YEREMIA 48 - Bible en langue Bulu

Nkulane mejô wo wosane bôte ya Môab

¹ Nti ya minsamba mewosan, e Zambe Israél, a kobô ajô Môab na: bidim a Nébô, amu a tyambaneya! Kiryatayim a nʼôson été, a nyoñebaneya; Misgab a nʼôson été a woñ été.

² Nseʼane Môab ô ntoo momo; e Hesboñ ba simesane bidime bié, zaʼan, mvaʼane nye meyoñ me bôt été! Wo fe a Madmén, ba ye tooé wo évô; nkpwaté mekôn wo wulu wo mvus.

³ Nyôn wo so Hônorayim, ba tyam, ba buʼu jôm ése!

⁴ Môab a buʼubaneya! Ayôme bone dé da bete metyiñe map,

⁵ amu ba bete nkôle Luhit a miñyône mise abum, a ba wôʼôtane besiñe ya ba ba yôn a ba be buʼubaneya asiliki ya Hôrônayim.

⁶ Tuban, nyiʼan ényiñe jenan a boʼon ane mon élé ya nkôte si!

⁷ Amu na, mbôlô ô nga tabe ndi e mimboone miôé a akume dôé, wo fe wo ye nyoñeban, a Kemok a ye ke minkôm baa be betuni bé a bivete bié.

⁸ Ntyam a ye nyiin e tison ése, a teke tison éziñ ja ye fam; mbiʼili wo ye jañ, njeʼese wo ye tyamban, jame Nti a jôya nde le.

⁹ Vaʼane Môab mefap, a kele ôyab, a yeleʼe! Bitisone bié bia ye bo melunga. Bia ye bo te fe môt a too été.

¹⁰ Biyoʼé a môt a bo ésaé Nti éngbwemese, biyoʼé a môt a baʼale nkpwaté mekône wé te metyi!

¹¹ Aso mongô, Môab a nga too ne mieññ, a mbe a wokoʼon ébite jé été, a be nji vaa nye ndeʼe jia a sôé nye ndeʼe fok, a a nji ke minkôm; ajô te zame jé é nga liʼi be nye. A ényume jé é nji ke tyendé

¹² Ajô te ô lôô melu ma zu, nalé Nti a jô, mme ma ye lôme bôt be tyendé nye élabaʼa, ba ye liʼi bilabaʼa bié ékôkoé a bo na mendeʼe mé me tôtan.

¹³ Môab a ye wôʼô Kemôk ôson, avale nda bôt Israél é nga wôʼô Bétél ôson, vôme ya ndi nleme jé.

¹⁴ Mi ne jô aya na: bi ne bevevee be bôt, nkane bita mewosan?

¹⁵ Môab a tyambaneya, bitisone bié bi ntoo ôtita wo bet, biwôlô ya bisoé bié bia sise vôme ba tyiʼi betit, nalé njô bôt, nyô jôé dé e ne Nti ya minsamba mewosan a jô.

¹⁶ Ntyaman Môab ô ntoo bebé ya boban, bidime bié bia zu avô.

¹⁷ Siʼisaʼane nye nlô, mia bese mia bômane nye, mia bese mia yeme jôé dé! Jôʼane na: Jé ñhe! Ye éwôlô ntume ji é buʼubaneya éjijin ôlé wu nga?

¹⁸ Kele vôm étôtok é né, tabeʼe si ja wôʼô évé, a ngone minga é too Dibôn! Amu ntyame Môab a zu wosane wo. A tyam aleme dôé.

¹⁹ Tebeʼe zene yôp a mombô a nyô a too Arôér! Siliʼi nyô a tup a nyô a fameya awu minsili, siliʼi nye jam é kuiya?

²⁰ Môab a wuya ôson amu a tyambaneya. Yônan! Silaʼane mvolan! Katane ôsôé Arnon na Môab a tyambaneya!

²¹ Ntyiʼan ajô ô kuiya si é ne njeʼese, e Hôlôn, e Yatsa, e Méfat,

²² e Dibôn, e Nébô, e Bét-Diblatayim,

²³ e Kiryatayim, e Bét-Gamul, e Bét-Méôn,

²⁴ e Kiriyôt, e Bôtsra, e bitisone bise bi ne si ya Môab, bi bi nʼôyab a bi bi ne bebé.

²⁵ Ngule Môab é bibaneya, a wo wé ô ntoo mbuʼan, nalé Nti a jô.

²⁶ Boʼone nye na a soʼo bilam, amu a nga tebe na a wosane Nti! Môab a tame vuñ e biyôlôk bié été, nye fe a tame bo ébi fianga!

²⁷ Ye Israél a nji tame bo asu dôé ébi fianga? Ye be nga koone nye miñwuwub été ane ô ne kobô ajô dé ve a nsiʼisane nlô?

²⁸ Liʼiane bitison a tabaʼan e mekôme yôp, a mia bôt mi too Môab! Boʼon ane zum, nje ja lôñe dumbaʼa dé avelʼanyiine mbas akok!

²⁹ Bi nga wôʼôtane mebune me Môab, mebun ma tulan ôkup, mbia anyu wé, mebune mé, nseman émiene wé a mbetan émiene yôbe wé.

³⁰ Ma yem ayoʼo dé, nalé Nti a jô, ve e ne zesé, avale te fe mimveʼele a mimboone mié.

³¹ Ajô te ma yône Môab, ma yi ajô Môab ase. Menyiñ ma so ajô bôte ya Kir-Hévés.

³² Ndiʼi woon ya Sibma, ma yône wô a dañ abim Yaézér a yône wô. mintyaé miôé mi nga lôte mañ, mi nga kui mañ ya Yaézér; ntyam a nga ku e bibuma bidi ô nga kôan a e bibuma bi ndiʼi biôé ô nga kolé.

³³ Mevak a mefôn bi jañeya afube bilé bia wum été a e si ya Môab; me boya na woon a man e befôndô été; ntyaʼane bibuma bi ndiʼi woon ô nji fe boban a nlomane bia mevak.

³⁴ Minyône ya Hékbon mia wôʼé a kui Eléalé. Ba ve tyiñ a kui Yahas, ataté Tsôar a kui Hôrônayim, a kui Eglat-Kelikiya; amu mendim me Nimrime fe ma ye bo momo.

³⁵ Ma zu mane Môab, nalé Nti a jô, ma zu mane nyô a bete bito bikôndôʼô yôp, a nye a ve zambe wé ôlobinda.

³⁶ Ajô te nleme wom wo kobô ane mimfañ ajô Môab, nleme wom wo kobô ane mimfañ ajô bôte ya Kir-Hévés, amu mfi be nga kôan ô ntoo momo,

³⁷ amu minlô mise mi ntoo ntyeñeban, zel ése ntyiʼan; mintenane mimbak mi ne mo mese, a bikpwaé bi tyele mengeteñ.

³⁸ Minyôn mi ne mevôm a mendile mese ya Môab, amu me bôéya Môab ane ndeʼe môt a nji beta kômbô, nalé Nti a jô.

³⁹ A ntoo ve yônan amu a bôléya! Amu Môab a lume mvus a ôson! Môab a ntoo éwovioé a ékowoñ, e be ba bese ba bômane nye.

⁴⁰ Amu avale di Nti a jô na: ô lôô a yele ane ndôé a a ndamé mefabe mé e Môab

⁴¹ Kériôt a nyoñebaneya, alem é vasebaneya, a minleme mimbene ya Môab mi ne môs ôte a ne minleme ya minga a kôʼôlô mie.

⁴² Môab a ye tyamban, a ye bo te beta bo ngum ayoñ amu a nga tebe ngame yat.

⁴³ Woñ, ébé a avot bi ne be wo, a môt ô too Môab! Nalé Nti a jô.

⁴⁴ Nyô a mate ôsu woñ a ku ébé été, a nyô a kôlô ébé si a bili avot; amu ma ye zu be nye, be Môab éyoñe mbu melebe mé, nalé Nti a jô.

⁴⁵ Evôvoé Hékbon si, bôte ba tub, ba tebe, ngu é maneya be, amu nduan ja so Hékbon a nkabaʼa nduan wo so ézezañe Sihoñ; wo mine mevele me Môab, a ékôkoé nlô bôt be nʼévô.

⁴⁶ Ngoʼo wo a Môab! Bôte ya Kemôk be jañeya! Amu bobefame bôé a bobebinga bôé be keebaneya minkôm.

⁴⁷ Ve ma ye bulane minkôme ya Môab amané biyoñ, nalé Nti a jô. Aval ajô Môab e kobaneya nde le.