YEREMIA 47 - Bible en langue Bulu

Nkulane mejô wo wosane Befilisteñ

¹ Mejô Nti a nga kobô nkulu mejô Yérémi ajô Befilisteñ te na Faraoñ a bibi Gaza mme ma:

² avale di Nti a kobô na: ô lôô na mendim ma bete mfaʼa yʼakôé. Ma bo anʼôtôñe mendim wo kui ndôn; ma kuli si a biôm bi nʼété ndôn, nalé fe bitison a bôte be too été. Befam ba yôn. E bôte bese be too si ba bam,

³ amu éduñe ntyañetane biboʼos ya bikabela bié bi ne biwôlô, amu éduñe ya bevagoñe bé a éduñe ya minka mié; bʼésaa ba kate kôñelan mfaʼa bon be né, amu mo me dañeya tek.

⁴ Amu môse ya sa si Befilisteñ ése wo zu, môse ya vaa ba bese be ngenane ba volô Tir a Sidoñ, amu Nti a sa si Befilisteñ a mebukaʼa mʼékôte mañ ba loone Kaftor.

⁵ Gaza a mbili ayan, be kpwéya Askalôn évô, mebukaʼa me ngule jap, Wo ye kpwele womiene mimbaʼa nyô a kui éyoñ évé?

⁶ A nkpwaté mekône Nti wo ye ke a kui vé te woʼon? Bulaʼan abame dôé été. Boʼo ne mieññ a tabʼévô.

⁷ Ô ne nguleya woʼon aya? Eyoñe Nti nye a lôme wô asu ya wosan Askalôn a nsaʼa mañ? Nne a ye tôbane wô wé.