga tyetyame si ése! Ma ye same wo e wo wome ngame yat, a ma ye biʼiti wo ô soʼo mekôme yôp, a ma ye bo wo nkôle wo yôñe nduan.

²⁶ E be wo, ba ye bo te dutu toʼo mekoʼo yʼabuʼu nda , toʼo mekoʼo ya mbôkaʼa; amu wo ye bo melunga nnôm éto, nalé Nti a jô.

²⁷ Betaʼane nlinga e si! Loñane toñ e meyoñ été! Kômane meyoñ me ke wosane nye; loʼone bijôé yʼArara, ya Mini, yʼAkenaz bi wosane nye, tobane beta njôô bezimbi a wosane nye! Boʼone na bikabela bi subu ôsu ane meselek ma kamane mebien!

²⁸ Kômane meyoñ me wosane nye, baa be bejô bôte Beméde, bengovina bé, bôte metiñe bé a si ése é nʼéjôé jabe si.

²⁹ Si é bulekaneya, é fôʼôsaneya; éyoñe ôsimesane Nti ya wosane Babilôn wo tôéban: a bo si ya Babilône biliʼi bi ne teke môt.

³⁰ Bewosane ya Babilôn be jôʼéya mewosan, be liʼiya be too e bitison bi bili alem; be vuaneya éwôlô jap, be ntoo ane binga; be futiya nduane menda mé, be téya mengôñe mé.

³¹ Mmate mbi a mate a ke tôbane mmate mbile mbok, nkatefoé ki nkatefoé mbok asu ya kate njô bôte ya Babilône foé na tisone jé é nyoñebaneya ataté akuʼu di a kui akuʼu avok.

³² Mebôñ (mʼasôé) me nyoñebaneya, a be nga diʼi bingas a nduan a bôte mewosan ba ko woñ.

³³ Amu avale di Nti ya minsamba mewosan, e Zambe Israél a jô na: a ngone ya Babilôn ô ntoo ane vôme ba vaa bidi bikôlaʼa éyoñe ba tyaʼa bie a mebo; étun éyoñ é ngenane na éyoñe ya nkôane bidi ô so asu dé.

Zambe a ye kune bôte bé

³⁴ Nébukatnétzar, njô bôte ya Babilôn a maneya mine ma, a maneya kandé ma; a veñesaneya ma me bo viek ô nʼékôkoé; a maneya mine ma ane beta tit, a jaléya abume dé a jôme me nga bili é too édima; a vaaya ma.

³⁵ Evô é maneya bobane nyôle jam a minsône miam é kpwaʼa Babilône yôp! Nalé minga a too Sioñ a jô. A metyi mam me tabeʼe be bôt be too si Bekaldééñ! Nalé Yérusalém a jô.

³⁶ Ajô te nde Nti a jô na: ô lôô ma ye kaman ajô dôé, ma ye kune wo! Ma ye vele mañe ya Babilôn, ma ye kôtô anjeñe dé.

³⁷ Babilôn a ye veñesan avise mekok , étabaʼa bemvu ya fé, jôme ba kpweʼele anyu a mo a éwovioé; bôte ba tabʼété ba ye bo momo.

³⁸ Ba ye nyé nsamba ane bone bengbwengbwem, a bam ane bitoñe bengbwengbwem.

³⁹ Eyoñe be maneya wobane nduan, ma ye kômesane dina wop, a ma ye bo be na be bili bilam, nalé ba ye bo mevak, a ke ôyo melom, te nguleya beta vee, nalé Nti a jô.

⁴⁰ Ma ye bo na be ke vôme ba tyiʼi betit ane bone mintômba, ane beyôme mintômba a bikela.

⁴¹ Ngoʼo Sésak a nyoñebaneya! Duma ya si ése e vasebaneya! Ngoʼo Babilôn a ntoo bilik e meyoñ été!

⁴² Mañ me beteya Babilône yôp, ézuʼu mendime jé é yandaneya nye yôp.

⁴³ Bitisone bié bi ntoo bilik, a ntoo si mfum, nkôte si; si môt a nji fe tabe, e vôme môta binam éziñ a nji fe lôt.

⁴⁴ Ma ye wosane Bel e Babilôn, jôm a nga min, ma ye vaa nye jʼanyu, a meyoñ ma ye bo te beta tundane ke wé; mfin ôbiene ya Babilôn ô kuya!

⁴⁵ Mia bôte bam, kôlaʼan ézezañe jé, a môt ase a nyiʼi ényiñe jé, ôyap a ayôñ ayaa Nti,

⁴⁶ nleme wônan ô za bili atek, a mi za ko biduñe bia wôʼôtane si nyôna woñ! Ane mbu ane ébubua ane mbu ôvok ane ébubua évok; évô ja ye bobane si; ntibi bôte yôp a ye wosane ntibi bôte mbok.

⁴⁷ Amu ajô te ô lôô melu ma zu mme ma ye wosane bengunemelan ya Babilôn be ne nkpwelan, a si jé ése ja ye bo ôson été; mimbime mié mise mia ye ku ézezañe jé.

⁴⁸ Eyoñe te yôp a si a biôme bise bi nʼété bia ye lomé Babilôn jia ndañan; amu betyam ba ye kubu nye yôp be soʼo akôé, nalé Nti a jô.

⁴⁹ A miñwuane yʼIsraél, Babilône fe a yiane ku avale Babilôn a nga kpwé miñwuane ya si ése!

⁵⁰ Befam awu nkpwaté mekôn, kelan, te teban! Mi simesaʼane Nti mi too ôyap, a Yérusalém a bii éto minleme mienan été!

⁵¹ Bi nga too ôson été, éyoñe bi nga wôʼô meta; ôson ô nga yalé mesu mangan éyoñe bikuu bi nga so e vôme yʼété a ne Nda Nti.

⁵² Ajô te nde, ô lôô, melu ma zu, nalé Nti a jô, mme ma ye wosane bengunemelane bé be ne nkpwelan a e si ése, miñwuan mia ye suu abuk.

⁵³ Toʼo na Babilôn a bet a kui yôp, toʼo a bo aleme na e bo te kʼanyiine, betyam ba ye wosane nye ngame jam, nalé Nti a jô.

⁵⁴ Nyôn wo wôʼé ô soʼo Babilôn, nalé fe beta éduñe si Bekaldééñ.

⁵⁵ Amu Nti a sa Babilôn, a bo na beta tyiñe wé a tabʼévô; mendime mé ma sôk ane beta bʼasôé, ba ve tyiñe ngu.

⁵⁶ Yaa, ntyam a zu wosane nye, a zu wosane Babilôn; mimbene mié mi biliya, bilaé biap bi buʼubaneya. Amu Nti a ne Zambe a yeme ve maʼan, a bulane môt ase jôm é nʼénjé.

⁵⁷ Ma ye bo bivete bié, a beyeme mame bé be bili bilam, nalé fe bengovina bé, bôte metiñe bé a mimbene mié: ba ye ke ôyo melom, a ba ye bo te fe beta vee, nalé njô bôt, nyô jôé dé e ne na, Nti ya minsamba mewosan a jô.

⁵⁸ Avale di Nti ya minsamba mewosan a jô na: ndame mimfine ya Babilôn ja ye bôéban ne meñ, mimbé mié mi nʼôyabe yôp mia ye diʼiban a nduan; éyoñe te ésaé bôt be nga bo ja ye bo zezé. Meyoñe bikuu me nga wu njuk asu nduan.

Asuʼulane Babilôn

⁵⁹ Abendé nkulu mejô Yérémi a nga ve Séraya e mone Nériya, ndaé Maséya, éyoñe ba Sédékias, njô bôte ya Yuda be nga ke Babilôn mbu nyini Sédékias a nga jôô. E too na Séraya a mbe évete bebaʼale akum.

⁶⁰ Yérémi a nga tili bidim bise bi nga yiane kui Babilôn, mejô mese me ne ntilan ajô Babilôn e kalatʼéziñ été.

⁶¹ Yérémi a nga jô Séraya na: Éyoñe wo ye kui Babilôn, wo ye bômbô évévé ya lañe mejô mese ma,

⁶² wo ye jô na: A Nti, womien ô nga kobô ajô ya vôme nyô na a ye vaaban, a na, toʼo bôt toʼo betit, teke jôm ja ye beta tabʼété, ve na a ye bo bilik nnôm éto.

⁶³ A éyoñe wo ye mane lañe kalate nyô, wo ye tiñeti akoʼo été, a wua de ézezañ ôsôé Efrat.

⁶⁴ Wôna wo ye jô na: Avale di nde Babilôn a ye nyoñ, a ye bo te beta tebe tetele amu bidime ma ye soo bie be nye; ba ye ku be teʼeya. Amané ya mejô me Yérémi nde le.