YEREMIA 42 - Bible en langue Bulu

Yérémi a tebe Beyude ba kômbô kʼEjipte ngame yat

¹ Bivete bise ya nkane bita: Yôhanañ e mone Karéa, Yezania e mone Hôkaya a bôte bese yʼayoñ, ataté nyô a ne tyôtyoé a kui nyô a nʼanen, be nga zu

² a jô Yérémi na: Njaʼane wongan ô tame kui asu dôé; yeʼelaʼane Nti, e Zambe wôé, ajô dangan a asu mebukaʼa ma. Amu bi nga too abui, éyoñe ji bi liʼiya ôyôm abim avale mise môé me lôô de.

³ Nti, e Zambe wôé, a litiʼi bia zene bia yiane tôñ, a jam bia yiane bo!

⁴ Nkulu mejô Yérémi a nga jô be na: Ma wôk, mi lôô ma zu yeʼelane Nti, e Zambe wônan ane mejô menan me né; a ma ye liti mia ajô ese Nti a ye yalane mia, teke solé mia jam éziñ.

⁵ Be nga jô Yérémi na: Nti a boʼo bebela a zôsôô ngaa a tele bia ngame yat, nge bia bo te bo ajô ese Nti e Zambe wôé a ye lôme wo asu dangan!

⁶ Toʼo mvaé ngʼabé, bia ye ve tyiñe Nti, e Zambe wongan, mfaʼa biabebien bia lôme wo mewôk: nalé bia ye vak amu mveane tyiñe Nti, e Zambe wongane mewôk.

⁷ Mvuse melu awôm, ajô Nti e nga yené be Yérémi.

⁸ Nde Yérémi a nga loone Yôhanañ, e mone Kavéa, bivete bise ya nkane bita bi mbe nsamba wé, a bôte bese yʼayoñ, ataté nyô a dañe tyôtyoé, a kui nyô a dañ anen.

⁹ A nga jô be na: Avale di Nti, e Zambe Israél, mfaʼa mi nga lôme ma me bo na njaʼane wônan ô kui asu dé na:

¹⁰ nge mia ke ôsu a tabe si jenane nyô, ma ye yemete mia été, a ma ye bo te tyame mia, ma ye bé mia, a bo teke té mia si; amu ma jôban abé me nga bo mia.

¹¹ Te koone njô bôte ya Babilône woñ, nyô mia ko woñ asu dé, te koone nye woñ, nalé Nti a jô. Amu me ne be mia, asu ya nyii a kôté mia e wo wé.

¹² Ma ye liti mia mvam a a ye ko mia éngôngo, a ye bo na mi beta bulane si jenan.

¹³ Ve nge mia jô na: Bia ye bo te tabe si nyô! Nge mia bo te wôʼô tyiñe Nti e Zambe wônan,

¹⁴ a nge mia jô na: Momo, bia ye ke Ejipte vôme bidi bia ye bo te jemban a nne bia ye tabe wé,

¹⁵ wôna wôʼane ñhe ajô Nti, mia, mebukaʼa me Yuda! Avale di Nti ya minsamba mewosan, e Zambe Israél a jô na: Nge mia tyiʼi na mia kʼEjipte, nge mia ke tabe wé,

¹⁶ nkpwaté mekôn mia mate wo ye koone mia wé, si yʼEjipte, mfumbale zaé, jame da tyelé mia minleme yôp, a ye kabetane mia wé, si yʼEjipte, nne mia ye wu wé.

¹⁷ Ba bese ba ye tyiʼi na ba kʼEjipte na ba tabe wé, ba ye wu a nkpwaté mekôn, mfumbale zaé nge bim, e mbe ba ye bo na, bi zu be be.

¹⁸ Amu avale di Nti ya minsamba mewosan, e Zambe Israél a jô na: Aval ayaa, a ayoʼo dam bi nga sôéban e be bôte ya Yérusalém, avale te ayaa dam da ye sôébane be mia, nge mia kʼEjipte; mia ye bo jôme biyoʼé, melunga, ébiasé a ôsame. A mia ye bo te beta yene vôme nyô.

¹⁹ A mebukaʼa ya Yuda e jame Nti a jô mia nde di: te kean Ejipte! Tukaʼa yemane de: ma vu mia de soñe den.

²⁰ Mia duʼu miabebien, amu mi nga lôme ma be Nti, e Zambe wônan, mi jôʼô na: Yeʼelaʼane Nti, e Zambe wongan asu dangan, a jam ese Nti, e Zambe wongan, a ye jô, kate bia de a bia ye de bo.

²¹ Me kateya mia de môse wu; ve mi nji wôʼô tyiñe Nti, e Zambe wônan, nge vôʼôlô jam ese a nga ve ma na me kate mia.

²² Tukaʼa yemane de éyoñe ji: mia ye wu nkpwaté mekôn, mfumbale zaé nge bim e vôme mia ke na, mi tabe.