YEREMIA 43 - Bible en langue Bulu

Ba woʼotô Yérémi Ejipte

¹ Eyoñe Yérémi a maneya kate bôte bese mejô mese Nti, e Zambe wob, a nga lôme nye na a kate be,

² Eyoñe te Azaria, e mone Hôkaya, Yôhanañ, e mone Karéa a bôte mebune bete bese be nga jô Yérémi na: Jame wo jô e ne minsos; Nti, e Zambe wongan a nji lôme wo ô jô na: Te kean Ejipte a tabe wé.

³ Ve Baruk, e mone Nériya, nye a tindi wo na ô wosane bia a ve bia e mo Bekaldééñ na, be wôé bia, nge kee bia minkôme Babilôn.

⁴ Yôhanañ, e mone Karéa, bivete bise ya nkane bita a bôte bese yʼayoñ be nji wôʼô tyiñe Nti Nye a nga bendé be na be tabe si Yuda.

⁵ A Yôhanañ, e mone Karéa, a bivete bise ya nkane bita be nga nyoñe mebukaʼa mese ya Yuda me nga bulane zu tabe si Yuda, mvuse nkeane be nga mane ke minkôm, e meyoñ mese été:

⁶ befam, binga, bongô, bengon be njô bôt a bôte bese Nébuzaradañ, évete bezimbi, a nga liʼi ba be Gedalia, e mone Ahikam, ndaé Safan, nkulu mejô Yérémi a Baruk e mone Nériya.

⁷ Be nga ke Ejipte amu be nga bo te wôʼô tyiñe Nti a be nga kui Tapanés.

Nkulane mejô ane Nébukatnétzar a ye wosan Ejipte

⁸ Ajô Nti e nga litibane be Yérémi e Tapanés na:

⁹ nyoñe beta mekoʼo mo, a solé me e meteʼe me ne mbôkaʼa brik ô nʼanyiine nda Faraoñ e Tapanés, bôte ya Yuda be lôô;

¹⁰ wo ye jô be na: Avale di Nti ya minsamba mewosan, e Zambe Israél a jô na: Ô lôô, ma lôme bôt be ke nyoñe Nébukatnétzar, njô bôte ya Babilôn, mbo ésaé wom. Ma ye telé éto njôane jé e mekoʼo ma te solé mana yôp, a ye bôé ôkala wé été yôp.

¹¹ A ye zu a bibi si yʼEjipte: awu asu ba be ne asu awu, minkôm asu ba be ne asu minkôm, a nkpwaté mekôn asu ba be ne asu nkpwaté mekôn!

¹² Ma ye futi nduan e menda bezambe yʼEjipte; Nébukatnétzar a ye diʼi be. A ye kee bengunemelane minkôm, a ye vut Ejipte nyô avale mbaʼale mintômba a vute ngômesane jé nyô, a a ye kôlô valé e mvoʼé été.

¹³ A ye buʼu mekôn me ne mendeme bengunemelan ya Bét-Kemék e si yʼEjipte, a a ye diʼi menda bezambe yʼEjipte nduan.