YEREMIA 44 - Bible en langue Bulu

Melep ma tôñe Beyude be nga wondé a kʼEjipte

¹ Ajô Nti e nga litibane be Yérémi ajô Beyude bese be too si yʼEjipte, be too Migdol, Tapanés, Nof a si Patrôs na:

² Avale di Nti ya minsamba mewosan, e Zambe Israél a jô na: Mi nga yene bidime bise me nga zuu bie Yérusalém, a bitisone bise ya Yuda: mi lôô bi ntoo môse wu ve bilik, teke fe bôt be too été,

³ amu abé be nga bo asu ya na me wôʼôlun, éyoñe ba ke ve ôlobinda a kañe bezambe befe, mbe be nji tame yem, nge be, nge mia, nge bʼésoo.

⁴ Me nga lôme mia bebo bisaé bame bese, bekulu mejô, me nga lôme be nné ane tyé ja lendé, be jô mia na: Te boone angôndô jam ate, nye ma vini.

⁵ Ve be nji vôʼôlô, be nji kee alo, be nji bulane mvus mfaʼa yʼabé be nga bo, a be nji jôʼé ve bezambe befe ôlobinda.

⁶ Ayaʼa dam a ayoʼo dam bi nga sôéban a diʼi bitisone ya Yuda, a minjoñe ya Yérusalém mbie bi ntoo éyoñe ji ve bilik, melunga, avale da yené môse wu.

⁷ Eyoñe ji, Nti ya minsamba mewosan, e Zambe Israél a kobô avale di na: Amu jé mia bo miabebien abim anen abé di, éyoñe mia vaa ézezañe Yuda été befam, binga, bongô a minkeñelé mi bon , mebukaʼa momo?

⁸ Mboone te ô too asu ya bo na me wôʼôlun, amu mimboone ya mo menan, éyoñe mia ve bezambe befe ôlobinda Ejipte, vôme mi zuya tabe, a bo na mi vaaban a bobane jôm ébiasé a ôsame e meyoñ mese ya si nyô été.

⁹ Ye mi vuaneya mewôé me bôt bʼésoo, e ma bejô bôte ya Yuda, e ma beyal, émenan, a ma benyô beyal, mmie mi bobaneya si ya Yuda a minjoñe ya Yérusalém?

¹⁰ Be nji jôban abé dap a kui môse wu, be nji ko woñ, be nji tôñe metiñe mam a memvinda mam me nga telé ôsu vienan a ôsu bʼésoo.

¹¹ Ajô te Nti ya minsamba mewosan, e Zambe Israél a jô avale di na: Ô lôô: ma tyiʼi na ma bo mia abé a vaa Yuda ase.

¹² Ma ye nyoñe mebukaʼa me Yuda mese me nga tyiʼi na ma ke Ejipte a tabe wé; ba ye bo momo bese Ejipte; nkpwaté mekôn a mfumbale zaé bia ye kpwé be, ba ye bo jôme biyoʼé, melunga, ébiasé a ôsame.

¹³ Ma ye tebe ba be too si yʼEjipte ngame yat a nkpwaté mekôn, mfumbale zaé a bim avale me nga bo Yérusalém.

¹⁴ Tekeʼe môt a ye fam awu nge nyiñ e mebukaʼa ya Yuda me nga zu tabʼEjipte, ôsimesan ô too na ba ye beta bulane Yuda e vôme nkômbane wob wo ke be na be bulane tabe; amu ba ye bo teke beta bulane wé, vengevenge ve ayôme befam awu.

¹⁵ Befam bese be mbe be yeme na binga bap be mbe be vaʼa bezambe befe ôlobinda, binga bese be nga tele beta nsamba valé, a bôte bese be nga too Ejipte e tisone Patrôs be nga yalane Yérémi na:

¹⁶ bi nji kômbô beta wôʼô ajô ô nga kobô bia a jôé Nti.

¹⁷ Ve bia kômbô bo avalʼanʼajô e nga kui anyu dangan e né, e ne na: E ve njôô minga ya yôb ôlobinda a sôé nye binyunyui, avale bi tameya bo, bia, a bʼésaa bangan, bejô bôte bangan a bivete biangan e bitisone ya Yuda, a e minjoñe ya Yérusalém. Bi nga bili bidi abime da yian, bi mbe mevak teke wôʼôtane bidime biziñ.

¹⁸ Vʼataté éyoñ bi nga jôʼé mveane njôô minga ya yôb ôlobinda a sôé nye binyunyui, bi nga yi mam mese, nalé fe na nkpwaté mekôn a mfumbale zaé bi taté na bia wôé bia.

¹⁹ Eyoñ ébien bia ve njôô minga ya yôb ôlobinda a sôé nye binyunyui, ye beyôme bangan be nji kañese na bi yame biwôlé bi too éveʼela jé a sôé nye binyunyui?

²⁰ Ane Yérémi a nga yalane bôt avale di: befam, binga a bôte bese be nga ve nye éyalane te na:

²¹ Ôlobinda mi nga diʼi e bitisone ya Yuda a minjoñe ya Yérusalém, miabebien a bʼésoo, bejô bôte benan a bivete bienan a bôte bevoʼo ya si jenan, ye Nti a nji simesane nye, ye a nji baʼale jame te nleme wé?

²² Nti a nji ke ôsu a jibi de amu évô ya mimboone mienan, amu beangôndô be mam mi nga bo; a si jenan é suʼulane bo bilik, melunga, jôme yʼébiasé, bôte momo aval é ne môse wu.

²³ Amu mi nga diʼi ôlobinda a bo Nti abé , amu mi nji wôʼô tyiñe Nti a teke wulu ane metiñe mé, memvinda mé a minjôane mié bi né, ajô te nde bidime bi bi nga kui be mia, aval e ne môse wu.

²⁴ Yérémi a nga beta jô bôte bese a binga na: Wôʼan ajô Nti, mia bese ya Yuda mi too Ejipte!

²⁵ Avale di Nti ya minsamba mewosan, e Zambe Israél a jô na: Mia a binga benan, mi maneya jô a menyu menan a bo jam mia jô a mo menan na: Bia kômbô jalé mintiñetane miangan bi nga tiñeti, a ve njôô minga ya yôb ôlobinda, a sôé nye binyunyui. Mia ye foʼo yemete mintiñetane mienane mise.

²⁶ Ajô te vôʼôlaʼan ajô Nti, mia bese ya Yuda mi too Ejipte! Mi lôô: ma kane de ngana a beta jôé wom, nalé Nti a jô, jôé dam da ye bo te beta looban a anyu môt éziñe ya Yuda; e si ése yʼEjipte, teke wua a ye jô na: Ane Zambe, Nyô a ne Nti a vee!

²⁷ Mi lôô, ma ye fombô be asu bidime biap, sa asu mvome jap. Bôte bese ya Yuda be nʼEjipte, ba ye vaaban a nkpwaté mekôn a mfumbale zaé akekui ba maneman.

²⁸ Mone ngabe bewu, ba ba ye fame nkpwaté mekôn, ba ye bulane si ya Yuda be soʼo Ejipte. Ve mebukaʼa ya Yuda, ba bese be nga soʼo Ejipte na ba tabʼété, ba ye yem ajô da ye tôéban, yʼéndam, yʼéndap?

²⁹ Mi lôô, nalé Nti a jô, ndem mia ye yeme na ma ye wosane mia e vôme nyô, nalé mia ye yeme na mejô mam ma ye foʼo tôébane be mia asu bidime bienan.

³⁰ Avale di Nti a jô na: Mi lôô: ma ye kalane Faraoñ Hôfa njô bôte yʼEjipte e mo besiñe bé, e mo me ba ba jeñ ényiñe jé, avale me nga ve Sédékias, njô bôte ya Yuda, e mo me Nébukatnétzar, njô bôte ya Babilôn, nsiñe wé, nyô a nga jeñejeñ ényiñe jé.