YEREMIA 40 - Bible en langue Bulu

Ba suu Yérémi

¹ Ajô e nga litibane be Yérémi e soʼo be Nti, éyoñe te Nébuzaradañ évete bezimbi a maneya suu nye Rama. Eyoñ a nga bo na be nyoñe nye, Yérémi a mbe nkaʼan a bengôkop ézezañe bekee minkôme ya Yérusalém a Yuda, be nga ke minkôme Babilôn.

² Evete bezimbi é nga nyoñe Yérémi a jô nye na: Nti, e Zambe wôé, a nga kate foé ajô bidime bi, mbie bia wosane tisone nyô;

³ Nti a boya a tôé jam a nga kate foé, amu mi nga bo Nti abé , a bo te vôʼôlô tyiñe jé. Jam a nga kate foé e kuiya foʼo be mia.

⁴ Eyoñe ji ô lôô, ma vaa wo bengôkop be ne wo mo; nge da yené mvaé be wo na bia wo bi ke Babilôn, zaʼak, ma ye fombô wo, nge ô nji yene mvaé ja yiane wo na bia wo bi ke Babilôn, te zu; fombôʼô, si ése é ne wo ôsu, kele vôme wo ye yene mvaé a vôme a ye yiane wo na ô ke.

⁵ Yérémi a ngenan te yalan, nde évete bezimbi ja beta jô nye na: Bulaʼane be Gedalia e mone Ahikam, ndaé Safan, nye njô bôt ya Babilôn a nga telé e bitisone ya Yuda, a mia nye, tabaʼane bôte yʼayoñ été; nge na kele vôm ase wo ye yene mvaé ya ke. Evete bezimbi é nga ve nye bidi a memvaka a suu nye.

⁶ Nde Yérémi a nga ke be Gedalia, e mone Ahikam e Mispa, a baa nye be nga tabe e bôte yʼayoñ été be nga liʼi be too si jap.

Gedalia, ngovina ya si Yuda

⁷ Bivete bise ya nkane bita bi mbe afan be nga wôk, bebien, a bôte babe na njô bôte ya Babilôn a teléya Gedalia, e mone Ahikam, a jôô si, a na, a veya nye befam, binga, bongô a ba ya bingôngole bi bôt bi nga bo te ke minkôme Babilôn.

⁸ Nde be nga ke be Gedalia e Mispa be too na: Israél e mone Netania, Yôhanañ a Yônatan e mone Kavéa, Séraya e mone Tanhumét, bone bʼEfayi ya Nétôfa a Yezania e mone Makatite, bebien a bôte bap,

⁹ Gedalia e mone Ahikam, ndaé Safan a nga kane be ngana, be, a bôte bap, a jôʼô na: Te koone woñe ya saane Bekaldééñ, tabaʼane si jenan, boʼone njô bôte ya Babilône bisaé, éyoñe te mia ye tabe mvoʼé .

¹⁰ Ma nyô, me too Mispa, asu ya bo nkômbane Bekaldééñ, mbe ba ye zu be bia; mfaʼa wônan, kôʼane woon, bibuma yʼésep a mbon, futaʼane bie meviek, a tabaʼan e bitisone bienan, bi mi nga nyoñ.

¹¹ Avale te fe Beyude bese be mbe Môab, e be bone bʼAmon, Edom a mesi mese, be nga wôʼô na njô bôte ya Babilôn a nga liʼi mebukaʼa e Yuda a na, a nga telé Gedalia e mone Ahikam, ndaé Safan, a bo ngovina wop.

¹² Ajô te Beyude bese be nga so mevôm mese be nga mane mialan a ke e Yuda be Gedalia Mispa, a be nga kôan étua abui woon a bibuma yʼésep.

¹³ Yôhanañ e mone Karéa a bivete bise ya nkane bita ô mbe afan, be nga zu be Gedalia e Mispa,

¹⁴ a jô nye na: Ye wo yeme na Balis, ajô bôte bone bʼAmon, a lômeya Ismaél e mone Nétania na a wôé wo? Ve Gedalia e mone Ahikam a nji buni be.

¹⁵ Nde Yôhanañ e mone Karéa a nga jô Gedalia asoé e Mispa na: Vaʼa me ngule na me ke wôé Ismaél, e mone Nétania. Teke môt a ye yeme de. Amu jé a ye viane wôé wo? Amu jé bôte bese ya Yuda be ne nsulaʼane be wo ba yiane mane tyamelan, a mebukaʼa ya Yuda ki njañan?

¹⁶ Gedalia, e mone Ahikam a nga yalane Yôhanañ e mone Karéa na: Te bo jame te; amu jame wo jô Ismaél é ne minsos.