YEREMIA 5 - Bible en langue Bulu

Te ke môte wua e Yérusalém a ne zôsôô

¹ Bômaʼane minjoñe ya Yérusalém, fombaʼan, silaʼan a yemelan, jeñan e mevôm me ne ndam, nge môt a nʼété, nge a ne ve wua a veʼele bo zôsôô , a jeñe benya mejôô, wôna ma ye jamé Yérusalém.

² Toʼo éyoñe ba jô na: Nti a ne vevee! Ba kane ve ngana meduʼan.

³ A Nti, ye mise môé me nji jeñe benya mejôô? Ô bibiya be, ve be nji wôʼô mintaé; ô jianeya be, be nga bo asu dab ayet a dañ akôm. Be nga bene kôñelane minlem.

⁴ Me nga jô na: Be ne bingôngole bi bôt, ba bo mam ane mekut, amu be nji yeme zene Nti, nge metiñe me Zambe wop;

⁵ ve ma ye viane ke e be biwôlô bi bôt a kobô bie; amu be ba yeme zene Nti a metiñ me Zambe wop; ve be fe be buʼuya ébôñeté, a té mengataʼa bese nsamba wua.

⁶ Ajô te ngbwengbweme yʼafan ja bôme be, a mvu mefan ja nyabe be, a ze ja yabe e menyiine ya bitisone biap: ba bese ba ye kômbô kui atan, ba ye nyaban; amu bikotekote bi mame biap bi nʼabui; tyabetyabe mboone mame wobe fe a ntoo abui.

⁷ Ye amu nalé nye me ne nguleya jamé wo? Bone bôé be liʼiya ma; ba kane ngana a jôé jôm é nji bo Zambe. Me nga kuli be mebum minlem, ve ba bo mejian . Ba sulan e nda minga ébamba.

⁸ Be ne foʼo ve bikabela yʼafan bia di mvaé; môt ase a vebele mvuse nga môt a too nye bebé.

⁹ Ye ma ye bo te wosan avale mame te, nalé Nti a jô. Ye ma ye bo te kune mamien e bʼavalʼ ayoñe bôte te nga?

¹⁰ Betan e mekaʼa ya Yérusalém yôp, a tyame me. Ve te mane jian ase! Vaʼane mintyaé mié, amu mi nji bo mi me Nti!

¹¹ Amu nda bôt Israél a nda bôte Yuda be joñôlôya foʼo ma, nalé Nti a jô.

¹² Ba belane meduʼan mfaʼa Nti, ba jô na: Nti a nji bo! A bidim bia ye bo te kui be bia, bia ye bo te yene nkpwaté mekôn nge zaé.

¹³ Bekulu mejô be ne foʼo vʼévuñulu, a môt éziñ a nji kobô e be be: ajô te jame di e boʼo ñhe foʼo be.

¹⁴ Amu ajô te nde Nti, nyô a ne Zambe ya minsamba mewosan a jô na: amu mi kuliya éfia te, ô lôô, ma futi mejô mam anyu dôé ane nduan, a bôte ba ba ye bo njaʼa nduan éte ja ye mane min,

¹⁵ ma nyô, ma soo ayoñe bôt ôyap e wosane wo a nda bôt Israél! Nalé Nti a jô. Ayoñe bôte te e ne ngu, ayoñe bôt e too aso nnôm éto, ayoñe bôt ô ne te yeme nkobô wop, a wo ye bo te wôʼô jame da jô.

¹⁶ Nkobe bibaé bi mfane wé ô yoo ane soñ; bese be ne mimben.

¹⁷ Da ye mane mine bidi wo kôan, a bi wo di, avale te fe da ye bo bobefame bôé a bobebinga bôé. Da ye mine bone a beta mimbame biyeme miôé, nalé fe ndiʼi woone wôé a figié wôé. Da ye tyame bitison bi aleme biôé wo buni, a nkpwaté mekôn.

¹⁸ Ve jaʼane melu mete, nalé Nti a jô, ma ye bo te jiane mia ne meñ.

¹⁹ Nde ñhe, nge mia sili na: amu jé Nti, e Zambe wongan a bo bia mame mana mese? Wo ye yalane na: avale mi nga liʼi ma a ke saane bezambe bikuu e si jenan, avale te mia ye saane bikuu e si é nji bo énjenan.

Mam ma dutu ayaa be Israél

²⁰ Katane jame di e be nda bôte Yakob, boʼone na Yuda a wôʼô de a jôʼane na:

²¹ vôʼôlaʼane jame di a mekute me bôt, a te feʼe mebum! Be beʼe mis, ve te yen, be beʼe melo, ve te wôk.

²² Ye mia ye bo te ko ma woñ, nalé Nti a jô, ye mia ye bo te fôʼôban ôsu viam, e ma me nga ve mañe nselek ane nné, nkaʼalé ô too nnôm éto, a ñwô mañ me nji yiane dañ? Mendime mé ma fôʼôsan, ve me nji bi ngu; ma kumutu ve teke dañe nkaʼalé.

²³ Ve bôte ba be beʼe minlem mi nʼayet a melo; ba kôlô a ke.

²⁴ Be ne te jô e minleme miab été na: nkoone Nti, e Zambe wongane woñ, nyô a noo mveñ éyoñ ja yian, mveñe yʼatataʼa a nyô yʼamané mbu, a a baʼale bia besondô asu nkôane bidi,

²⁵ bikobe bienan mbie bi nga zametane mam mese, abé denan nde da suu mia mvaé éte.

²⁶ Amu mbia be bôt be ne e zañe bôte bam; ba mombô ane belam anon, ba lame melam asu ya bi bôt.

²⁷ Menda map me ne njalan a meduʼan avalʼane nda anon é ne njalan a anon; nalé ate nye ba bo ngu a minkukum.

²⁸ Be ntoo avem, be nga faé fe, be nga beté ôdoʼé ya mboon abé . Be nji kaman ajô monenyui. Ve ba nenenen afoʼo été. Be nji tyiʼi ajô éngôngole môte zôsôô .

²⁹ Ye ma ye bo te wosan avale mam ete nalé Nti a jô, ye ma ye bo te kune mamien e bʼaval ayoñe bôte di?

³⁰ Etua jam a angônda jam a nga boban e si jenan:

³¹ bekulu mejô ba kulu minsos. Betuni be bili be éjôé jab été, a bôte bam ba nyeʼe na nalé nye a boban! Ve mia ye bo aya melu ma zu ajô si jenan?